Read Ese Ejja 1 Juan 5 Bible Online

1 Juan 5 - Ese Ejja bible

1 Juan 5

¹Ojjaña Jesosaja epeejji cuana jjashahuabaquiani jama baꞌa: —Jesosa Eyacuiñajjija huoojeaꞌyo ojjaña jaahuanajji. Eseya jamaya jjashahuabaquianijo, Eyacuiñajjiya eseya oja bacua cuana po mee cani. Ojjaña joya Eyacuiñajji, esejaya Chii nei eyajo ani quea jea nee nee ajji poani Eyacuiñajjija Bacua Ejja Jesosa quea jea nee ajji poani peaꞌai.

²Oya jayojjaya Eyacuiñajji esejaya quea jea nee neejo, ojaya esohui jayojja jama poanijo peaꞌai esejaya eba jama baꞌa: Ojjaña Jesosaja epeejji cuana, Eyacuiñajjija bacua cuana esejaya quea jea nee poani.

³Eyacuiñajji eꞌe jojo nei esejaya quea jea nee poanijo jiquio ecua ojaya esohui etehueꞌyo cuana jayojja jama poani. Ohuaya eseya jamaya ameesahua canijo, ojaya esohui cuana camajaꞌama.

⁴Eꞌe, eseya Jesosa nijje jjapeequiani. Jamajjeya eshahuaja epeejji cuana mimicuiajeanobiajeaña. Eyacuiñajjija bacua cuana poanijo eseyaya mimishi cuana mimicuiajeanobiajeaña. Mimishiꞌama baꞌe mee aña peaꞌai.

⁵Eꞌe jojo nei Jesosa Eyacuiñajjija Bacua Ejja oe nei. Jamaya jjashahuabaquianijo, onijje jjapeequianijo eseya mimishiꞌama baꞌeje. Eshahuaja epeejji cuana mimicuiajeanobiajeaña peaꞌai. Ehuohuiꞌyo Jesosa Quitojo

⁶Jesosa Quito meshi yasijje poeyajo, Huaniya oya enajo besa mee ca poa Eyacuiñajjijo. Majoya ojaya enaꞌ cuayaquiajo Jesosa manoꞌya poa eseja mimishi cuijeaꞌyojji sosejje. Jamaya Edojjoshahua Pameya huohui ca poa Jesosa Quitojo. Ojaya esohui Jesosajo eꞌe nei poani. Eꞌe, Edojjoshahua Pame siajje po ajja nei nei.

⁷Eꞌe, pea beca peejjimaa eyajo nequiya jamaya huohui cani Jesosa Quitojo. Eꞌe, Echii neiya, Ebacua Ejjaa, Edojjoshahua Pameya peaꞌai, mahuisohuaya oya jayojjaya huohui cani Jesosa Eyacuiñajjija Bacua Ejja.

⁸Jiquio meshijo peaꞌai pea beca peejjimaa Jesosa Quitojo huohui cani peaꞌai. Eꞌe, Edojjoshahua Pameya jamaya huohui cani Jesosajo. Peaa Jesosa besa mee cajo Eyacuiñajjiya huohui ca poa jama baꞌa: “Jesosa ecuea Ebacua Ejja quea jea nee nee” aca poa. Jesosa manoꞌyajo ojaya enaꞌ cuayaquiꞌyonajejo peaꞌai ojjañaa jama aca poa baꞌa: “Oya Jesosa eꞌe jojo nei Eyacuiñajjija Bacua Ejja nei” poa. Mahuisohuaya oya jayojjaya Jesosa Quitojo huohui cani. Jamajjeya esejaya eba eꞌe jojo nei Jesosa Eyacuiñajjija Bacua Ejja.

⁹Eꞌe, dejja cuanaja Jesosa ba neinei jjima. Jamatii onajaya esohui eseyaya shajjaꞌajjaña. Eyacuiñajjija esohui Jesosajo ca ca eꞌe nei nei. ¡Maya oe ejjashajjaꞌajja neineiqui! Ohuaya yahuajo huohui ca poa jama baꞌa: —Jesosa ecue Bacua Ejja.

¹⁰Jamajjeya ojjaña joya jama poani baꞌa: —Jesosa Eyacuiñajjija Bacua Ejja eꞌe jojo nei —jamaya poanijo Edojjoshahua Pame ese nijje nequi. Jamaya jjashahuabaqui sa poꞌyo ajjajo ca ca siajje poani jama baꞌa: —Chojja, Jesosa Eyacuiñajjija Bacua Ejja pojjeama. Eyacuiñajjiya ecuana siajje aca poa —jama siajje pomeya poani cuana.

¹¹Eꞌe, Eyacuiñajjiya eseya huohui canaje jama baꞌa: —Eyaya ecue Ebacua Ejja Jesosa huoojeanaje miquiana baꞌe tiitii meeꞌyohua. Onijje jjapeequiajo miquianaya baꞌe tiitii meejeꞌyo eyajo onijje —Eyacuiñajji jamaya poanaje.

