Read Ese Ejja Hebreos 8 Bible Online

Hebreos 8 - Ese Ejja bible

Hebreos 8

¹Jamajjeya ¡jjashahuabaquicue Jesosa Quitojo! Oya Eyacuiñajji nei nei. Eyajo nequi tiitiiani esejo Eyacuiñajji nijje mimiani tii tii. Eyacuiñajji quea caꞌa nee nee pejjejo nequi, ebianei mijijje; onijje ojjaña huoojeajji poani tii tii.

²Jama baꞌa: Yahuajo nei Jodio Eyacuiñajji nijje emimijji etii daqui equi dojjo huasijje, equecuayijji biso nei yasijje dobiquiꞌya poa Eyacuiñajji nijje mimiya, Jodio cuana nijje Eyacuiñajji quea bei epojji. Ma daqui equi Jodio cuanaja soco poa Eyacuiñajjija esohui shajjaꞌajjajji. Jesosa ca ca dobiquiꞌyonaje Eyacuiñajji eꞌanioque ani yasijje tii, daqui equi dejjaja soco huasijje pojjeama. Jomajo oya Eyacuiñajji nijje mimiani esejo.

³Jiquio Jodio cuana Eyacuiñajji nijje emimijji etii cuana babaca majje jama poa baꞌa: —¡Miyaya aquiana dahuacue ijjiacajji ehuoneꞌ peaꞌai; Eyacuiñajji ecuana nijje quea bei po meecue! —aca poa Jodio cuaa. Jamaya ona jayojjaya esejaya Eyacuiñajji nijje emimijji neiya, Jesosaa Eyacuiñajji quea bei po mee canaje ese nijje. Esejaya mimishi cuana cuijea meeꞌyojji sosejje oya manoꞌyonaje.

⁴Jesosa meshijo enequi jojjemo oya Eyacuiñajji nijje emimijji etii pojjeama pome. Eꞌe, Jodioja Eyacuiñajji nijje emimijji etii cuana meshijo yania poa, Nemija osecua cuana. Moisesija etehueꞌyo jayojja jama aquiana dahua ca poquianinaje Eyacuiñajji quea bei po meejji.

⁵Jamaya yahuajo poa baꞌa: Moisesi eyiyo huasijje jaasohuaquiajo, Eyacuiñajjiya oya huohui ca poa daqui equijo. Jama aca poa baꞌa: “¡Ecuea esohui jayojjaya nei nei daqui equi acue! ¡Quea bame nee nee oe acue!” ca poa Eyacuiñajjiya. Jamatii daqui equi iya mee ca poa ona ba meejji ma ohua quijje Jesosaa acajeꞌyo eyajo. Jamajjeya Jodio cuanaja emimijji Eyacuiñajji nijje quea pame pishana poa. Jesosa ca ca quea pame nee nee. Jamaya peaꞌai Eyacuiñajjiya yahuajo nei ojaya esohui huohui ca poa Moisesija etehueꞌyojji. Ma esohui etehueꞌyo quea pame poa. Quijje ca ca Eyacuiñajjiya esohui eyacua Jesosa huohui mee ca poa. Maya esohui quea pame nee nee. Eꞌe, esohui ma ohua jjeya huohui ca poa jayojja jama eseya añajo, Jesosaa eseya baꞌe tiitii mee cajeꞌyo onijje eyajo. Jamaya esejaya eba. Jamajjeya eseya quea jaji nee poani. Yahuajo Jodio cuana quea jaji pishana poa: Onajaya ba jjima poa Jesosaja esohui ebaꞌe tiitiiꞌyojji onijje eyajo.

⁷Eꞌe, yahuajo nei Eyacuiñajjiya Jodio cuana Moisesi nijje nequi ba mee ca poa ojaya esohui. Jamatii ma esohui jayojja ohuaya acani mimishi pajeaꞌyo jjima poa cuanaja. Ma esohui jayojja jama baꞌyanijo mimishi cuijeaꞌyojji jojjemo Eyacuiñajjija Jesosa huoojea jjima poquiaye esohui eyacua huohuiya.

⁸Jamajjeya Eyacuiñajjiya ojaya epeejji cuana tecuea ca poa. Jama tecueame aca poa baꞌa:“Quijje eyaya esohui eyacua huohuije ojjaña Jodio cuanaja eshajjaꞌajjajji, ma Isaenija osecua cuanaja, Jodaja osecua cuanaja peaꞌai eshajjaꞌajjajji.

⁹Yahuajo nei eyaya miquianajaya etiiquiana Ejito meshijo baꞌe pea meshi yasijje dojo meesahuanaje. Ecuea esohui quea pame nee huohui huichaꞌa huichaꞌa meenaje peaꞌai. Jamatii etiiquiana cuana shajjamaꞌ poa. Ecuea esohui jayojja jama a sa poꞌyo ajja poa. Jamajjeya eyaya oya cuana jaahuana jjima a poa. Jamajoya eyaya pea esohui quea pame nee ajeꞌyo miquiana nijje. Jiquio esohui eyacua poaje, yahuajo jama pojjeama poaje. Eyaya jamaya huohuiaña”. Jamaya Eyacuiñajji poanaje.

¹⁰“Quijje eyaya Isaenija osecua cuana esohui eyacua huohuije jama baꞌa: Jamajjeya miquianaya jjashahuabaqui meesahuaje ecuea ejjashahuabaquijji jayojja. Ecuea esohui jayojja jama eyaya miquianaya ameesahuaje: —Eyacuiñajjiya ecuana jaahuana cani —miquianaaya aje. Eyaya miquianaya sajaꞌajeꞌyo: —Miquianaya cuana ecuea epeejji nei eꞌe jojo nei —eyaya ajeꞌyo.

¹¹Miquianaya enijje jjapeequijeꞌyo ojjaña, edejja tii cuana, eshoꞌiquiana peaꞌai. Jamajjeya pea nijje jama epo majajji pojjeama baꞌa: —¡Eyacuiñajji nijje oe jjapeequicue! —eꞌa majajji pojjeama cuana. Chojja, oya jja iña ojjañaja eba poajeꞌyo aña.

¹²Jamajjeya eyaya ojjaña cuanaja mimishi cuijea neineijeꞌyo. Majoya eya jjashahuaba majaqui ajja miquianaja mimishijo. Quea bei poaje. Jamaya eyaya Isaenija osecua cuana huohuije”. Jamaya Eyacuiñajji yahuajo nei nei poa Isaeni nijje.

¹³Eꞌe, jiquio ecua daqui chii chiiꞌyajo eyacua jjeshe majje daqui echii seya jeajeaña jayojja jama esohui eyacua amajje Eyacuiñajjiya esohui yahuajo nei Moisesi oja tehue meejo jjashahuaba neinei meequiꞌyo jjima aca poa: —¡Ecuea esohui eyacua jayojja jama acue; esohui yahuajo jayojja jama pojjeama! —jamaya Eyacuiñajjiya eseya huohui cani jjeya.