Read Ese Ejja Hebreos 4 Bible Online

Hebreos 4 - Ese Ejja bible

Hebreos 4

¹Jamajjeya Eyacuiñajjiya yahuajo nei etiiquiana huohui ca poa jayojja jama ohuaya jjeya eseya huohui cani jama baꞌa: —¡E que poeꞌyocue ejomishocajji, quea jjashahuabaqui bei nee nee epoꞌyojji! —oya poani. Jamajjeya ¡quea jaꞌa jjashahuabaquicue! ¡Pea cuana quea jaꞌa jjashahuabaqui meesahuacue! ¡Ojee Jesosaja epeejji nei pocue! Jamajjeya Eyacuiñajjiya eseya o jayojjaya jomishoca mee cajeꞌyo, ojjaña.

²Eꞌe, yahuajo nei Eyacuiñajjiya esejaya etiiquiana cuana huohui ca poa esohui quea pame nee nee. Jjeya eseyaya jiquio esohui quea pame nee shajjaꞌajjaña peaꞌai, etiiquiaa jayojjaya. Etiiquiaa cuaa jiquio esohui shajjaꞌajja nisho ca poa. Shajjamaꞌ poaa jjejojo eshajjaꞌajjajeajji shajjaꞌajjajea caꞌya poa. Jamajjeya Eyacuiñajjiya oya cuana jomishoca mee jjima aca poa, etiiquiana cuana.

³Eseyaya jjeya Eyacuiñajjija esohui quea pame nee eꞌe jojo nei shajjaꞌajjaña. Ojaya esohui jayojja jama añajo, onijje jomishoca mee cajeꞌyo, eseya. Eꞌe, etiiquiana aje jja oe shajjamaꞌ poajojo Eyacuiñajjiya tecuea ca poa jama baꞌa:“Jamajjeya quea quene po majje eyaya oya cuana tecueajeanaje jama baꞌa: —Shajjamaꞌ poanijo eꞌe jojo nei miquianaya edobiquijji pojjeama ecue meshi quea pame yasijje quea jaji nee ejomishocajji”. Jamaya Eyacuiñajjiya aca poa. Yahuajo ojjaña cuana panajeyo majje Eyacuiñajji jomishoca poa. Apoa ojjaña amajje Eyacuiñajji jomishoca poa. Jamatii etiiquiana shajjamaꞌ cuana tecuea ca poa jama baꞌa:“Oya cuana aje oe edobiquijji pojjeama ecuea meshi quea pame yasijje quea jaji nee ejomishocajji”. Jamaya Eyacuiñajji poa.

⁴Eꞌe jojo nei pea esohui yahuajo nei etehueꞌyo jama poa baꞌa:“Eyacuiñajjiya ojjaña panajeyo ca poa quea cahui huisojo, me oejje oe, 6 cahuime. Majoya ojjaña apoa amajje oya jomisho ca poa cahui oe”.

⁵Eꞌe, etiiquianajo aje oe jama tehueme ya peaꞌai poa baꞌa: “Oya cuana aje oe dobiqui jjima poaje enijje jomishocaa”.

⁶Jamajjeya etiiquiana cuana yahuajo nei baꞌe yasijje ebionei Eyacuiñajjiya oja esohui quea pame nee huohui ca poa. Shajjamaꞌ poa jjejojo dobiqui jjima poa Eyacuiñajjija meshi quea pame yasijje onijje jomishocaa. Pea cuana ca ca Eyacuiñajji que dobiquije jomishocaa.

⁷Jamajjeya etiiquiana cuana Moisesi nijje nequi jjashajjaꞌajjaqui ajjajojo jomishoca mee jjima aca poa. Jamajjeya Eyacuiñajjiya quijje nei Dabi tehue mee ca poa jama baꞌa etiiquianaja osecua cuana huasijje: “¡Jjeya nei jjashajjaꞌajjaquicue!” Jamaya Eyacuiñajji poanaje esejaya etiiquiana nijje, ma Dabi nijje nequi nijje. Jamajoya eyaya Dabija etehueꞌyo huohuije oꞌoya jama baꞌa:“Jjeya nei Eyacuiñajji minijje mimianijo ¡ojaya esohui shajjaꞌajja neineicue! ¡Aꞌa shajjamaꞌ pojji!” Jamaya yahuajo nei Dabiya tehue ca poa etiiquianaja onijje baꞌeja ebajji.

