Read Ese Ejja 2 Timoteo 4 Bible Online

2 Timoteo 4 - Ese Ejja bible

2 Timoteo 4

¹Eyacuiñajjija, Jesosa Quitoja peaꞌai ecuea esohui eba. Jesosa Quito poe oꞌoya majje ojjaña huoojeaꞌyojji poajeꞌyo. Yahuajo manoꞌyo cuana, jjeya eshe nequi cuana peaꞌai sosequia cajeꞌyo. Ojjaña ojaya epeejji cuana quea pame poani baꞌe tiitii mee cajeꞌyo onijje eyajo, Eyacuiñajjiya. Mimishi cuana ca ca quea nee nee po mee cajeꞌyo cuaquijo.

²Jamajjeya eyaya miya huoojeaña jama baꞌa: ¡Eyacuiñajjija esohui oe huohui tiitiicue jjeya, miyaya! Dejja cuana jjashajjaꞌajjaqui sa po ajjajo ¡jamatiiya huohuicue! Mimishi cuana acanijo ¡tecueajeaña jayojja acue! Jama acue baꞌa: “¡Aꞌa quea tai pojji! ¡Aꞌa quea mimijjequijea pojji!” Pea cuana quea pame poanijo jama acue baꞌa: “Eꞌe, ¡jamaya Eyacuiñajjijo baꞌecue!” ¡Quea pame, quea mimi bei nee huohui tiitiicue ojjaña Eyacuiñajjija esohui!

³Quijje ca ca dejja cuana esohui eꞌe nei shajjaꞌajja sa po ajja poaje. Quea mimishi baꞌe sa poanijo oya cuana quea huiso esohui huohuijji tai iyaa caje ojaya ejjashahuabaquiꞌyojjijo huohuiya.

⁴Eyacuiñajjija esohui eꞌe nei shajjaꞌajja sa poꞌyo ajja poaje. Etiiquianaja ehuohuiꞌyo quea quehua cuana shajjaꞌajja cajeꞌyo.

⁵Timoteo, ¡miya ca oe quea jaꞌa nee nee jjashahuabaquicue ojjaña pojjajo! Peaa miya napa cajje ¡jamatii quea caꞌa, meteꞌama peaꞌai pocue! ¡Eyacuiñajjija esohui Jesosa Quitoja huohui tiitiicue! ¡Eꞌe jojo nei ojjaña ma ecua eyaya miya huohuinaje jamaya acue!

⁶Eꞌe, ecuea echacojji Eyacuiñajjija esohuijo jjeya beshahua nei apoa poanijo, dejja mimishi cuaa eya mano mee cajeꞌyo. Ijjiacajji jayojjaya mano meeꞌyome acajeꞌyo cuaa. Quijje pishana, jjeyahua nei pojjaꞌa eya poquijeꞌyo eyahuasijje Jesosa Quito que baꞌeꞌyohua.

⁷Eya janobajjima nei chacochacoꞌyonaje Eyacuiñajji nijje. Ecuea echacojji Jesosa Quitoja apoa. Eyacuiñajjija esohui jayojja jama aꞌyonaje eꞌe jojo nei eyaya. Jamajjeya eya onijje quea jaꞌa nee baꞌyanijo, eya sosequia cajeꞌyo eyajo.

⁸Esejaya Emeshi mese nei nijje quea pame nee chacochaconajejo, eya quea huiso sosequia cajeꞌyo poe oꞌoya majje. Ohuaya eya huohui cajeꞌyo jama baꞌa: —Miya ecuea echacojji quea jaꞌa nee poanaje. Eꞌe, ojjaña ojaya epeejji cuaa ma ojaya epoe oꞌoyajjijo quea bihui neeya ishoaꞌajja caꞌani Jesosa Quitohua sosequia cajeꞌyo quea huiso peaꞌai. Pea esohui Timoteo que

⁹Eya ee nei ani. Jamajjeya ¡jjeyahua nei poecuajicue ee nei anijo!

¹⁰Ecuea epeejji Quesete poquinaje Janata meshi yasijje. Tito peaꞌai poquinaje Damasia meshi yasijje. Dejja Nema bajjani aje oe ojaya aquiana cuana quea boti neejo Eyacuiñajjijo jjashahuabaqui ajja. E pajeaꞌyo majje e que nequiꞌyo ajja. Oya poquiꞌyonaje Tesanonica huasijje.

