Read Ese Ejja Hebreos 10 Bible Online

Hebreos 10 - Ese Ejja bible

Hebreos 10

¹Jodio Eyacuiñajji nijje mimiani cuaa Moisesija etehueꞌyo jayojja jama amajamaja caninaje. Onajaya ba jjima pishana ma Eyacuiñajjiya quijje eseya quea pame nee nee acajeꞌyo. Onajaya quea jaꞌa pojjeama. Eyacuiñajji nijje mimiani cuaa quea huiso aquiana biajje enaꞌ jeasijijea cajje Eyacuiñajjiya ma aquiana cuana ba ca poa quea boejea jayojja. Ojjaña shequiajajo ijjiacajji ehuoneꞌ quecua majamaja majje jama poaninaje baꞌa: —Eyacuiñajji, ¡miquea epeejji cuanaja mimishi cuijeaꞌyocue ojjaña! —acaninaje Jodio cuaa. Jamatii Eyacuiñajjiya etiiquianaja mimishi cuijea neineiꞌyo jjima aquiana ehuoneꞌ cuia caꞌyajo.

²Jamajjeya aquiana ehuoneꞌ cuia caꞌyajo etiiquiana quea boejea nee nee epo mee jojjemo aquiana cuia majamaja jjima aca quiaye. Eꞌe, oya cuana quea boejea nee nee epo mee jojjemo mimishijo yenoꞌama poquiaye.

³Jamatii ijjiacajji ehuoneꞌ ojjaña shequiajajo cuia majamaja caninaje. Jama poaninaje baꞌa: —Eyacuiñajji, ¡miquea epeejji cuanaja mimishi cuijeaꞌyocue! —acaninaje. Cuia majje jama po ajja poaninaje baꞌa: —Jjeya ca ca ecuanajaya mimishi chamaꞌyo poaje —ajjima acaninaje. Cho. Jama poaninaje baꞌa: —Ecuana quea mimishi, de —Jodio etiiquiana cuana poaninaje.

⁴Chojja, anaꞌai naꞌ, chivo naꞌ peaꞌai jeasijijea majje mimishi cuana ecuijeaꞌyojji pojjeama.

⁵Jamajjeya Jesosa Quitohua poe jeahuaa oja Chii jama aca poa baꞌa:“Ecue Chii, miquea epeejji cuana aquiana ehuoneꞌ nequi cuia mee sa poꞌyo ajja, miya. Aquiana ehuoneꞌ dahuajea mee sa poꞌyo ajja peaꞌai miya. Cho. Miyaya eya dejja cuana huasijje huoojeaña yamijji.

⁶Eꞌe, miquea epeejji cuaa aquiana ehuoneꞌ cuia cani mimishi cuijeaꞌyojji nisho mi quea bihui nee po meejji nisho. Ma ohua dahuajea cajoya miya quea bihui nee pojjeama poani.

⁷Jamajjeya eyaya miya jama anaje baꞌa: —Ecue Chii, eya meshi yasijje poeyanaje. Miquea ejjashahuabaquiꞌyojji jayojjaya jama eyaya ajeꞌyo. Jamaya yaya ajeꞌyo mi quea bihui nee po meejji”. Jamaya yahuajo oja Chii Eyacuiñajji Jesosa Quitohua acanaje.

⁸Eꞌe, Jesosaa oja Chii jama acanaje baꞌa:“Ecue Chii, miquea epeejji cuaa ijjiacajji ehuoneꞌ nequi cuia mee sa poꞌyo ajja, dahuajea mee sa poꞌyo ajja peaꞌai miya. Ijjiacajji ehuoneꞌ cuia cani cuaa mimishi cuijeaꞌyojji nishojo aje oe miya quea bihui nee pojjeama poani. Maya dahuajea canijo peaꞌai miya quea bihui nee pojjeama”. Jamaya acanaje Jesosaa, jamatii yahuajo Moisesija esohui etehuiꞌyo jayojja jama Jodio cuanaa aca poquianinaje, ehuoneꞌ cuia majamaja ca poquianinaje.

