Read Ese Ejja Apocalipsis (de Juan) 3 Bible Online

Apocalipsis (de Juan) 3 - Ese Ejja bible

Apocalipsis (de Juan) 3

¹Majoya Jesosaa eya huohui canaje jama baꞌa: —Huani, ¡ecuea esohui tehuecue esohui huohuijji Sanisi cuiñajjijo baꞌe yasijje, ma ecuea epeejji nei cuana jaahuanajji yasijje! Tehuecue jama baꞌa: “Eya Jesosa Quito. Eyaya Edojjoshahua Pame miquiana huasijje huoojeaña. Eyaya miquianaya huohuiaña: Ecuea epeejji cuana, ojjaña miquianajaya ebaꞌejji cuana eyaya baña. Pea cuaa miquianajo huohui canaje jama baꞌa: —Jesosaja epeejji cuana Sanisijo baꞌecaa Jesosaja esohui jayojja jama acani —poanaje. “Jamatii eyaya miquianaya baña beshahua nei ecuea esohui jayojja jama baꞌe ajja.

²Jamajjeya ¡ecuea esohuijo jjashahuabaquicue quea jaꞌa nee! Quea mimishi poanijo miquianaya jjashahuabaquiani oe pojji. Beshahua nei jjashahuabaqui jaꞌa pajeaꞌyonaje. Jamaya quea mimishi, de. Eyacuiñajjija esohui jayojja jama aꞌajja miquianaaya.

³Ecuea esohui huohuijjiya ecuea esohui huohui canaje miquiana huasijje. Jamajjeya ¡ecuea esohui jama acue! ¡Mimishi cuana pajeaꞌyocue! Ejo jjashahuabaqui ajjajo aje oe eya miquiana que quehuajje poecuajije quea nee nee po meeya, siipojji quehuajje poeyani jayojja. Eya ache pojjajo miquiana que poeje oꞌoya miquianajaya ebajji pojjeama.

⁴“Jamatii beca cuana Sanisijo baꞌe quea boejeaꞌyo baꞌe, mimishiꞌama nei. Oya cuana enijje baꞌe meejeꞌyo. Quea pame nee baꞌe eyaya oya cuana daqui quea oshe nee nee huosho meejeꞌyo enijje ebaꞌe tiitiiꞌyojji.

⁵Eꞌe, ojjaña joya enijje jjapeequi pajeaꞌyo ajja daqui quea oshe nee nee huosho meejeꞌyo. Ojaya ebajjani cuana eyaya tehueꞌyonaje ebaꞌe tiitii meeꞌyojji. Maya ojaya ebajjani eyaya ecuijeaꞌyojji pojjeama. Oya cuanajo ca ca eyaya ecue Chii huohuije jama baꞌa: —Eꞌe, oya cuana ecuea epeejji nei —jamaya eya poaje ojjaña esohuidojojji cojja neijo ani.

⁶“Jamajjeya ¡shajjaꞌajjacue Edojjoshahua Pameja esohui ojjaña ecuea epeejji cuana Asia meshijo baꞌeca huasijje; jjashahuabaquicue!” —Jamaya eyaya, Jesosaa huoojeaña ecuea esohui etehueꞌyo ecuea epeejji cuana Sanisijo baꞌeca huasijje. ¡Jamaya tehuecue, Huani! —eya Jesosaa acanaje. Jesosaja esohui ojaya epeejji cuana huasijje, Pinanepia cuiñajjijo baꞌeca huasijje

⁷Majoya Jesosaa eya huohui canaje: —Huani, ¡ecuea esohui ecuea esohui huohuijji, ecuea epeejji jaahuanajji Pinanepia cuiñajjijo baꞌe yasijje tehuecue peaꞌai! Jama tehueme acue baꞌa: “Ecuea epeejji cuana, eyaya, Jesosa Quitohua quea jaꞌa nee nee aña, mimishiꞌama, eꞌe jojo nei Eyacuiñajji. Yahuajo nei etiiquiana Dabi Jodio cuanaja emeshi mese poanaje. Jjeya eya Eyacuiñajjija cuiñajji eyacua mese. Eyaya esecue caꞌa majje pea edobiqui meejji pojjeama. Caꞌapejo majje pea dobiqui meeje.

