Read Ewondo Bap 12 Bible Online

Bap 12 - Ewondo bible

Bap 12

¹Dzam bò abog te, ndò nkukuma Herodes[65] angafod bod ya nda-Zamba mò a nyòl na andëgëlë bò.

²Ndò angawoe Yakob[66], manyaṅ Yohannes, ai nyamëla okëṅ.

³Mbol angayen na nala waanyëb Yuden a nnëm, ndò hm angakë ai nala osu, abò na bëbi Petrus (Engabë a mëlu më mbaṅëla saṅ);

⁴Abi angabi nyè, ndò afudi nyè a mbog, avëë nyè bikoa bëzimbi binyii na bëkala nyè, amu ayii na avë nyè nnam a mvus Paska.

⁵Ndò hm bëngabaala Petrus a mbog ha. Nda-Zamba engakogëlan hm fò ai Zamba asu die ha abui.

⁶Abog angakui na Herodes angayi ya na alëde nyè a nsëṅ, alu te aben, Petrus akëlë oyò a zaṅ bëzimbi bëbè, atoa mfaṅ a n a mësuṅ mëbè, bënòni bëkalëga a mbè a yob.

⁷Ndò englès Nti angasò, mfyè ongafyè a nda ha. Ndò akud Petrus a avël, ahëlë nyè, nyè na: Kodogo a si avol; Ndò mësuṅ mëngasòdan nyè a mò.

⁸Englès nyè ai nyè na: Tindigi kanda a angëdëg, obòd fë ngob dzoe. Ndò abò nala. Nyè ai nyè na: Bòdò ewòman dzoe, obie ma a zut.

⁹Ndò angakui, angabie nyè, të yëm na e mam mayënan ma ai englès mënë bëbëla. Angabë atsogo na ayen a nlo.

¹⁰Ndò azu lod abë nkala osu, ai e nyò bèè, bëngakë a mbè bikye wakë a tisòn, ndò ongayaaban ai oben, bëkui, bëngakë a ndzòṅ ziṅ; etye etye na, englès aligi nyè.

¹¹Petrus atomo nyòl, nyè na: Mëyëm ya bëbëla na Nti alom englès woe, ndò akode ma a mò më Herodes, ai a e dzam nnam Yuden ohë lam.

¹²Eyòṅ angatoan yëm nala, ndò akë a nda Maria, nyia Yohannes[67] ya baloe na Markus, mfag abui bod bëngamana koan, bëkogëlan.

¹³Ndò angakud a mbè ya nsëṅ, ndò man mininga bisye dzoe na Roda angazu a mbè ;

¹⁴Ayëm angayëm kiṅ Petrus, ndò andzëki yaè mbè ai e mintag mimbë bëlë nyè, adugan dugan mbil a nda, ndò akad bò na Petrus atëlë a mbè a nsëṅ.

¹⁵Ndò badzo ai nyè na : Wakòn a nlo ! Nyè të hë ayin na adzo te anë ete. Bò na : Englès woe nyòlò.

¹⁶Petrus nyè anë hë akud a mbè. Ndò bayaè, bëyënë nyè, bëngakam.

¹⁷Ndò avë bò ndëm ai wò na bëku bivol, angalèè bò mbol Nti angakuli nyè a mbog, nyè na : Kaṅan kad Yakob[68] ai babëdzaṅ e mam ma. Ndò angakui, akëlë hom mfë.

¹⁸Ai mëlende më kidi, ndò mod enyënyam angabò a zaṅ bëzimbi ha, bësiligi e dzam ayenan ai Petrus.

¹⁹Herodes nyè na bëkë badzëṅ nyè. Mbol hm bëngabò tègè nyè yen, ndò akaè na asili bëzimbi minsili ; avëë abende na bëwoe bò. Ndò akodo a Yudea, akëlë a Sezarea, antoa we.

²⁰Angabë awogo mbë olun ai bod ya Tir, ai e ba ya Sidon. Ndò bò bësë bakui kiṅ dzia ha, bësò nyè yen, hala te bëmana ya kom ai Blastus, e mod asye a etun-nda nkukuma, ndò basili na bakom etòm a evovoe, mbol eyë bidi bisòò a nda nkukuma asu dzal daban.

²¹Amos ya bëngayili, ndò Herodes angabòd biyie bi nkukuma, ndò atòbò a etoa edzoe, angakòbò ai bò,

²²bod bëngabam, bò na: Kiṅ Zamba, së ki enyi mod!

²³Etye etye te ndò englès Nti angabimi nyè, etòm ya na andzëki vë Zamba duma; Bitum bingadi nyè, ndò angasuu ṅhëbë.

²⁴Ebug Zamba enganaṅ, ebulban.

²⁵Ndò Barnabas ban Saulus bëngadugan a Yerusalem, adzala bëngamana dzala esye dzaban, bësòò ai Yohannes ya bëloege na Markus.