Read Ewondo Bap 11 Bible Online

Bap 11 - Ewondo bible

Bap 11

¹Ndò hm apostel ai babënyaṅ ya bëngabë a Yudea bawog na tò bëhaiden bëyëbë ya ebug Zamba.

²Eyòṅ hm Petrus angabed a Yerusalem, e bod bëngabë nkëlan bëngasog ai nyè,

³bò na: 'Onganyian abë e bod basëki nkëlan, ndò fë wadi ai bò fufulu!'

⁴Petrus atari hm na atimi bò mbëṅ mbëṅ, nyè na:

⁵Mëngabë a tisòn Yopa, mëkogëlan, ndò mayen a nlo ha, dzom engasus a si anë mod ndòmbò, esusu, esòò a yob ai mëbug mënyii, ndò yazu kui abë ma.

⁶Ndò mabëbë ete, mëtoan fòmbò, ndò mayen tsit ya si-ndon, tsit afan, ai e tsit yawòṅ a si, ai anòn ya yob.

⁷Ndò mawog kiṅ edzoo ai ma na: 'Kodogo a si, a Petrus, owoe, odi fë.'

⁸Ma na: Tègè fò a Nti, amu e dzom ziṅ enë mvit ngë eboe yabë ya ki ma nyian a anyu.

⁹Ndò kiṅ yasò a yob eyòṅ bèè na: Ebi ya Zamba afubu, të wadzo na binë mvit.

¹⁰Angabòban nala biyòṅ bilè, ndò e byem bisë bi biadugan bed a yob.

¹¹Etye etye te, bod bëlè bëntëlë a nsëṅ e nda mëngabë; bëngalom bò abë ma, bësòò a Sezarea.

¹²Ndò nsisim wadzo ai ma na mëkë ai bò, të malaṅëdan. Ndò bakë ai ma, ai e babëdzaṅ bësaman ba, ndò biakë nyian a nda mod te.

¹³Ndò alèè bia mbol ya ayen englès a nda dzie, atëlë, akòbògò na: 'Lomo bod a Yopa, bëkë wa loe Simun ya anë mëbadan na Petrus,

¹⁴ṅnyè ayi wa kad e mam wayi kodeban ete, ai wa, ai nda-bod dzoe esë.'

¹⁵Akaè mëngakaè na makòbò, ndò Mfufub Nsisim angasus bò a nyòl, e kan fë angasus bia a nyòl a mëtari.

¹⁶Ndò hm mazu tsog ebug ya Nti angakòbò na Yohannes nyè angadu ai mëndim, mina miayi duuban ai Mfufub Nsisim.

¹⁷Ndò hm, ngë Zamba emen avë bò efaè dzam dëda anë angavë bia eyòṅ bingayëbë Yesus Kristus, ma mënë za na mëzu kaman ai Zamba na abë dò bò?

¹⁸Awog bëngawog nala, ndò bëngaku bivol, bëngalugu Zamba, bò na: Ndë Zamba avë ya tò bëhaiden na bëvëṅan a enyiṅ a !

¹⁹Antoa hm na, e ba ya bëngamana tsaman asu mindzug mingabò a etòm Stefanus bëkëlë kui a Fenisia[63], ai Siprus, ai Antiokia, bò të kad tò mod ziṅ ebug sësala hë Yuden.

²⁰Bod bëziṅ ya abë bò bëngabë ban bë Siprus ai ban bë Sirenea, mbò bëngasò a Antiokia, bëngalèè tò ai bë Grek, bëkada bò mbëmbë foe Yesus Kristus.

²¹Wò Nti ongabë ai bò; abui dzam bëngayëbë, bëvëṅan abë Nti.

²²Ndò e foe adzo daban te nyi engakë kui a nda-Zamba ya enë a Yerusalem, ndò balom Barnabas na akë a Antiokia.

²³Ṅnyie anë angakui, ayënë ntotomamaa Zamba, ndò angatag, angayin fë bò bësë na bëyëm minnëm, bëlad ai Nti,

²⁴amu angabë mbëmbë mod atoa fë ndzalan ai Mfufub Nsisim, ai ṅyëbë. Ndò mod nkunda angabagban abë Nti.

²⁵Ndò hm akë a Tarsis na akë adzëṅ Saulus,

²⁶ayënë nyè, akëlë ai nyè a Antiokia. Ndò hm bazu tòbò ai nda-Zamba hala nguma mbu, bëyëgëlë abui bod; Eyë bëngayègè loe bëyègè a Antiokia eyòṅ osu na Bëkristen[64].

²⁷Mëlu mëte, ndò bëprofèt bëngatye a Yerusalem, bësòò a Antiokia.

²⁸Ndò mbòg ya abë bò, dzoe na Agabus, angatëbë a si, angakòbò ai ngul nsisim na mod zie azu bò a si esë; ndò fë zie engabò a abog Klaudius.

²⁹Mfa ya bëyègè, bëtsigi na mod osë ya abë bò alom e babënyaṅ ya Yudea man dzom, anë mod a nkoṅ ngul woe.

³⁰Ndò hm bëngabò nala, bëlomo fë bënyia-bod-mvia atom te a mò më Barnabas ai Saulus.