Read Ewondo Lk 24 Bible Online

Lk 24 - Ewondo bible

Lk 24

¹Ndò a amos osu ya sòndò, ai ndib kidi, ndò bakë a sòṅ, bëbëgë e mimbòn ya bëngakomëzan.

²Ndò bakòb akòg atoa mfëṅëlan a mbè sòṅ a mgbag,

³ndò banyian, të yen mbim Yesus Nti.

⁴Ndò hm labò na, mbol fëg engadzaṅ bò a adzo di, bod bëbè bësòò bò kòb ha, bëbëgë biyie bifumu eyëgan.

⁵Bëngakòn wòṅ, ndò baluu mësu a si, e bod ba bò ai bò na: Dze miadzëṅ vëvëë mod a zaṅ mimbim?

⁶Asëki ha, akui a sòṅ. Tsogan mbol angakad mina hala angënë a Galilea

⁷na layean na mòn mod akabëban a mò bësëm, abomban a klos, abog te atëbë a sòṅ a amos lala.

⁸Ndò badugan tsog bibug bie.

⁹Ndò bakodo a sòṅ, bëmana lèè bë awom ai mbògò ai e bod bësë bëvòg e mam mësë ma.

¹⁰Bëngabë na: Maria Magdalena, ai Yoanna, ai Maria nyia Yakob, ai e bininga bëvòg bëngabë ai bò. Bëngabë kada apostel e mam ma,

¹¹apostel bëngayen të mam mëte hë anë mam minnal, ndò bandzëki bò yëbë.

¹²Ndò Petrus akodo a si, akëlë mbil a sòṅ, ndò alëmbë a nnëm ete, antala hë bandas etam, ndò angadugan a nda, akama e dzam angabò di.

¹³Amos te oben, bod bëbè ya taṅ dzaban bëngabë bëkëlë a dzal ziṅ, lëtoa dzam bò kilomèra awom ai ebè ai Yerusalem, dzal te atoa dzoe na Emmaus.

¹⁴Bëngazu hm të balèè bò a bò e mam mësë ya mëngabò ma.

¹⁵Ndò hm labò na, a bëlèègè ha, bëlaṅëdan, ndò Yesus azu bò kòb, angakë ai bò esamba.

¹⁶Mis maban mëmana bò kanga ha, bò tègè nyè yëm.

¹⁷Nyè ai bò na: Mam mëfe mëben mialaṅëdan ai mò a zen ma? Ndò baku bivol, mëlunga a nnëm a tuud.

¹⁸Ndò mbòg ayalan, (angabë dzoe na Kleopas) nyè ai nyè na: Yë wa etam onë nnëṅ a Yerusalem na wayëm ki e mam mabòban ete e mëlu ma nga?

¹⁹Nyè ai bò na: Mam mëfe? Bò ai nyè na: E ma matyan ai Yesus ya Nazaret. Yesus te angabë ngungul profèt a mimboan ai a nkòbò a mis më Zamba ai a mis më nnam osë;

²⁰akyaè ya bëfada bënen ai bëtëbë bë osu, bëdzoe ban bakab nyè a ntol awu, ndò babome nyè a klos.

²¹Bia bingabë bifidigi na ṅnyè anë e mod azu kode Israel. Ndò hm fë, a e mam mësë ma, amos lala hi ngë mam mëte mëbò ana.

²²Dzam da, bininga bëziṅ ya ngab dzan bëbede bia minnëm a yob: bëkun kë a sòṅ,

²³ndò mbol bandzëki yen mbim woe, ndò bësò bia kad na bëyen benglès, mbò bëkad bò na avëë.

²⁴Ndò bod bëziṅ ya esamba dzan bëkë a sòṅ, bëkòbò fë hë anë bininga bëdzo, dzam da emen ṅnyè tègè yen.

²⁵Ndò adzo ai bò na: A e bod minë adid ai atòṅ nnëm ya ayëbë e mam mësë ya bëprofèt bëngakòbò!

²⁶Nga Kristus angabë ayean dzugi mam mete, azu sòṅ nyian a duma die?

²⁷Angatimi hm bò e mam matyan ai nyè a ntilan[94] osë, atarigi abë Moses ai bëprofèt bësë.

²⁸Ndò bakui babi ai e dzal bëngabë këlë ete, ndò abò hë anë ayi kë ai dulu osu.

²⁹Ndò bayag nyè a kiṅ, bò na: Tòbògò ai bia, amu ngoge engasus ya, ndò amos oyimbi ya. Ndò anganyian, atòbò ai bò.

³⁰Ndò hm labò ha na, mbol angabë atoa ai bò a tëbëlë ha, ndò anòṅ mbaṅëla, afubu, abëgë, avëë bò;

³¹ṅyaan hm mis maban mayaaban hi, ndò bayëm nyè. Nyè adzaṅa bò a mis.

³²Ndò badzo bò a bò na: Nga minnëm mihë dig bia a abum eyòṅ ahë lèè ai bia a zen, e kan ahë yaè bia ntilan?

³³Awola te ben, ndò bakodo a si, bëdugan a Yerusalem, ndò bakòb bë awom ai mbògò ai e bod bëngabë ai bò bëtoa nkoan,

³⁴bëkada na Nti atëbë fò a sòṅ bëbëla: Simun ayen nyè.

³⁵Ndò bò fë balèè e mam ya zen ai mbol ya bëngayëm nyè eyòṅ abëgë mbaṅëla.

³⁶Bëkòbògò e mam ma, antëlë bò a zaṅ, ndò adzo ai bò na: Mvoè ai mina.

³⁷Mësis ai wòṅ bikuu bò a nyòl, bëtsogo na bayen kon.

³⁸Nyè ai bò na: Dze miambara na? Ndò ki asu dze miasoo a minnëm mian?

³⁹Bëbëgan mò mama ai mëkol mama. Mamen fò nyò! Namëngan ma, miyen, amu kon ebëlë ki nyòl ai bives akyaè ya miayen mëbëlë di.

⁴⁰Akòbògò nala, ndò angalëdë bò mò ai mëkol.

⁴¹Mbol bëngabë të ṅyëbë asu mintag ya nnëm, bëkama fë, nyè ai bò na: Yë mibëlë e dzom ya adi ha?

⁴²Ndò bavë nyè etun mbuman kòs.

⁴³Ndò anòṅ, angadi bò a osu na.

⁴⁴Nyè ai bò na: Bibug biama ya mëngakad mina hala mëngënë ai mina, na e mam mësë mënë ntilan a mvende Moses ai a bëprofèt ai bësalmen, mëtyan ai ma, mayean dzalëban.

⁴⁵Ndò hm ayaè bò minnëm na bëwog ntilan.

⁴⁶Nyè ai bò na: Eyë anë ntilan nala na Kristus ayi bi mintye, atëbë a bëkon a amos lala,

⁴⁷abog te bëyedan mëyòṅ mësë avëṅan asu evaa minsëm a dzoe die. Atarigi a Yerusalem,

⁴⁸mina minë bëbòòlò bë mam mëte.

⁴⁹Ndò hm malom mina ekaa Tara. Mfa waan, tòbògan a tisòn ha ntye miabë ki bi ngul ya yob.

⁵⁰Ndò angakë ai bò a Betania, ndò abede mò a yob, angafubu bò.

⁵¹Ndò lazu bò na, eyòṅ angabë afubugu bò ha, ndò akaèn ai bò, anòṅëban a yob.

⁵²Bò bëngalugu nyè. Ndò badugan a Yerusalem ai abui mintag,

⁵³bëntoa a tempel kòm esë, bëluugu Zamba.