⁸“Ecuea epeejji cuana, miquianajaya ebaꞌejji ecuea eba. Miquianaya oe pojji yani. Jamatii ecuea esohui jayojja jama aña. Enijje jjapeequi pajeaꞌyo jjima. Jamajjeya eyaya miquianaya esohui huohui meeje pea cuana huasijje. Eshahuaja epeejji cuaa miquianaya ehuohui pajea meeꞌyojji pojjeama.

⁹Oya cuana siajje poani jama baꞌa: —Ecuanaya Jodio, eꞌe jojo nei Eyacuiñajjija epeejji —oya cuana poani. “Jamajjeya eyaya eshahuaja epeejji cuana miquiana que poe meeje ecuiꞌoshajjajo nequiya miquiana bihuiaa jama baꞌa: —Eꞌe, miquianaya Eyacuiñajjija epeejji eꞌe jojo nei, ojaya quea jea nee nee.

¹⁰“Pea cuaa miquianaya napa cani. Jamatii miquianaya ecuea esohui jayojja jama enijje jjapee tiitiiquijeꞌyo. Jamajjeya quijje eyaya baje ache cuana ecuea epeejji eꞌe jojo nei. Quijje eshahuaja epeejji ojjaña cuana quea nee nee po meejeꞌyo; eyaya miquianaya jaahuana neineijeꞌyo.

¹¹Quijje pishana eya, Jesosa poeje oꞌoya miquiana que. Jamajjeya ¡ecuea esohui jayojja jama po tiitiicue! Jamajjeya pea cuanaja miquianaya edasiajji pojjeama. Majoya Eyacuiñajjija ejjashahuabaquiꞌyojji miquianajo jama acaje baꞌa: Miquianaya baꞌe tiitii mee cajeꞌyo onijje.

¹²¡Bacue! Ojjaña miquianaya enijje jjapeequi pajeaꞌyo ajjajo eyaya eyajo nequi tiitii meejeꞌyo. Acui caꞌa, equi yamajjana quea quemo, quea caꞌa nequijeꞌyo tii tii jayojja jama ecuea epeejji nei nequi tiitiijeꞌyo eyajo. Eyaya ojjaña cuana ba meeje miquianaya ecuea epeejji eꞌe jojo nei, Eyacuiñajjija peaꞌai. Jiquio ecua eꞌacui meseya acuijo oja bajjani quecuatehue cani jayojja jama eyaya ajeꞌyo; ecuea epeejji nei cuana tehueje. Jamajjeya miquianaya, ojjaña ecuea epeejji peaꞌai ojee enijje eyajo ani meejeꞌyo. Enijje poejeꞌyo; Eyacuiñajjija cuiñajji eyacua, Jenosanena eyacua bajjani jayojja jama poeje. Ecuea bajjani eyacua poaje eya quea caꞌa nequianijo. Maya eyaya ojjaña miquianaya ba meejeꞌyo.

¹³“Jamajjeya ¡shajjaꞌajjacue Edojjoshahua Pameja esohui ojjaña ecuea epeejji cuana Asia meshijo baꞌeca huasijje; jjashahuabaquicue!” —Jamaya eyaya, Jesosaa huohuiaña ecuea epeejji cuana Pinanepiajo baꞌeca huasijje. ¡Jamaya tehuecue, Huani! —Jesosaa eya acanaje. Jesosaja esohui ojaya epeejji cuana huasijje Naonisea cuiñajjijo baꞌeca huasijje

¹⁴Majoya Jesosaa eya huohui ca oꞌoyanaje peaꞌai jama baꞌa: —Huani, ¡ecuea esohui huohuijji Naonisea cuiñajjijo baꞌe yasijje tehuecue ecuea esohui! Oya ecuea epeejji nei jaahuanajji. Jama oya tehuecue baꞌa: “Ecuea epeejji cuana, eya Jesosa eꞌe jojo nei Eyacuiñajjija huoojeaꞌyo. Eyaya huohuiaña Eyacuiñajjija esohui eꞌe nei. Eyaya Eyacuiñajji nijjeya ojjaña pana cooa poa. Eyaya miquianaya huohuiaña jama baꞌa:

¹⁵Ojjaña miquianajaya ebaꞌejji cuana ecuea eba. Eyaya baña miquianaya enijje jjapee neineiqui sa po ajja. Jamatii e cajaa sa poꞌyo ajja peaꞌai. ¡Aꞌa epeejji nisho pojji! ¡E cajaa a sa amajje jja ca iña oe huohuicue! Eꞌishijji quea quiyo pojjeama jayojja poani miquianaya. Eꞌishijji quea huoe pishana enabajo peajja, ena quea tai jama. Jiquio ecua seya chijjoco ena ishiꞌajja majje ojjajeaꞌyaña jayojja jama eyaya miquianaya cajaa achanaꞌ, ca ecuea esohui miquianaaya mi shajjaꞌajjajo.

¹⁶(null)

¹⁷Miquianaya aje oe jiquio jama jjashahuaba quehuaquiani baꞌa: —Eya ca iña Eyacuiñajjija epeejji quea pame nee poani —miquianaya jamaya poani. Jamaya peaꞌai poani baꞌa: —Eya dejja quea aquiana huiso jayojja jama poani. “Chojja. Miquianajaya eba pojjeama Eyacuiñajjiya miquianaya ba cani jama baꞌa: Miquianaya aemaꞌ jayojja, daquimaꞌ jayojja, cojjamaꞌ jayojjaya. Miquianaya quea mimishi baꞌyanijo Eyacuiñajji quea yeno nee nee poani miquianajo.

¹⁸Jamajjeya eyaya miquianaya huohuiaña: ¡Eya sa neineicue! ¡Ecuea esohui shajjaꞌajja neineicue! Ecuea esohui mei huoꞌo quea nahue jayojja jama poanijo, miquianajaya ebaꞌejji quea jaꞌa nee poaje. Eya miquianajo manoꞌyonaje miquianajaya mimishi cuijeaꞌyojji. ¡Jamaya jjashahuabaquicue! Maya ba majje miquianaya daqui oshe ehuoshoꞌyo baꞌe jayojja jama poaje, quea boejea nee. Jamajoya miquianaya bichoꞌama poaje miquianajaya mimishijo. ¡Edojjoshahua Pame bacue! Oya ecojja shicuijji jayojja; ohuaya miquianaya ecuea esohui ba meesahua cajeꞌyo, quea jjashahuabaqui jaꞌa nee po mee cajeꞌyo.

¹⁹Ojjaña ecuea epeejji eyaya tanacuaña, tecueaña peaꞌai ejjabahuejjaqui meejji ecuea quea jea nee neejo. Jamajjeya ca oe ¡ecuea esohui jayojja jama acue eꞌe jojo nei! ¡Ecuea epeejji nisho aꞌa po majajji!

²⁰¡Bacue! Esecuejo nequiya iyaa cani edobiquijji, miquiana nijje ejjapeequijji. Oya jayojjaya eya poani. Eyaya miquianaya iyaaña. E shajjaꞌajja majje jama pocue baꞌa: —¡Jesosa, dobicue! —jamaya poajo eya miquiana que dobiquije miquiana jjashahuabaqui meejji. Miquianaya enijje jjapeequije peaꞌai. Jiquio ecua epeejji cuana ojee ijjiaꞌijjiani jama poaje eseya.

²¹Eꞌe, ojjaña joya enijje jjapee tiitiiquiani eshahua jeabichajeajji poani. Jamajjeya quijje eyajo eyaya huohuije jama baꞌa: —¡Enijje nequicue! ¡Enijje ojjaña huoojeaꞌyojji pocue! “Eꞌe, miquianaya e jayojja jama poaje. Eyaya quea caꞌaa jjejojo Edosiquiana jeabichajeanaje. Jamajjeya ecue Chii nijje eya anioqueani; ojjaña huoojeajji poani tii tii.

²²Jamajjeya ¡shajjaꞌajjacue Edojjoshahua Pameja esohui; ojjaña ecuea epeejji cuana Asia meshijo baꞌeca cuana jjashahuabaquicue!” —Jamaya eyaya, Jesosaa huoojeaña ecuea esohui etehueꞌyo ecuea epeejji cuana huasijje Naonisea cuiñajjijo baꞌe yasijje. ¡Jamaya tehuecue, Huani! —eya Jesosaa acanaje.