Read Ewondo Bap 10 Bible Online

Bap 10 - Ewondo bible

Bap 10

¹Mod ziṅan gabë a Sezarea, dzoe na Kornelius, atoa ndzoe ntèd bëzimbi, nkunda bëzimbi woe otoa dzoe na Italien,

²e mod nyò atoa mod ngogëlan, akama fë Zamba, ai nyè ai nda-bod dzie esë, abò akab abui ai nnam, akogëlan ai Zamba kòm esë.

³Ndò atoan yen a nlo anë englès Zamba anyian abë nyè dzam bò a awola ebulu, nyè ai nyè na: A Kornelius!

⁴Ndò abëbë nyè a kumaa, wòṅ osusu nyè a nyòl, nyè na: Dze dzili, a Nti? Nyè ai nyè na: Ngogëlan dzoe ai akab doe biabed Zamba a mis anë mëtunëṅa.

⁵Ndò hm, etoa dzi, lomo bod a Yopa, bëkë wa loe Simun ziṅ ya anë mëbadan na Petrus.

⁶Anë a mëyëṅ abë Simun ziṅ, nkomo bikop, mod te abëlë nda a ntsag-man.

⁷Ṅnyie anë englès alèègè ai nyè nyò angakë, ndò aloe bod bisye boe bëbè, ai man bëzimbi angabë nyè mëwog, akama fë Zamba,

⁸ndò amana bò timi mam mësë, alomo bò a Yopa.

⁹E kidi lende ya hala, e bod ba bëkëlë a zen ha, bëngasubu ya fë babi a tisòn, ndò Petrus abed a ndil a yob, na akogëlan a awola samëna.

¹⁰Zie engakòn nyè, angayi e dzom adi. Bëkomëzan bidi ha, ṅnyè atari na anyaman kam nyò,

¹¹angayen yob oyoo, dzom engasus a si anë mod ndòmbò, esusu a si ai mëbug mënyii;

¹²kan tsid mëkul esë ai e tsid yawòṅ a i abum a si, ai anòn ya yob etoa ete.

¹³Ndò kiṅ yadzo ai nyè na: Tëbëgë a si a Petrus; woe, odi fë.

¹⁴Petrus nyè na: Tègè ai dzom ziṅ nala, a Nti, amu mabë ya ki di e dzom enë mvit ngë eboe.

¹⁵Ndò kiṅ yadzo ai nyè eyòṅ bèè na: E byem ya Zamba afubu ya, obë dzo na binë mvit.

¹⁶E dzam di angabò nala biyòṅ bilè; etye etye, ndò ndòmbò eyie yadugan nòṅëban a yob.

¹⁷Ntye ya Petrus akëlë atsog a nnëm woe mbol e dzam ahë yen di latyan, ondzi na, e bod ya Kornelius angalom ba bëngadzëṅ nda Simun, bëtëlë a mbè,

¹⁸ndò baloe, bësili ngë e Simun anë mëbadan na Petrus anë a mëyëṅ hala.

¹⁹Hala Petrus angënë abindigi e dzam angayen di, ndò nsisim wadzo ai nyè na: Bod bëlè badzëṅ wa;

²⁰Kodogo hm a si, osigi, okë ai bò. Të wasoo, amu ma mëlom bò.

²¹Ndò Petrus asus mfag e bod ba bëngabë, nyè ai bò na: Ma nyò, ma miadzëṅ. Dze esò ai mina?

²²Bò na: Kornelius, ndzoe ntèd bëzimbi, sosoo mod, akama Zamba, ayòṅ Yuden asë lakam nyè. Mfufub englès okad na alom wa sòṅ loe okë a nda dzie, owog bibug bie.

²³Ndò anyili bò a nda ete, angabëlan ai bò. E kidi lende ya hala, ndò akodo a si, ayëmë zen ai bò. Babënyaṅ bëziṅ ya Yopa bëngabë ai nyè esamba ha.

²⁴A amos otsaag, ndò anyian a Sezarea. Kornelius angabë ayanga bò, ndò angamana togan bivuvuman bie ai mimfaṅ bëmvoe boe.

²⁵Eyòṅ hm Petrus anganyian, ndò azu toban ai nyè, alaban nyè a mëkol a si, angakogëlan.

