Read Ese Ejja Filemón 1 Bible Online

Filemón 1 - Ese Ejja bible

Filemón 1

¹Ecuea epeejji Pinemo, eyaya Pabohua jiquio esohui mi que tehueaña. Eyaya Jesosa Quitoja esohui huohuiañajo, dejja mase cuaa eya iñaꞌyo majje jeanobia caꞌyonaje. Esejaya epeejji Timoteo enijje nequi. Pinemo, ecuaaya miya quea jea nee aña. Miyaya eya chaco meesahuaña.

²Jamajjeya jiquio pea ecuaaya esohui etehueꞌyo huoojeaje Jesosaja epeejji cuana huasijje, ma miquea equi yasijje ojee dobiquiani Jesosa Quito bihuiaa. Esejaya epeejji epona Apia bajjani que tehueaña peaꞌai. Oya esejaya jjoꞌi jayojjaya. Dejja Aquipo bajjani que tehueaña peaꞌai, ma ese nijje chacochaconaje Jesosa Quitojo.

³Eyacuiñajji esejaya Chii ai poani. Jesosa Quito esejaya Emeshi Mese nei poani. ¡Ohuaya miquianaya cajaahuana cahua! Miquianaya ojaya epeejji cuana poanijo, ¡quea bei nee capo mee cahua peaꞌai! Pabo Pinemojo quea bihui nee poani

⁴Pinemo, eya Eyacuiñajji nijje mimianijo oya bihuiaña miya quea pame poanijojo.

⁵Eꞌe, pea dejja cuaa huohui cani jama baꞌa: —Pinemohua ojjaña Jesosaja epeejji cuana quea jea nee acani, Jesosa Quitoja esohui jayojja jama po tiitiiani peaꞌai.

⁶Jamajjeya eya Eyacuiñajji nijje mimiani mijo jama baꞌa: —Eyacuiñajji, ¡Pinemo Jesosaja epeejji cuana nijje jjapeequi meesahuacue quea jaꞌa nee! Jamajjeya Jesosaja epeejji ojaya esohui jayojja jama poajeꞌyo Pinemo nijje. Eꞌe Eyacuiñajji, ecuanaja echaco quea pame nee Jesosa Quitojo. Jamajjeya ¡miyaya Pinemo ojjaña onijje jjachichaquiani peaꞌai jjabahuejja meequisahuacue joya miya o asahuanajejo quea pame nee! —jamaya eya mimiani Eyacuiñajji nijje mijo, Pinemo.

⁷Eꞌe Pinemo, miyaya ojjaña Jesosaja epeejji cuana quea jea nee aña. Miquea echacojji quea pame neejo pea epeejji cuana quea bihui nee poanaje. Jamajjeya eya quea bihui nee poani mijo. Pabohua Onesimojo tehue canaje

⁸Jamajoya Pinemo, eya Jesosaja epeejji jaahuanijji etiiya jjejojo beshahua nei miya tehuenaje jama baꞌa: “Onesimo miquea equi yasijje poquiꞌyajo ¡aꞌa oe cuiajjequiꞌyojji; jaꞌajjequi oꞌoyacue!”

⁹Chojja, ecuea jama tehuemeꞌyajji pojjeama mi que; eya miquea quea jea neejo ecuea etehueꞌyo jayojja jamaya miyaya ajeꞌyo. Eꞌe eya, Pabo etii. Eya Jesosa Quitoja huoojeaꞌyo ojaya esohui huohuiya. Jjeya eya ejeanobia ani; dejja mase cuaa eya iñaꞌyo majje jeanobiajea caꞌyonaje Jesosaja esohui huohui mee ajjaa jjejojo.

¹⁰Pinemo, eyaya mi que tehueaña Onesimojo. Ecuea esohui shajjaꞌajja majje Onesimo Jesosa Quito nijje jjapeequiꞌyonaje. Jamajjeya oya ecuea ebacua ejja jayojja jama poanaje. Jamaya oya poanaje eya jiquiojo Shoma cuiñajjijo emeꞌ jeyoꞌyo anijo.

¹¹Yahuajo minijje nequiya Onesimohua quea tai aca poa. Jjeya ca quea tai pojjeamaꞌyo. Quea pame nee ejo chaco caꞌyani. Mijo chaco caje oꞌoya peaꞌai; jjeya ca ca quea pame nee chaco cajeꞌyo, Onesimohua.

¹²Ecuea Onesimo quea jea nee nee poani; jamatii eyaya oya huoojeaje oꞌoya mi que minijje ebaꞌe oꞌoyajji.

¹³Eꞌe pojjaꞌa miyaya oya huoojeaje oꞌoya e que enijje ebaꞌeꞌyojji. Jamajjeya eya quea bihui nee poajeꞌyo. Jamajjeya aje mo oe jama jjashahuabaquimeya poani. Eya jiquiojo nequi emeꞌ jeyoꞌyo, Jesosa Quitoja esohui huohuijji poani jojoya. Miya e baꞌe meesahua sa poanijo ¡Onesimo, miquea echacojji yacua huoojeaꞌyocue e baꞌe meesahuaa!

