Read Ese Ejja Apocalipsis (de Juan) 7 Bible Online

Apocalipsis (de Juan) 7 - Ese Ejja bible

Apocalipsis (de Juan) 7

¹Majoya eyaya banaje ebeca pee peaꞌai esohuidojojji cuana. Eyacuiñajji onijje miminaje beni cuana ehuoojeajji pojjeamajo. Beni quea quemo dejja cuana napajji meshi cuana huasijje, bae ai cuana huasijje, acui cuana huasijje epoqui poaje jjejojoya iña cani esohuidojojji cuaa.

²Majoya eyaya pea esohuidojojji banaje; eshequi poeje mijijje poeyanaje. Ohuaya aquiana etehuejji ye canaje Eyacuiñajjija epeejji cuana bahua tehuejji ojjañaja ebajji. Ma esohuidojojji ebeca pee peaꞌai cuana huasijje taaanaje meshi cuana, bae cuana peaꞌai enapa ca poaje jjejojo. Jama poanaje baꞌa:

³—¡Ishoa socue! ¡Meshi, bae ai, acui cuana peaꞌai aꞌa jinapajji soꞌo! ¡Eyaya Eyacuiñajjija epeejji Jodio cuana Eyacuiñajjija bajjani ojjañaja ebajji cabahua tehuesahua! —ma esohuidojojji poanaje.

⁴¿Ache huiso tehue canaje ebahuajje Eyacuiñajjija bajjani ojjañaja ebajji? Eyaya shajjaꞌajjanaje jama baꞌa: —Jodio cuana Eyacuiñajjija bajjani quea huiso nee nee tehue canaje ebahuajje, 144.000 huisome. Jodio etiiquianaja Isaenija bacua ejja 12 cuana poa. Ojaya osecua cuana tehue canaje.

⁵Jama tehueme acanaje baꞌa: Jodaja osecua cuana 12.000 huisome; Shobenija osecua cuana 12.000 huisome; Janeja oya jayojjaya 12.000 huisome;

⁶Aseneja oya jayojjaya 12.000 huisome; Netanija jamaya peaꞌai 12.000 huisome; Manaseja osecua cuana 12.000 huisome;

⁷Simeonija osecua cuana 12.000 huisome; Nemija osecua cuana 12.000 huisome; Isacanija osecua cuana 12.000 huisome;

⁸Sabononija oya jayojjaya 12.000 huisome; Joseja oya jayojjaya 12.000 huisome; Bejamija jamaya peaꞌai 12.000 huisome. Mahuisoya Eyacuiñajjija bajjani tehue mee canaje Jodio cuanaja ebahuajje. Quea huiso nee nee ojee nequi daqui oshe huoshoꞌyo epo

⁹Majoya eyaya banaje quea huiso nee nee pea cuana, Jodio pojjeama ojee echichaꞌyo nequi, daqui oshe nee nee huoshoꞌyo epo. Quea huiso nee nee poanijojo esicojji pojjeama. Oya cuana ojjaña meshijo baꞌe, ojjaña cuiñajjijo baꞌe peaꞌai poeyani. Dejja tehue cuana, Ese Ejja cuana, dejja nei cuana, ojjaña de, poeyani. Ojjaña pea esohuijo mimiani cuana poeyani peaꞌai. Ojjaña oya cuana Eyacuiñajji cojja nei nequi. Cuanaya Jesosa ñajjajja equecuaꞌyo jayojja cojja nei nequi yasijje poeyani ojjaña. Onajaya daqui ao quea oshe nee nee. Onaaya jjememe iña jeasohua cani Jesosa bihuiajji.

¹⁰Ojjaña cuana taaanaje jama baꞌa:“Eyacuiñajji, miyaya ojjaña huoojeaña. Jesosa, miya manoꞌyonaje ñajjajja equecuaꞌyo jayojja. Eꞌe, miyaya ecuanaya baꞌe tiitii meeaña”. Jamaya acanaje cuaa.

¹¹Majoya ojjaña esohuidojojji eyajo cuana Jesosaja epeejji etii pejjejo nequi, ebeca pee peaꞌai aquiana eshe cuana pejjejo nequi peaꞌai, Eyacuiñajji ma ojjaña yiyesama neijje ani yasijje jjanequichipiquinaje. Eyacuiñajji ojjaña huoojeaꞌyojji poani bihuia canaje esohuidojojji cuanaa ecuiꞌoshajjajo nequiya. Jama poanaje baꞌa:“¡Jamaya capoꞌyahua, Eyacuiñajji! Miya quea pame nee nee. Ojjaña miquea eba. Miya shajjaꞌajjaña tii tii ecuanaaya. Miya ojjaña huoojeajji enequi tii tii. Ojjañaa ecuanaaya miya bihuia tiitii aña.

¹²Miya quea caꞌa nee neejo ojjaña miyaya aña tii tii. ¡Eꞌe, jamaya capoꞌyahua tii tii!” Ojjaña esohuidojojji jamaya sohuicuayanaje.

¹³Majoya Jesosaja epeejji etiiya eya huohuiꞌajja canaje jama baꞌa: —Huani, ojjaña jiquio echichaꞌyo nequi daqui oshe nei huoshoꞌyo epo ¿aꞌa miquea eba? ¿Achejje shai oya cuana poeyani soꞌo?

¹⁴Jamajjeya eyaya oya jama anaje baꞌa: —Chojja, ecuea ba jjima. Miyaya ca ya ca oe baña, de. ¡Che iña oe huohuicue! Ohuaya eya sajaꞌa canaje jama baꞌa: —Onaya baꞌeꞌyonaje meshijo. Jesosa nijje jjapeequianijo, dejja mimishi cuaa oya cuana napa huichaꞌahuichaꞌa canaje. Jiquio ecua dejjaa daqui oshe tajja cajje quea boejea nee nee poani jayojja jama Jesosaa ojjañaja mimishi cuijea caꞌyajje quea boejea nee nee poani. Eꞌe, Jesosa ñajjajja shoꞌi equecuaꞌyo jayojja poanaje. Ojaya enaꞌ cuayaqui majje ojjañaja mimishi cuijeaꞌyojji poanaje.

¹⁵Jamajjeya oya cuana nequi mee caꞌyani Eyacuiñajji cojja neijo eyajo. Jomajo onaaya Eyacuiñajji nijje chaco tiitii cani quea bihui nee nee. Eyacuiñajji ojjaña huoojeaꞌyojji poani. Ohuaya ojaya epeejji cuana jaahuana tiitii cani.

¹⁶Ojaya epeejji cuana quea shoe pojjeama poajeꞌyo. Quea nabataja po ajja peaꞌai. Eshequijo quiyoꞌyo ajja, quea mano poꞌyo ajja peaꞌai.

¹⁷Eꞌe, Jesosa ñajjajja equecuaꞌyo jayojja Eyacuiñajji pejjejo nequi. Jiquio ecua ñajjajja cuiñajjiya ñajjajja cuana jaahuana cani, ena eteo ishi mee cani jama jayojja Jesosaa ojaya epeejji cuana jaahuana cani. Ojaya eꞌishijji ishi mee majje baꞌe tiitii mee cajeꞌyo onijje peaꞌai eyajo. Eyacuiñajjiya jaahuana canijo, oya cuana quea yeno po ajja. Paꞌyo ajja poajeꞌyo —jamaya Eyacuiñajjija epeejji etii poanaje.