⁸Eꞌe, Eyacuiñajjiya Josoe etiiquiana cuana ojaya meshi quea pame yasijje poqui meesahua ca poa. Jamatii jomishoca jjima poa; quea jjashahuabaqui jaꞌa po jjima. Jamajjeya esejaya eba Eyacuiñajji jjashahuabaquiani jama baꞌa: —Quijje eyaya ojjaña ecuea epeejji nei cuana jomishoca meejeꞌyo —Eyacuiñajji poani.

⁹Eꞌe, quijje Eyacuiñajjiya ojjaña ojaya epeejji cuana jomishoca tiitii mee cajeꞌyo onijje. Yahuajo nei ohuaya me oejje oe, 6 cahuime ojjaña panajeyo ca poa. Panajeyo majje jomisho ca poa oe cahuime. O jayojjaya Eyacuiñajjiya ojaya epeejji nei cuana jomishoca mee cajeꞌyo.

¹⁰Jamajjeya Eyacuiñajjiya me oejje oe cahuime chaco majje chaco pajea ca poa; o jomishoca poa jayojjaya eseya Jesosa nijje jjapeequi majje quea bei jjashahuabaquiani. Quijje chacochaco pajeajeꞌyo, jomishoca tiitiijeꞌyo onijje eyajo.

¹¹Jamajjeya ¡jjashajjaꞌajjaquicue oe! ¡Quea jaꞌa nei jjashahuabaquicue Jesosaja epeejji nei epojji, eꞌe jojo nei onijje ejomishoca tiitiiꞌyojji! ¡Aꞌa oe esejaya etiiquiana jama pojji! Shajjamaꞌ poani Eyacuiñajji nijje ejomishocajji pojjeama. Cajaa mi acajeꞌyo.

¹²Eꞌe, Jesosa nijje jjapeequianijo oya ese nijje mimiani, o jayojja ameesahua cani. Ojaya esohui jayojja jama ohuaya eseya eꞌe jojo nei ameesahua cajeꞌyo. Eꞌe, ojaya esohui baa se beca jama. Jiquio ecua baaa shejjishejjiya jehuijaꞌajea majje esaꞌ ba cani jama jayojjaya Eyacuiñajjiya esejaya ejjashahuabaquiꞌyojji cuana ba cani. Eꞌe, Eyacuiñajjija esohui ba neinei majje eseya jjashahuabaquije esejaya ebaꞌejjijo quea jaꞌa pojjaꞌa, quea mimishi pojjaꞌa poani.

¹³Eꞌe jojo nei ojjaña Eyacuiñajjija eba oja panaꞌyo. Chamaꞌ Eyacuiñajjijo ejjanequi quehuaquijji, de. Jamajjeya quijje nei o cojja nei nequi majje eseyaya huohuijeꞌyo quio eseya eshe nequiya anequinaje cuana. Jesosa esejo Eyacuiñajji nijje mimianijo ¡quea jaꞌa nee jjapeequicue!

¹⁴Jamajjeya ¡Jesosa nijje jjapeequicue! Jesosa ca ca oe nei Eyacuiñajji nijje mimi neineiani; oya Eyacuiñajji nijje emimijji etii quea pame nee nee. Oya Eyacuiñajjija Ebacua Ejja oe nei. Eyahuasijje poquiꞌyonaje. Oja Chii pejjejo nequi, Eyacuiñajji pejjejo. Onijje mimiani esejo. Jamajjeya ¡Jesosa nijje eꞌe nei jjapeequicue!

¹⁵Eꞌe, Jesosa Eyacuiñajji nijje mimi neineiani esejo. Oya ese jayojjaya quea nee poanaje. Jamajjeya: —Jesosa, eya quea nee, quea yeno nee ani —eseya poani. Eseya Jesosa nijje jamaya mimiajo, ohuaya eseya sajaꞌa cani jama baꞌa: —Eꞌe, ecuea eba. Eya quea nee nee, quea yeno nee nee peaꞌai poanaje. Jamajjeya eyaya miya jaahuanaje —jamaya Jesosaa eseya acani. Satanasaa Jesosa quea mimishi po mee sa aca poa. Jamatii jjadasia meequi ajja poa. Jesosa ca ca oe quea mimishi po ajja nei nei poa. Jamajjeya eseya quea mimishi poajo, ohuaya, Jesosaa eseya jaahuana cani tecueꞌamaa jjejojo.

¹⁶Jamajjeya ¡Jesosa nijje bichoꞌama emimi! Ohuaya esejaya mimishi cuana cuijea cajeꞌyo. Eseya ojaya quea jea nee poanijo quea pame nee jaahuana cajeꞌyo tii tii. Caꞌaꞌama poajo quea caꞌa po mee cajeꞌyo peaꞌai.