¹⁴Miquea echacojji ecuea enahuejji pojjeama. Chojja, miquea ejjashahuabaquiꞌyojji jayojja jama a sa ca ca iña poani. Eya ca ca iña mi huoojeajji pojjeama ca Onesimo enijje eꞌani meejji, e baꞌe meesahuajji. ¡Miquea ejjashahuabaquiꞌyojji jayojja jama miyaya quea bihui nee aꞌyocue ejo!

¹⁵Yahuajo oya minijje chacochaco maja sa po ajja jjejojo quehua poquia poa. Jjeya ca ca oya miyaya jaahuana tiitiijeꞌyo.

¹⁶Oya ca ca minijje chacochaco nequinaje sosemaꞌ. Jjeya ca ca oya Jesosaja epeejji poanijo miquea mique chahua jayojja jama poꞌyonaje peaꞌai. Eꞌe, oya eseja chahua jayojja jama poani Jesosa Quito nijje jjapeequianijo. Esejaya oya quea jea nee nee poani. Eꞌe de, ecuea oya quea jea nee nee. Jjeya oya Jesosa Quitoja epeejji; miquea echacojji peaꞌai. Jamajjeya ¡miyaya oya quea jea nee nee acue!

¹⁷Jamajjeya ¡ecuea etehueꞌyojo jjashahuabaquicue! Pinemo, ¡eya miquea epeejji poanijo, Onesimo baꞌe mee oꞌoyacue minijje! ¡Bacue! Eya mi que poquiajo, miya quea bihui nee poajeꞌyo. ¡Jamaya oe pocue Onesimo mi que poquiꞌyajo!

¹⁸¿Aꞌa yahuajo ohuaya miquea aquiana sii ca poa? ¿Aꞌa ma aquiana quea sose huiso nee nee? ¡Aꞌa Onesimo sosequia meejji! ¡Eyaya oe casosequiaꞌyahua!

¹⁹Jamajjeya eyaya esohui tehueaña ecuea emeya jama baꞌa: Pinemo, eyaya Pabohua miya sosequiajeꞌyo ma Onesimohua sii ca poa. Jamatii ¡jjashahuabaquicue! Miya Jesosa Quitoja epeejji poanaje eya huohuije shajjaꞌajja majje. ¿Ache sose huiso acuae ecuea esohui miyaya shajjaꞌajjanaje Jesosa Quitojo? ¿Aꞌa quea huiso nee nee?

²⁰Eꞌe Pinemo, miya ecue chahua jayojja jama poani. Jamajjeya eseya Jesosa Quito nijje jjapeequianijo, ¡che iña quea quijijji jaji nee po meeꞌyocue! ¡Onesimo mi que poquiꞌyajo, jaꞌajjequiꞌyo majje jjequidobiaꞌyocue!

²¹Jiquio eyaya esohui tehueaña mi que; ecuea eba miya; ecuea esohui jayojja miyaya ajeꞌyo eꞌe nei, quea pame nee nee ajeꞌyo tii peaꞌai.

²²¡Pea ecuea esohui jayojja jama aꞌyocue! ¡Equi equecuayijji cuiashabacue e aniñajjiya! Poejeya pojjaꞌa mo mi que. Miquianaya Eyacuiñajji nijje mimi huichaꞌahuichaꞌa ani jama baꞌa: —¡Eyacuiñajji, miyaya dejja mase cuana Pabo pichojea meeꞌyocue oe, equi ejjajeanobiaquijjijo ani! —miquianaya poanaje. Jamajjeya eya jjashahuabaquiani jiquio jama baꞌa: —Eꞌe, Eyacuiñajjiya eya poqui meesahua caje mi que. Joya ecua miya mimiani jamaya Eyacuiñajjiya acajeꞌyo —jamaya eya jjashahuabaquiani. Pea esohui quea bihui nee epo meejji

²³Dejja Epapasi bajjani Jesosa Quitoja esohui huohuijji poani jojoya, dejja maseya oya iña majje jeanobiajea caꞌyonaje peaꞌai. Ohuaya eya huohuiꞌajja mee cani jama baꞌa: —Pinemo, ¿achajja acuae mi ani soꞌo, de?

²⁴Pea ecuea epeejji cuana enijjeya Jesosa Quitojo chacochacoani. Ohuaya eya huohuiꞌajja mee cani jama baꞌa: —Pinemo, ¿achajja acuae mi ani soꞌo? —yohua cuana baꞌa: Macoso, Anitaco, Demasi, Noca peaꞌai. Mahuisohuaya mi huohuiꞌajja mee cani.

²⁵Esejaya Emeshi Mese oe nei, Jesosa Quitohua ¡miquianaya cajaahuana cahua quea pame nee! Mahuisoya Pinemo, apoa. Eyaya Pabohua esohui tehuejeyonaje.