Read Ese Ejja Apocalipsis (de Juan) 9 Bible Online

Apocalipsis (de Juan) 9 - Ese Ejja bible

Apocalipsis (de Juan) 9

¹Majoya pea esohuidojojjiya ojaya emiajji mia canaje. Mia cajo pea majameta jayojja meshi yasijje oquequiani eyaya banaje. Oya majameta jayojja huasijje quia mee canaje Eyacuiñajjiya esecue cojja quecuacaꞌapejo meejji, yave quia canaje jjani ai quea doe nee nee caꞌapejojji.

²Jjani ai quea doe nee nee caꞌapejo cajje eyaya banaje huichacha quea quemo baꞌesohuaquinaje que quea quemo nee nee dahuajea cani jayojja, quea jiji nee nee poani jayojja. Eshequi quea misi poanaje huichacha quea quemojo.

³Huichacha quea quemojo ani satajje jayojja cuayaquinaje, satajje ejja pojjaꞌa. Quea satajje moo nee nee poanaje. Meshi yasijje poeyanaje. Ma satajjeja ehuaꞌo cuana aji jayojja, quimajji.

⁴Satajje quimajji huohui canaje Eyacuiñajjiya jama baꞌa: —¡Aꞌa huenihueni napajji! ¡Acui sisi, acui quea quemo peaꞌai aꞌa napajji! ¡Aꞌa napajji ecuea epeejji ma ebahuajje ecuea bajjani ecue etehueꞌyo! ¡Ecuea epeejji pojjeama ca ca napacue, ma ebahuajje ecuea bajjani tehue jjima!

⁵¡Oya cuana aꞌa mano meeꞌyojji! ¡Quea nee nee oe po meecue me oejje baꞌime, 5 baꞌime! —poanaje. Jamajjeya equimaa quecua majamaja cajje quea nee nee po mee canaje, ajiya quecua cani jayojja.

⁶Jamajjeya dejja mimishi cuana manoꞌyo sa poaje ma me oejje baꞌime. Jamatii manoꞌyo jjima poaje.

⁷Ma satajje ejja cuana jiquio jayojja jama baꞌa: Yamijji mapichi ai ejjaquecuaquijji dojojji jayojja. Dejja jayojja cojjame. Mapichi mei huoꞌo quea nahueja sapa huahuo iya jayojja.

⁸Satajje ejja cuana saojji de, epona jayojja. Ojaya eseꞌ quea ao, ibia jayojjaya.

⁹Eseꞌojje baa daqui quea moo ebaꞌe huana. Oya cuana cuichojji peaꞌai. Ojaya ecuicho cuana quea shajjaquijjo, mapichi quea huiso nee nee cuajicuajijebeani jayojja jama poani, mapichiya pea ejjaquecuaquijji dojo cani pea cuana quecuaa.

¹⁰Satajje ejja cuanaja ehuaꞌo aji jayojja, quimajji. Dejja cuana quecua caje equimaa. Quea nee nee po mee cajeꞌyo me oejje baꞌime.

¹¹Satajje ejja cuanaja ehuoojeajji yani. Oya jjani ai cuiñajji, ma emanoꞌyojaa nequi quea doe nee nee cuiñajji. Jodio cuanaja esohuijo ojaya bajjani Abodono bajjani; Jieno cuanaja esohuijo oya Aponiono bajjani; Ese Ejjaja esohuijo ojaya bajjani Ojjaña Quea Yeno Po Meeꞌyojji bajjani.

¹²Jamajjeya ebionei epojja cuana quea nee nee poani apoa acanaje. Quijje pishana quea camaja nee nee poaje. Eꞌe, beca esohuidojojji cuanaja emiajji mia jjima.

¹³Majoya pea esohuidojojjiya ojaya emiajji mia canaje. Mia cajo eyaya pea shajjaꞌajjanaje. Oya mimiani ebeca pee peaꞌai esheꞌana yiyesama neijo nequi. Ma esheꞌana cuana yani mei huoꞌo eꞌiya aa biajje, Eyacuiñajji cojja nei nequi.