²⁶Ndò Petrus angatele nyè a si nyè na: Tëbëgë a si; ma fë mënë hë mod.

²⁷Alèègè ai nyè ha, ndò anyian, akòbò abui bod bësë bëngamana sò,

²⁸nyè ai bò na: Mina bëben miayëm akyaè anë man Yuden mvende të tòbò fufulu ai ndzin, ngë akë a bimò abë nyè. Ndò hm të Zamba alëdë ma na mayean ki dzo ai tò mod ziṅ na anë mvit, ngë ki na mod anë eboe.

²⁹Asu te, eyòṅ bëlom ma loe, ndò mësò, të fèd tò ebug. Ndò hm masili etòm bëlom ma loe ai dzò.

³⁰Kornelius nyè na: Mëlu mënyii ana, akyaè awola di, mëngabë mëkogëlan a awola ebulu a nda dzama ; atëm na, mod antëlë ma osu, abëgë biyie bifyègè,

³¹nyè na : A Kornelius, Zamba awog ngogëlan dzoe, ndò fë abaala akab doe ;

³²lomo hm bod a Yopa, obò na, e Simun anë mëbadan na Petrus azu ; anë a mëyëṅ a nda Simun nkomo bikobo, a ntsag maṅ.

³³Etye etye te, ndò mëngalom wa loe, ndò fë wa obò mbëṅ, mbol osò. Ndò hm bia bësë ba bitoa Zamba a mis na biavogolo e mam mësë Nti abende wa.

³⁴Ndò Petrus abodo nkòbò, nyè na: Mëyëm ya hm fò bëbëla na Zamba asëki timi,

³⁵dzam da, a ayòṅ asë, e mod akam nyè, abò fë sosoo, Zamba ayëbë nyè.

³⁶Angalom bòn bë Israel ebug, ayedëgan mbëmbë foe mvoè a anyu Yesus Kristus, ṅnyè anë Nti bësë;

³⁷Mina bëben miayëm e mam mëngalod a Yudea asë, atarigi a Galilea, a mvus ṅduan ya Yohannes angabende,

³⁸akyaè ya Zamba angawòbò Yesus ya Nazaret mbòn ai Mfufub Nsisim, ai ngul; Yesus te ṅnyè akëlë abò mbëṅ, asye e bod bësë ya Satan angatëgë, mbol Zamba angabë ai nyè.

³⁹Ndò hm bia bëben binë bëbòòlò bë e mam mësë angabò a nnam Yuden ai a Yerusalem. Ṅnyè bëngawoe, bëbomë nyè a klos;

⁴⁰Zamba angakuli nyè a sòṅ a amos lala, ndò fë angabò na ayene,

⁴¹së hm ki na ayene bod bësë, hë da na ayene e bëbòòlò ya Zamba angatari tòb, bia, e bia ya bingadi ai nyè fufulu, binyuu fë ai nyè, a mvus yë na asò ya a bëkon.

⁴²Ndò angabende bia na biyedan nnam, bimëm fë na ṅnyè Zamba angatele ntsigi-ntol bënyiṅi ai bëwu.

⁴³Ṅnyè bëprofèt bësë babòòlò na e mod osë ayëbë nyè, ayi bëlë evaa-minsëm a dzoe die.

⁴⁴Petrus angënë akòbògò e mam ma, ndò Mfufub Nsisim angaku e bod bësë bëvogolo ebug a nyòl.

⁴⁵E bëyègè ya bëngasò ai Petrus ha, a bëngabë nkëlan, bëngakam[62] na efaè Mfufub Nsisim yasoeban bëhaiden a nyòl.

⁴⁶Amu bëngabë bëwogo bò bëkòbògò minkòbò minkòbò, bëtaman fë Zamba. Ndò hm Petrus azu sili na:

⁴⁷Yë mod ziṅan gënë dzam kaman ai e bod ba mëndim na bëduuban nga, abim anë bò fë bëbi ya Mfufub Nsisim anë bia?

⁴⁸Ndò hm abende na bëduuban a dzoe Yesus Kristus. A mvus te, bëngakogëlan ai nyè na atòbò hala ban mëlu.