⁹Jamajjeya majoya Jesosaa jama acanaje baꞌa: “Ecue Chii, eyaya miquea ejjashahuabaquiꞌyojji jayojja jama ajeꞌyo mi quea bihui nee po meejji”. Jamaya acanaje. Jamajjeya Jesosa Quito poeyanajejo ca ca oe Eyacuiñajjiya eseya jama acani baꞌa: —¡Jesosa Quito jayojja jama pocue, oe! ¡Ecuea ejjashahuabaquiꞌyojji jayojja jama oe atiitiicue! Jjeya ohuaya eseya huohui maja ajja jama baꞌa: —¡Jodio etiiquiana yahuajo nei nei baꞌya poa jayojja jama acue! ¡Ehuoneꞌ cuiaꞌyo majje dahuajeaꞌyocue miquea mimishi ecuijea meeꞌyojji! —Cho. Jamaya Eyacuiñajjiya eseya amaja ajja.

¹⁰Jamajjeya Jesosa Quitohua Eyacuiñajjija ejjashahuabaquiꞌyojji jayojja jama acanaje. Manoꞌyonaje; oe manoꞌyome poanaje eseja mimishi cuijeaꞌyojji. Jamajjeya Eyacuiñajjiya eseya mimishi cuijeaꞌyo majje quea boejea po mee caꞌyani Jesosaja epeejji nei cuana.

¹¹Yahuajo nei Jodio Eyacuiñajji nijje mimiani etii ojjaña pojjajo daqui equijo chachochaconaje. Ehuoneꞌ cuia majamaja caninaje mimishi cuijea meeꞌyojji nisho. Ecuiajeaꞌyojji cuiajea caꞌyaninaje de, mimishi cuijeaꞌyo jjima poa.

¹²Jesosa Quito ca ca Eyacuiñajji nijje emimijji nei. Oya ca ca oe manoꞌyonaje; oe manoꞌyome poanaje. Aquiana ehuoneꞌ manoꞌyani jayojja jama pojjeama poanaje oya. Manoꞌyonaje mimishi cuijeaꞌyojji. Apoa. Mano becaꞌyo ajja. Eyahuasijje sohuaquiꞌyonaje. Eyacuiñajji pejjejo anioqueꞌyonaje, ebianei mijijje. Eyacuiñajji nijjeya ojjaña huoojeaꞌyojji poani oya, Jesosa.

¹³Majoya jjeya ohuaya ishoa ca ani Eyacuiñajjiya eshahua cuana, ojjaña ojaya epeejji pojjeama, shajjamaꞌ cuana peaꞌai jeabichajeaꞌyo majje quea nee nee po mee cajeꞌyo tii tii.

¹⁴Eꞌe, Jesosa acui ecueataꞌapeejo manoꞌyonaje; ojaya epeejji mimishiꞌama po mee ca poa. Jamajjeya eseya Eyacuiñajjija esohui jayojja jama ameesahua cani.

¹⁵Edojjoshahua Pameya peaꞌai eseya ba meesahua cani Eyacuiñajjija esohui ma ohua yahuajo tehue mee ca poa ojaya epeejjija ebajji. Ebionei jama poa baꞌa:

¹⁶“Quijje eyaya miquianaya esohui eyacua huohuije. Jamajjeya miquianaya jjashahuabaqui meesahuaje ecuea ejjashahuabaquijji jayojja. Ecuea esohui jayojja jama eyaya miquianaya ameesahuaje”.

¹⁷Majoya ohuaya jiquio esohui tehue mee ca poa:“Jamajjeya eyaya ojjaña cuanaja mimishi cuijea neineijeꞌyo. Majoya eya jjashahuaba majamajaqui ajja miquianaja mimishijo. Quea bei poaje”. Eyacuiñajjiya jama tehue meemeya aca poa.

¹⁸Jamajjeya Jesosa Quito esejaya mimishijo manoꞌyo majje mimishi cuijea caꞌyonaje. Apoa poanaje. Jamajjeya oya mano becaꞌyo ajja. Eꞌe, aquiana ehuoneꞌ quecua maja ajja peaꞌai, ¿ajeo equecuaꞌyojji? Jesosa mimishi cuijeaꞌyojji quea pame nee poanaje. ¡Jesosa chipi nei ejjapeequi!

¹⁹Yahuajo Jodio Eyacuiñajji nijje mimiani cuana quea mete dobiquia poa daqui equecuayijji biso nei yasijje. Dobiquia poa Eyacuiñajji nijje mimiya. Eꞌe, Jesosa Quitohua manoꞌyonaje; ojaya enaꞌ cuayaquinaje ese quea boejea po meeꞌyojji. Jamajjeya Jesosaja epeejji cuana, jjeya Eyacuiñajji nijje emimi meteꞌama nei.