¹¹Tiquico eyaya huoojeaꞌyonaje Epeso huasijje. Noca ca ca oe enijje nequi. Jamajjeya miya e que poe oꞌoya majje ¡ecuea epeejji Macoso jjequicue peaꞌai! Ohuaya eya chacosahua cajeꞌyo.

¹³Ecuea daqui moo quea ao eyaya jeanaꞌyonaje Toasajo, Capoja equijo. ¡Maya jjequiꞌyocue! ¡Esohui etehueꞌyo cuana peaꞌai yeꞌyocue! ¡Esohui ejeejo tehueꞌyo cuana peaꞌaiya oe yeꞌyocue jjo!

¹⁴Timoteo, Anejano ma baa huoꞌo chacojji poani janobajjima nei mimijajinaje enijje quea mimishi, de. Ojaya mimishijo Jesosa Quitohua oya napa cajeꞌyo quijje.

¹⁵Eseyaya Jesosa Quitoja esohui huohuiañajo oya janobajjima nei mimijajinaje peaꞌai. ¡Jamajjeya oya ba neineicue! Oya quea tai, de.

¹⁶Dejja etii cuaa eya jeanobiaꞌyo majje iyaa ca oꞌoyanaje ehuohuiꞌajjajji ecuea esohuijo. Eya huohuiꞌajja coo canajejo, ecuea epeejji cuana enijje nequi ajja. E ejeanobiajojo oya cuana quea mete nee nee poanaje. Poquinaje. Eya jea canaꞌyonaje: —Paboja esohui Jesosa Quitojo eꞌe nei nei —jamaya huohuime ajjima ecuea epeejjija quea meteja jjejojo. Eya nahue jjima onajaya. Eya Eyacuiñajji nijje miminaje ona cuanajo. Jamajjeya eꞌe pojjaꞌa Eyacuiñajjija oya cuana etecueajeajji pojjeama quea mete poanijo.

¹⁷Jamatii Jesosa Quito ecuea Emeshi Mese nei ca ca enijje nequiꞌyonaje. Ohuaya eya quea caꞌa po mee caꞌyonaje. Ojjaña ojaya esohui janobajjima nei huohuiañajo quea huiso cuana Jodio pojjeama shajjaꞌajja meeꞌyonaje. Pea cuana ibia jama quea mase e quecua sa poanijo, Eyacuiñajjiya eya jaahuana caꞌyonaje peaꞌai.

¹⁸Eꞌe, ojjaña ma dejja mase cuanajo ecuea Emeshi Mese neiya, Jesosa Quitohua eya jaahuana cajeꞌyo. Ohuaya eya eyahuasijje dojosohuaqui cajeꞌyo onijje baꞌeꞌyohua. Jomajo oya ojjaña huoojeaꞌyojji ca ca oe quea caꞌa nee nee. ¡Oya ojjaña dejja cuaa cabihuia tiitii cahua! ¡Jamaya capoꞌyahua! ¡Ojjaña nijje mimicue quea bihui nee ejo!

¹⁹Aquina, ojaya ehuanase Pisina peaꞌai, Onesipono, ojaya huapa pojjeama cuana peaꞌai jama huohuicue miyaya baꞌa: —¿Achajja acuae nequiana soꞌo?

²⁰Dejja Enasito bajjani nequinaje Conitojo. Topimo eyaya jeanaꞌyonaje Mineto cuiñajjijo emano jaa.

²¹¡Poecuajicue e que, eeno po jjimahuajo! Dejja Eomono bajjani, Ponete peaꞌai, Nino peaꞌai, Caonia peaꞌai, ojjaña Eyacuiñajjija epeejji cuana peaꞌaiya miya huohuiꞌajja cani jama baꞌa: —¿Achajja acuae mi ani soꞌo, de? —ojaya ebajji nequiana.

²²¡Emeshi Mese neiya Jesosa Quitohua miya quea jaꞌa capo mee cahua! ¡Ohuaya ojjaña miquianaya cajaahuana cahua quea pame nee! ¡Jamaya capoꞌyahua! Mahuiso. Eyaya Pabohua esohui tehueꞌyonaje. Apoa.