¹²Jamajjeya oja Bacua Ejja Jesosa nijje jjapeequiajo, Eyacuiñajjiya eseya cuana baꞌe tiitii mee cajeꞌyo onijje eyajo. Onijje jjapeequi sa poꞌyo ajjajo ca se ca Eyacuiñajjija Bacua Jesosa nijje ebaꞌe meeꞌyojji pojjeama eyajo; quea nee nee poajeꞌyo tii tii. Ebaꞌejji quea pame nee eyajo

¹³Ecuea epeejji cuana, miquianaya Eyacuiñajjija Bacua Ejja Jesosa nijje eꞌe jojo nei jjapeequiani. Jamajjeya eyaya jiquio esohui tehueaña miquiana ba meejji eꞌe jojo nei onijje ebaꞌe tiitiiꞌyojji eyajo.

¹⁴Esejaya eba eꞌe jojo nei jama baꞌa: Eseyaya ojaya ejjashahuabaquijji jayojja jama añajo, Eyacuiñajji eseja Chii nei nijje mimianijo ohuaya eseya shajjaꞌajja cani.

¹⁵Eꞌe, o jayojjaya jjashahuabaquime poanijo eꞌe jojo nei Eyacuiñajjiya shajjaꞌajja caje esejaya emimi onijje. Jamajjeya esejaya emimi onijje jayojja jama ohuaya acajeꞌyo. Jamajjeya eseya bichoꞌama onijje emimijji. ¡Esejaya epeejji quea mimishi poanijo mimicue Eyacuiñajji nijje!

¹⁶Epeejji cuana, Jesosaja epeejji quea mimishi poani ba majje ¡ma epeejjijoya oe mimicue Eyacuiñajji nijje oja mimishi ecuijeaꞌyojji, o baꞌe tiitii meeꞌyojji! Jamajjeya Eyacuiñajjiya oja mimishi cuijea cajeꞌyo. Pea epeejji cuanajo, coya quea mimishi nee nee po tiitiianijo ecuea miquianaya ehuohuijji pojjeama ojo emimijji Eyacuiñajji nijje jama baꞌa: —Eyacuiñajji, ¡aꞌa ma epeejji quea nee po meejji jamatii quea mimishi atiitii canijo! —chojja, ¡aꞌa jamaya mimijji Eyacuiñajji nijje ma dejjajo! Eyacuiñajjiya joya quea mimishi nee nee ajji poani cuana quea nee nee po mee cajeꞌyo.

¹⁷Eyacuiñajjija esohui jayojja jama aꞌajjajo eseya quea mimishi poani. Jamatii mimishi amajje eseya Eyacuiñajji nijje mimiꞌyajo ohuaya esejaya mimishi cuijea cajeꞌyo. Joya mimishi quea tai nee nee ajji tii tii poani ca ca Eyacuiñajjiya quea nee nee po mee cajeꞌyo. Esohui quijjeyejje nei tehue

¹⁸Ecuea epeejji cuana, esejaya eba Eyacuiñajjija bacua cuana, ma ohua quea pame nee po mee caꞌyonaje quea mimishi tii tii poꞌyo ajja, pajea caꞌyonaje. Eyacuiñajjija Bacua Ejja, Jesosa Quitohua ojaya epeejji cuana jaahuana cani, nahue cani Edosiquianaja quea mimishi epo meeꞌyojji pojjeama.

¹⁹Esejaya eba peaꞌai eseya Jesosaja epeejji poani, Eyacuiñajjija bacua cuana poani. Pea cuana ca ca eshahuaja epeejji poani. Edosiquiana aje oe ona huoojeajji poani.

²⁰Esejaya eba peaꞌai Eyacuiñajjija Bacua Ejja, Jesosa meshi yasijje poeyanaje. Ohuaya eseya quea jaꞌa nee nee jjashahuabaqui meesahua cani. Jamajjeya ohuaya eseya Eyacuiñajji eꞌe nei ba meesahua cani. Jamajjeya eseya Eyacuiñajjija Bacua Ejja oe nei nijje, Jesosa Quito nijje jjapeequi majje eseya Eyacuiñajjija bacua cuana poani. Jesosaja Chii ca ca oe Eyacuiñajji eꞌe nei ese baꞌe tiitii meeꞌyojji poani.

²¹Jamajjeya ecuea epeejji cuana, ¡aꞌa eshahua cuana nijje mimijji, eyacuiñajji nisho nijje peaꞌai aꞌa mimijji! Jamaya capoahua. Mahuiso ecuea esohui. Eyaya, Huani bajjaniya jiquio esohui tehuenaje miquianajaya ebajji. Apoa.