²⁰Yahuajo nei Eyacuiñajji nijje emimijji etii oe nei daqui esecuejje equecuayijji biso nei yasijje dobiquianinaje Eyacuiñajji nijje mimiya. Jjeya eseya Eyacuiñajji nijje mimiani, ojjaña. Jesosa esejo manoꞌyonaje. Jjeya oya eshe, enequi tii tii. Jamajjeya eseya mimi majamajani Eyacuiñajji nijje.

²¹Oya, Jesosa Eyacuiñajji nijje emimijji nei esejo peaꞌai. Eseya jaahuana tiitii cani, ojaya epeejji nei.

²²Jamajjeya eseya ojaya epeejji eꞌe jojo nei poanijo Eyacuiñajji nijje emimi. Eꞌe jojo nei emimi tii tii onijje. ¡Aꞌa jama pojji baꞌa: —¡Dee! Eya quea mimishi Eyacuiñajji nijje emimijji —aꞌa jamaya pojji! Cho, esejaya mimishi cuana cuijea caꞌyonajejo eseya quea boejea neeꞌyo.

²³Eyacuiñajjiya ojaya esohui jayojja jama acajeꞌyo. Siajje po ajja oya. Eꞌe jojo nei eseya baꞌe tiitii mee cajeꞌyo onijje eyajo. Jamaya esejaya eba. Jamajjeya ¡ejjapeequi onijje nei!

²⁴¡Jesosaja epeejji cuana quea jea nee ejjaꞌaqui! Eꞌe, ¡ejjashahuabaqui pea epeejji cuanajo, o baꞌe meesahuajji, Jesosajo echaco sahuajji peaꞌai!

²⁵Beca epeejji cuana aje oe jjachicha pajeaquinaje; ojee Eyacuiñajji bihuia ajja poꞌyonaje. ¡Aꞌa oya cuana jayojja jama pojji! ¡Ojee ejjachichaqui! Jesosaja epeejji cuana nijje emimi jama baꞌa: —¡Quea bihui pocue! ¡Jesosa nijje jjapeequicue ecuana nijje! —ejjaꞌaqui. Eꞌe, Jesosa Quito esejaya Emeshi Mese nei poejeꞌyo. Jamajjeya oe jamaya epo tiitii. ¡Jesosa Quito aꞌa cajaa ajji!

²⁶Beca cuana aje oe Eyacuiñajjija esohui eꞌe nei ba majje jamatii quea mimishi po tiitii sa poani. Jamajjeya ojaya mimishi ecuijeaꞌyojji pojjeama. Eꞌe, Jesosa ca ca oe mimishi cuijeaꞌyojji. Pea chamaꞌ.

²⁷Jamajjeya Eyacuiñajjiya ojjaña shajjamaꞌ cuana jeajea cajeꞌyo cuaqui yasijje onijje mi jjapeequiꞌyajo. Quea nee nee po tiitii mee cajeꞌyo.

²⁸Yahuajo nei Jodio etiiquiaa Moisesija etehueꞌyo jayojja jama mi atiitii cajo, cuiajea caꞌyaninaje, dejja etii cuaa. Beca dejja cuaa oya jayojja huohuime acajoya jama baꞌa: “Oya ca ca oma shajjamaꞌ, Moisesija esohui jayojja jama a sa po ajja. ¡Cacuiajea caꞌyahua cuaa ca oma!” jama huohuime acajoya cuiajea caꞌyaninaje dejja etiiya. Chamaꞌyo tii acaꞌyaninaje cuana.

²⁹Oya jayojjaya jjeya beca cuana Eyacuiñajjija Bacua Ejjajo, Jesosajo mimipanajeapanajeani. Cajaa acani quea mimishi nee neeya jjejojo. Eyacuiñajjiya esohui quea pame nee ojjaña ba mee canaje jama baꞌa: —Jesosa manoꞌyonaje miquianajaya mimishi cuijeaꞌyojji —jamaya ba mee canaje. Jamatii beca cuana siajje poani jama baꞌa: —Jesosa dejja mimishi jayojja jama manoꞌyonaje, jamatii. Edojjoshahua Pameya ojjaña quea pame jaahuana sa acani. Jamatii beca cuana Edojjoshahua Pame shajjaꞌajja sa poꞌyo ajja. Cajaa acani. Oya cuana quea tai nee nee poani. Jamajjeya oya cuana quea nee nee po mee cajeꞌyo tii tii Eyacuiñajjiya. Yahuajo nei Moisesija etehueꞌyojo shajjamaꞌ poanijo ca ca quea tai pishana. Jamatii quecuajea caꞌyaninaje cuaa.