¹⁴Eyacuiñajji jama poanaje baꞌa esohuidojojji nijje, ma jjeya nei mia canaje nijje baꞌa: —Ebeca pee peaꞌai esohuidojojji cuana yani cuei quea quemojo, Eopate cuei yobijo. ¡Maya esohuidojojji cuana jomajo ejeyo nequi pichojeaquiꞌyocue! —Eyacuiñajji poanaje—.

¹⁵Eꞌe, eyaya ma esohuidojojji cuana nequi meeaña jjeya nei ehuoojeajji jayojja. Jiquio shequiajajo, jiquio baꞌijo, jiquio pojjajo, jiquio eshequi nequi pojjajo peaꞌai ehuoojeajji. Poquije mimishi cuana quea huiso nee nee quecuaa. Jama quecuame acaje baꞌa: Oe dejja quecua caje, becanejjijji peaꞌai quecua jjima acaje. Jamaya acajeꞌyo ojjaña dejja cuana ojjaña meshijo baꞌeca cuana —jamaya Eyacuiñajji poanaje. Eꞌe, ma esohuidojojji cuana pichojea meeꞌyo majje huoojea caje jjaquecuaquiya.

¹⁶Dejja mase mapichija edaasa biajje ani huoojea caje quea huiso nee nee. Peaa eya huohui canaje ache huiso dejja mase cuana mapichija edaasa biajje ani. Quea huiso nee nee, dosciento millone, 200.000.000 huisome poaje, de.

¹⁷Eꞌe, Jesosaa eya, Huani ecuea ebajji ba mee canaje mapichi cuana, dejja cuana mapichija edaasa biajje ani peaꞌai. Eyaya oya cuana banaje jama baꞌa: Ojaya eseꞌojje baa daqui quea moo baꞌehuana canaje ona equecua caꞌyo poaje jjejojo. Baa daqui quea moo quea siyo, quea tahua nee, quea jahua nee jayojja peaꞌai. Mapichi cuanaja esapa cuana ibia naa asha jayojja. Enabajje cuayani cuaqui jiji jayojja, huichacha, beni quea ihui, quea pase, mei quea ihui jayojja peaꞌaiya.

¹⁸Oya cuaquijo, huichachajo, beni quea ihuijo peaꞌai quea huiso dejja mimishi cuana manojeꞌyo. Oe dejja mano mee cajeꞌyo; becanejjijji peaꞌai manoꞌyo jjima poaje. Jamaya poaje ojjaña dejja mimishi cuana ojjaña meshijo baꞌeca cuanaya.

¹⁹Oya mapichi ai cuaa quea huiso nee nee mano mee cajeꞌyo; cuaquijijiya ojaya enabajje cuayaniya mano mee cajeꞌyo. Ojaya ehuaꞌohua peaꞌaiya dejja cuana quea nee nee po mee caje. Mapichi cuanaja ehuaꞌo cuana peyo jayojja, sapame ehuaꞌo icuijo enequi eseꞌ. Maaya dejja mimishi cuana ijjia cajje quea nee nee poajeꞌyo.

²⁰Eꞌe, Eyacuiñajjiya dejja mimishi cuana napa majamaja mee caꞌyonaje. Jamatii, quea huiso ma pojjajo manoꞌyo jjima poanaje cuana. Jamatii onaya mimishi cuana pajea sa poꞌyo ajja. Eshahua cuana bihuia pajeaꞌyo ajja, eyacuiñajji nisho cuana bihuia pajeaꞌyo ajja peaꞌai. Eyacuiñajji nisho acanaje cuaa, mei huoꞌo quea nahue, mei oshe quea nahue, mei jahua quea nahue, mei nahueꞌama, acui peaꞌai eyacuiñajji nisho acanaje. Maya eyacuiñajji nisho cuana shajjamaꞌ, jiojjimaꞌ, cojjamaꞌ peaꞌai.

²¹Eꞌe, maya dejja cuana quea mimishi tii tii poanaje pea quecuajji cuana, jjadasiaquijji cuana, siipojji cuana, pea cuana cojjojji poani cuana. Mimishi cuana pajeaꞌyo ajja; quea mimishi po tiitiiꞌyonaje.