Read Ese Ejja Santiago 1 Bible Online

Santiago 1 - Ese Ejja bible

Santiago 1

¹Epeejji cuana, eyaya jiquio esohui quea bihui nee tehueaña miquianajaya ebajji, ma ojjaña Jesosaja epeejji cuana ojjaña meshijo baꞌeja ebajji. Eya Satiaco bajjani. Eyacuiñajjiya, esejaya Emeshi Mese nei Jesosa Quitohua peaꞌaiya eya huoojea canaje ojaya esohui huohuiya. Jamajjeya eyaya quea bihui nee chacoaña onijje. Eyacuiñajjiya Jesosaja epeejji cuana jjabahuejja meequi cani

²Ecuea epeejji cuana, ¡shajjaꞌajjacue mo! Miquianajaya ebaꞌejji quea camaja poanijo, jamatii ¡aꞌa quea yeno pojji! Chojja, quea bihui nee pocue jama baꞌa: —Eꞌe, Eyacuiñajjiya quea pame nee acani. Ohuaya eya jjashahuabaqui mee cani.

³Eꞌe, miquianajaya eba jama baꞌa: Ebaꞌejji quea camaja poanijo Eyacuiñajjiya eseya jjashahuabaqui mee cani Jesosa Quito nijje quea pame nee ejjapeequijji. Jamajjeya miquianaya yenoꞌama Jesosa nijje jjapee tiitiiquijeꞌyo quea jaꞌa nee nee.

⁴¡Jesosaja epeejji quea jaꞌa nee po tiitiicue! ¡Eꞌe jojo nei pocue! Jamajjeya Jesosajo jjashahuaba tiitiiquianijo Eyacuiñajjiya miquianaya quea jaꞌa nee baꞌe mee caje mimishiꞌama, apoa epo jayojja peaꞌai.

⁵Eꞌe pojjaꞌa miquianajaya ba jjima Eyacuiñajjijo ebaꞌejji. Jamajjeya ¡Eyacuiñajji nijje mimicue ojaya ejjashahuabaquiꞌyojji ebajji! Ojaya miya etecueajji pojjeama. Miya quea jjashahuabaqui jaꞌa po mee caje, o jayojjaya. Joya ecua miyaya huohuiꞌajjaña jama sajaꞌameya aje mi acajeꞌyo quea bihui nee nee ojjaña cuana ojaya quea jea nee neejo.

⁶Jamatii Eyacuiñajji nijje mimianijo ¡jjashahuabaquicue quea pame nee! Jama baꞌa: —Jiquio ecua eya onijje mimiani jamaya acajeꞌyo eꞌe jojo nei Eyacuiñajjiya. Aꞌa jjashahuaba taiquijji jama baꞌa: —Eꞌe pojjaꞌa jiquio ecua eya onijje miminaje jamaya Eyacuiñajjija eꞌajji pojjeama. ¡Bacue! Joya quea jjashahuabaqui tai poani enashajo poani jama. Jiquio ecua beniya enashajo dojo cani oe miji yasijje, quijje pea miji yasijje dojo ca oꞌoyani jamaya oya cuana Jesosajo quea jaꞌa jjashahuabaqui jjima. Peapea jjashahuabaquime oya cuana poani.

⁷Jamaya jjashahuabaquianijo quea tai; Eyacuiñajjiya oya cuana shajjaꞌajja jjima jayojja jama acaje. Jamajjeya jamaya jjashahuabaquianijo ¡aꞌa jama pojji baꞌa: —Eyacuiñajjiya ma e onijje miminaje shajjaꞌajja cani. Eya baꞌe meesahua caje peaꞌai —aꞌa jamaya eꞌa caje poso jjabaquijji! Eyacuiñajjija eshajjaꞌajjajji pojjeama miya.

⁸Eꞌe, Jesosajo quea quehua jjashahuabaqui majje quea pame ebaꞌejji pojjeama tii tii. Aemaꞌ cuana joya ecua quea aquiana huiso jama

⁹Jesosaja epeejji aemaꞌ cuana, dejja etii pojjeama peaꞌai quea bihui nee capoahua Eyacuiñajjiya oja mimishi cuana cuijea caꞌyonajejo. Oya ba cani epeejji quea aquiana huiso jayojja, oya jayojjaya ba cani.