³⁰Eꞌe, esejaya eba Eyacuiñajjiya yahuajo tehue mee ca poa jama baꞌa:“Eyaya eyaye nei dejja mimishi quea nee nee po meejeꞌyo. Ojjaña joya pea cuana quea nee poani eyaya quea nee nee po meejeꞌyo”. Jamaya Eyacuiñajji poa peaꞌai baꞌa: “Ecuea epeejji quea mimishi poajo, eyaya oya cuana ejjabahuejjaquijji quea nee po meeje”. Jamaya Eyacuiñajji poa peaꞌai.

³¹Jamajjeya ¡quea mete nee nee capoahua ojjaña joya Jesosa Quito cajaa ajji poani, de! Eyacuiñajjiya oya cuana quea nee nee po mee cajeꞌyo. Oya ca ca oe nei eshe nequi tii tii, quea caꞌa nee nee. Jesosa nijje jjapeequi majje ¡quea jaꞌa nee po tiitiicue!

³²Ecuea epeejji cuana, ¡jjashahuabaquicue! Yahuajo Jesosa nijje jjapeequi jeahuajo miquianaya ojaya epeejji quea jaꞌa nee poanaje. Eꞌe, Eyacuiñajjija esohui shajjaꞌajja majje miquianaya onijje jjapeequinaje. Edojjoshahua Pame miquiana que dobiquinaje peaꞌai. Jamajjeya Jesosaja epeejji pojjeama cuaa miquianaya napa canaje quea huiso. Miquianaya quea nee poanaje. Jamatii Jesosa nijje jjapeequi pajea ajja poanaje, jjapee neineiquinaje.

³³Eꞌe, Jesosaja epeejji pojjeama miquiana nijje mimijajinaje quea huiso ojjañaja eshajjaꞌajjajji. Miquianaya napa canaje peaꞌai. Quea nee po mee canaje. Jamatii miquianaya meteꞌama poanaje. Onaa Jesosaja epeejji napa canijo, miquianaya onijje jjapeequinaje, Jesosaja epeejji cuana nijje.

³⁴Ejeanobia jaa huasijje peaꞌai miquianaya poquinaje meteꞌama Jesosaja epeejji cuana baa, ona bobiaa. Miquianaya ejeanobia jaajo aquiana siijea caꞌyonaje cuaa. Jamatii miquianaya yenoꞌama poanaje. Quea bihui miminaje jama baꞌa: —Ecuanaya Jesosaja epeejji poanijo ohuaya ecuana quea pame nee nee acajeꞌyo quijje. Ecuanaya baꞌe tiitii mee cajeꞌyo onijje eyajo —poanaje miquianaya.

³⁵Jamajjeya ¡aꞌa jja oe Jesosa nijje jjapeepajeaquiꞌyojji! Onijje jjapee neineiquianijo, ohuaya miya quea pame nee acajeꞌyo. Eyajo miya quea huiso sosequia cajeꞌyo peaꞌai.

³⁶Eꞌe, ¡quea bihui nee atiitiicue Eyacuiñajjija esohui jama! ¡Aꞌa hueahueajji! Jamaya miquiaaya atiitiiyajo, ohuaya miquianaya quea pame nee nee acajeꞌyo. Ojaya esohui yahuajo ohua huohui ca poa jamaya ohuaya acajeꞌyo. Miquianaya baꞌe tiitii mee cajeꞌyo onijje eyajo.

³⁷Eꞌe, Eyacuiñajjija esohui yahuajo nei etehuiꞌyo jama poa baꞌa:“¡Ishoa socue ojaya epoejji! Jjeya nei pojjaꞌa oya poejeꞌyo, quijje nei pojjeama.

³⁸Ojjaña joya enijje jjapee tiitiiquiani eyaya baña mimishiꞌama, quea boejeaꞌyo. Enijje jjapeepajeaquiajo ca ca ecuea botiꞌama; quea nee po meejeꞌyo”. Jamaya esohui etehuiꞌyo poa.

³⁹Ecuanaya ca ca jamaya pojjeama. Jesosa nijje jjapeepajeaquiꞌyo ajja tii. Jamajjeya Eyacuiñajjiya ecuana quea nee nee epo meeꞌyojji pojjeama. Cho. Ecuana Jesosa nijje jjapee tiitiiquianijo ohuaya baꞌe tiitii mee cajeꞌyo onijje eyajo.