Read Ewondo Bap 1 Bible Online

Bap 1 - Ewondo bible

Bap 1

¹A Teofil, e kalara osu [1], mëngatil e mam mësë ya Yesus angabò, ayëgëlë, atarigi a mëtari,

²azaag kui amos angatëbëlë apostel ya angatòb, ai Mfufub Nsisim, ndò anganòṅëban a yob.

³Mbò angalëdë emen, atala, a mvus yë na abi ya mintye akyaè asë, mëlu mëlu mëwom mënyii, akòbògò mam më edzoe Zamba.

⁴Ndò hm, adzaag ai bò bidi ha, ndò abende bò na të bakodo a Yerusalem, bëyanga hë mëtiṅ më esya, akyaè ya mingawog mëdzoo na,

⁵Yohannes angadu a mëndim, mfa waan, miayi duuban abë Mfufub Nsisim e mëlu mazu ma.

⁶Ndò hm bëngamana koan, bësili nyè na: «A Nti, yë abog wazu dugan tele edzoe Israel di akui ya nga?[2]»

⁷Nyè ai bò na: «Së ki mina miayean yëm mëbog ai bënyie ya tara angatele a ngul dzie,

⁸dzam da, miayi bi ngul eyòṅ Mfufub Nsisim ayi mina sòṅ a nyòl, abog te miayi ma bò bëbòòlò a Yerusalem ai a Yudea asë, ai Samaria, akëlë kui a mëbug më si».

⁹Akòbògò nala, bëngayen nyè anë anòṅëban a yob, ndò nkut ongamana nyè bò dimëzan a mis.

¹⁰Ndò mbol bëngabë bëbëbëgë a yob anë akë, ondzi na, fam ebè entëlë bò a mgbag, ebëgë mimfum biyie,

¹¹bò na: «A Bod ya Galilea, dze mitëlë, mibëbëgë a yob? E Yesus ya avaaban mina a yob nyò, nala ngò ayi sò, e kan mihë yen akëlë a yob».

¹²Ndò hm apostel bëngadugan a Yerusalem, bësòò a nkol bile-bi-mbòn; hom te ongabë babi ai Yerusalem, ntye dulu ya amos sabbat[3].

¹³Asuan bëngasuan a tisòn, ndò babed a nda-yob, e hom bëkarëga yanga; bënë ha na: Petrus ai Yohannes, ai Yakob, ai Andreas, Filip ai Tomas, Bartolomeus ai Matias, Yakob man Alfeus ai Simun man Zelot, ai Yudas man Yakob.

¹⁴Bò bësë bëngabë nnëm mbòg mbòg, mban a ngogëlan ai bininga, ai Maria, nyia Yesus, ai babënyaṅ.

¹⁵Mëlu mëte, ndò Petrus[4] angatëbë a si a zaṅ babënyaṅ, (Nkunda bod ongabë nkoan hom mbòg ha dzam bò ntèd ai mëwom mëbè) nyè na:

¹⁶A babëdzaṅ, ntilan ongabë oyean toban, akyaè Mfufub Nsisim ongatari kòbò a anyu David, atyan ai Yudas ya angavëṅan nlëdë-zënë asu e bod bëzaa bi Yesus,

¹⁷na angabë a ngab dzan, ndò abi fë ngab ya esye dzi.

¹⁸Ndò mod te angakus aboda si ai mòni dzongo, ndò alaban ai asu a si, atole a zaṅ, miyè midabëra a si.

¹⁹Ndò e bod bësë bëtoa a Yerusalem bayëm nala, antoa hm na, bëngaloe afub te a nkòbò waban na: Akeldamak, nala watyan na: Afub mëki.

²⁰Amu anë ntilan a kalara bësalmen na: Dzal die lëbòò elig, ndò fë të mod atòbò ete[5], ai na Mod mfë anòṅò afola edzoe dzie[6].

²¹Bod bëziṅ bazuzu ya batòbò ai bia ha abog asë, eyòṅ Nti Yesus angabë awulugu ai bia, asë ali, anë ali,

²²atarigi a ṅduan Yohannes, azaag kui amos ya bënganòṅ nyè a yob a zaṅ dzaan[7]; Layean na mbòg ya ete abò mbòòlò akui-lë sòṅ fufulu ai bia.

²³Ndò bëbè bëngatëbë[8], Yosef ya bëloege na Barsabbas, atoa mëbëdan na Yustus, ai Matias.

²⁴Ndò bëngakogëlan, bò na: «A Nti, wa wayëm minnëm mi bod bësë; lëdëgë e nyò watòb a e bod bëbè ba,

²⁵na anòṅ etoa esye apostel ya Yudas angadzoge a si nyè akëlë e hom woe.»

²⁶Ndò bëngaboe ngam, ebii Matias, ndò fò anyian a taṅ a postel awom ai mbòg.