¹⁰Jesosaja epeejji quea aquiana huiso quea bihui nee capoahua peaꞌai, jamatii ojaya aquiana cuana chamaꞌ poajo. Joya quea aquiana huiso shasha jama. Nequi tiitii ajja. Chamaꞌyo tii poajeꞌyo.

¹¹Eꞌe, jiquio ecua eshequi jaasohuajo quea quiyo nee nee poajo sipone jocaꞌyani, yaaꞌyo majje ojaya shasha jjahuaꞌamaqui yani, majoya aje huojojojeani jama jayojjaya joya aquiana huisohuiso cuana poani. Aquiana cuana chicha majamaja cani tii oya cuana manojeꞌyo, chamaꞌyo tii poajeꞌyo. Jamajjeya ojjaña Jesosaja epeejji cuana quea bihui nee capoahua Eyacuiñajjiya oya ba cani pea cuana jayojjaya. Eꞌe, aemaꞌ cuana Eyacuiñajjiya ba cani pea cuana jayojjaya, joya quea aquiana huiso nee jayojjaya. Joya quea aquiana huiso ca ca ohuaya ba cani aemaꞌ jayojjaya. Ebaꞌejji quea camaja

¹²Jesosaja epeejji quea pame nee eshahuaa iyaa cajje jjashajjaꞌajjaqui ajja poaje; quea mimishi po sa poꞌyo ajja poaje. Ohuaya Eyacuiñajjija esohui jayojja jama atiitii cani. Jamajjeya ¡oya cuana quea bihui nee nee capoahua! Eꞌe, Eyacuiñajjiya huohui ca poa jama baꞌa: —Eya ojaya quea jea nee nee poanijo, ecuea epeejji cuana ecuea esohui pajeaꞌyo ajjajo eyaya oya cuana baꞌe tiitii meejeꞌyo enijje eyajo.

¹³Mimishi amajje, quea tai jjashahuabaqui majje peaꞌai beca cuana siajje poani jama baꞌa: —Eyacuiñajjiya eya quea mimishi po mee cani —jama ohua acani posoya jjabaquiani. Chojja, de. Ma miyame tii ca mi ca quea mimishi. Eyacuiñajjiya ca ca mimishi aꞌajja nei nei. Jamajjeya ohuaya eseya quea mimishi epo meejji pojjeama nei nei.

¹⁴Ojjaña aje oe quea mimishi po sa poanijo quea mimishi poani ojaya ejjashahuabaquiꞌyojjijo. Joya ecua oya jjashahuabaquiani jama quea mimishi po meeya poani.

¹⁵Jamajjeya quea mimishi jjashahuabaqui majje mimishi acajeꞌyo. Mimishi amajje manojeꞌyo. Majoya Eyacuiñajjiya mimishi cuana quea nee nee po mee cajeꞌyo tii tii quea mimishi poanaje jojoya.

¹⁶Ecuea epeejji cuana, ¡shajjaꞌajjacue mo oe! ¡Aꞌa quea quehua jjashahuabaquijji Eyacuiñajjijo! Ohuaya ca ca oe eseya quea jaꞌa nee po meesahua cani.

¹⁷Ohuaya, eseja Chii aiya yahuajo nei nei ojjaña aquiana eyajo nequi pana ca poa: eshequi, baꞌi, majameta cuana peaꞌai pana ca poa. Oya cuana quijje quea misi poajeꞌyo. Eyacuiñajji ca ca oe, chojja. Jiquio ecua oya jjeya nei nequi jama tii tiiya nequi tiitii poquije. Ohuaya eseya quea pame nee nee acani. Jamajjeya ohuaya eseya ojjaña aquiana pame quia cani eꞌe jojo nei.

¹⁸Eꞌe, Eyacuiñajjiya ojjaña eseya babaca canaje ojaya epeejji nei epojji. Ohuaya esohui eꞌe nei huoojea canaje esejaya ebajji. Jamajjeya eseya Jesosa nijje jjapeequi meesahua cani. Eseya ca ca ojaya quea boti nee nee poani; pea aquiana cuana oja pana ojaya iye botiboti poani. ¡Eyacuiñajjija esohui shajjaꞌajjacue eꞌe jojo nei!

¹⁹Ecuea epeejji cuana, ¡shajjaꞌajjacue mo oe! ¡Ojjaña pojjajo Eyacuiñajjija esohuijo jjashajjaꞌajjaquicue! ¡Mimi jjimahuajo quea jaꞌa nee jjashahuabaquicue peaꞌai! ¡Aꞌa quea quene pojji; pea cuana nijje aꞌa quenequene cuajijji!

²⁰Quea quene poanijo Eyacuiñajjija ejjashahuabaquijji quea jaꞌa nee jayojja jama yajji pojjeama.

²¹Jamajjeya ¡aꞌa quea quene pojji! ¡Ojjaña ejjashahuabaquijji quea tai epojji, quea mimishi pajeaꞌyocue! ¡Aꞌa pea cuana jama baꞌejji! Eyacuiñajjiya eseya ojaya esohui ba meesahua cani. ¡Ojaya esohui shajjaꞌajjacue; jamaya baꞌecue quea bihui nee! Jamajjeya ohuaya eseya baꞌe tiitii mee cajeꞌyo onijje eyajo.

²²Eyacuiñajjija esohui shajjaꞌajja majje jamaya po ajjajo miquianaya quea tai jjashahuabaquiani, quea quehua poani. ¡Eyacuiñajjija esohui shajjaꞌajja majje ca oe shajjaꞌajja tiitiicueya!

²³Eꞌe, beca cuana Eyacuiñajjija esohui shajjaꞌajja majje jamatii jjashajjaꞌajjaqui ajja poani. Jiquio ecua se ecojjabajjijo jjacojjabaquiani jama poani:

²⁴Eseya ecojja ba majje poquiani. Quijje pishana seya ecojja pajeacuaji yaña: —¿Achajja shai ecuea ecojja poanaje? —se poani. Eꞌe, ecojja ba majje pajeacuaji yaña jama jayojjaya beca cuana poani. Eyacuiñajjija esohui quea pame nee shajjaꞌajja cani. Jamatii shajjaꞌajja majje pajeacuaji caꞌyani. Esohui jayojja jama baꞌe ajja.

²⁵Pea cuana ca ca esohui shajjaꞌajja majje jjashahuaba neineiquiani. Pajeapajeaꞌyo ajja poani. Jamajjeya ojjaña pojjajo esohui ba neinei cani; pajeapajeaꞌyo ajjajo ma esohui jayojja jama po tiitiiani. Eyacuiñajjiya oya cuana mimishi pajea meesahua caꞌyani. Quea jaꞌa nee nee baꞌe meesahua cani, quea bihui nee po mee cani peaꞌai joya ojaya esohui jayojja jama baꞌyanijo.

²⁶Beca cuana aje oe jjashahuabaquiani jama baꞌa: —Eya Jesosa Quitoja epeejji poani —jama posoya jjabaquiani. Jamatii quea mimishi, quea mimijjequijea mimi tiitiianijo oya cuana Jesosa Quitoja epeejji pojjeama. Chojja, epeejji nisho poani.

²⁷Eyacuiñajji esejaya Chii ai jama poanaje baꞌa: —¡Ecuea epeejji eꞌe nei cuaa eꞌe jojo nei enijje jjapeequianiya quea pame nee caꞌa cahua! Jama baꞌa: ¡Eshoꞌi echii manoꞌyo catii mee cahua quea pame nee! ¡Epona eꞌahuemano quea yeno poani cabaꞌe meesahua cahua quea pame nee peaꞌai! ¡Eshahuaja epeejji quea mimishi jayojja jama aꞌa pojji! —acanaje eseja Chii aiya.