Read Ewondo Bap 13 Bible Online

Bap 13 - Ewondo bible

Bap 13

¹Bëprofèt bëngabë a nda-Zamba a Antiokia na: Barnabas, Simeon ya bëloege fë na Niger, Lukius man Sirenea, Manas ya anganaṅ ai Herodes, adzoege efas nnam, ai Saulus.

²Bëluugu Nti, bëkii fë bidi, ndò nsisim wadzo na: Telegan ma Barnabas ai Saulus a mgbag asu esye ya mëngaloe ya bò na bëbò.

³Ndò bamana ki bidi, bëkogëlan, ndò babede bò mò, bësoe bò.

⁴Mbol Mfufub Nsisim angalom bò nala, ndò bakë a Silisia, bëtye hala, bëngakë mfag ya Siprus.

⁵Ndò basuan a Salamina[69], bëngabende ebug Zamba a mënda-bikoan më Yuden. Yohannes anë bò nkè-esye ha.

⁶Ndò bëngawulu ai elon esë, akëlë kui a Pafos, ndò bakòb mod-mëbiaṅ ziṅ, profèt dzongo, man Yuden, dzoe na Bar-Yesus;

⁷Angabë fufulu ai mëyian më edzoe nen Sergius Paulus, mfëfëg mod. E mod edzoe nyò abanda Barnabas ban Saulus, angayi na awog ebug Zamba.

⁸Elimas, mod mëbiaṅ, nala ngò dzoe die latyan, angabò bò nkanga ha, angadzëṅ fë na avaè mëyian më edzoe nnëm a ṅyëbë.

⁹Saulus ha, ṅnyè fë anë Paulus, atoa ndzalan ai Mfufub Nsisim, angabëbë nyè a toaṅ,

¹⁰nyè na: A wa ya onë ndzalan ai mfugu osë, ai mvol esë, wa mòn Satan, wa nziziṅ sosoo, wayiyi ki tele adzo di na waandaman bëtëtëlë mëzen më Nti nga?

¹¹Wazu hm yen etoa dzi na wò Nti wayi wa ku a nyòl; wayi ku ndim, të yen nlo-dzobo man eban. Etye etye te, ndò nkud ai dibi biaku nyè a nyòl, angawulu anë ndòngò, adzëṅë e mod abi nyè a wò.

¹²Ayen mëyian më ndzoe angayen e dzam angalod di, ndò angakaè na ayëbë, mbol ayëgëlë Nti angabi nyè a nnëm abui.

¹³Ndò Paulus ai bëmvoe boe bëngatye a Pafos, bëkëlë a Perga ya Pamfilia. Ndò Yohannes akaèn ai bò ha, adugan a Yerusalem.

¹⁴Bëkë bawulu hala, a bëtyege a Perga, ndò bazu kui a Antiokia ya Pisidia, ndò banyian a nda-bikoan, a amos sabbat, bëtòbò a si.

¹⁵Amana bëngamana laṅ mvende ai bëprofèt, ndò bëdzoe bë nda-bikoan balom bò kad na: A babëdzaṅ, ngë mibëlë ebug ya miawone nnam ete, nòṅan nkòbò.

¹⁶Ndò Paulus atëbë, avë ndëm ai wò, nyè na: A bod ya Israel, ai e bod miambara Zamba, vogolan.

¹⁷Zamba ayòṅ Israel di angatòb bëtara, ndò fë angabede nnam eyòṅ bëngabë toa a Egipten, ndò angakuli bò we ai wò osama nyè;

¹⁸Dzam bò mimbu mëwom mënyii, azombo bò a nkod-nnam

¹⁹ndò angatsam mëyòṅ zamgbal a si Kanaan, avëë bò bilig biaban,

²⁰a taṅ mimbu dzam bò mintèd minyii ai mëwom mëtan. A mvus te, ndò avë bò bëtsigi-mintol, akui abë profèt Samuel.

²¹A hala ngò bëngayag na hë bëbii nkukuma, ndò fë Zamba angavë bò Saul, mòn Kis, mod ya nda-bod Benyamin, a taṅ mimbu mëwom mënyii,

²²ndò angavaè nyè, atele bò David nkukuma, ndò angadzo ai nyè abòòlò na: Mëyen David[70], ṅnyè ayi bò ṅyian wama osë.

²³A mëki moe ngò Zamba angavë Israel nkode Yesus, anë angakag;

²⁴osusua yë na azu, Yohannes angatari bende nnam Israel osë ṅduan avëṅan.

²⁵Eyòṅ hm Yohannes angambara abim mbil die, nyè na: Miavëg na menë za? Së ki ma mënë nyè. Dzam da, mod azu ma a mvus, a makyëbë ki na mësòdi nyè ngob a mëkol.

²⁶A babëdzaṅ, bòn ya ayòṅ Abraham ai e mina ya miambara Zamba, mina minë ai ebug akode dzi.

²⁷Amu e bod bëtoa a Yerusalem ai bëdzoe baban bandzëki nyè yëm, ndò, a bëdzòsò nyè, bëngadzala bibug bëprofèt ya balaṅ a sabbat osë,

²⁸bò të yen etòm ziṅ a yayean ai awu a nyòl dzie, ndò basili Pilatus na awoe nyè.

²⁹Ndò bamana dzala e mam mësë mëngatilban a nyòl dzie, bësuu nyè a klos, bëfudi nyè a sòṅ.

³⁰Ndò Zamba angavëlë nyè a bëkon,

³¹mëlu mëlu ayenëṅe e bod bëngatye ai nyè a Galilea, bëbëdë a Yerusalem, bod bëte mbò bënë bëbòòlò boe a nnam etoa dzi.

³²Ndò hm bia biabende mina e dzam bëngakag bëtara,

³³na Zamba akpaèn dò abë bia, bòn baban, akuli Yesus a sòṅ, e kan enë ntilan a salmen bèè na: Wa onë mòn wama, ana ngò mëbye wa[71].

³⁴Mbol ahëlë ya nyè a bëkon, ayi ki fë dugan boe, amu angadzo na: Mayi mina vë mfufub maa David[72].

³⁵Asu te fë adzo a salmen mfë na: Wayi ki dzoge na Mfufubu woe aboe a sòṅ[73].

³⁶Mfa David, a mvus ya na amana ya dzala ṅyian Zamba a abog die, ndò awu, ndò bëngaboe nyè ai bë esya, ayënë eboe ya sòṅ.

³⁷Hë da, e nyò ya Zamba angavëlë, andzëki yen eboe ya sòṅ.

³⁸A babëdzaṅ, yëman hm na, asu die ngò bëngabende mina evaè minsëm, (ai e mam mësë ya mvende Moses), mbol ya mingabë ki dzam kyëbë a adzo a mam mëte ai mvende Moses,

³⁹e mod osë ayëbë nyè, abi mëkyëbë.

⁴⁰Mibò okala na të e mam mëngadzoban a bëprofèt mayenan ai mina:

⁴¹Yenan, mina bod bë ebyandi, kaman dò, midimëzan fë, amu e dzam mayi bò a mëlu maan, dzam ya miasëki dzam ṅyëbë ngë bëhë lèè mina dò[74].

⁴²Ndò bakui a nsëṅ, bod bëngakogëlan ai bò na bëdugan bò kad mam mëte e sabbat mbòg atsaag.

⁴³Amana ekoan ngogëlan engaman, abui bë Yuden ai bëyëṅ bënganòṅ ṅyëbë, bëtoa bod bë ngogëlan, bëngabie Paulus ai Barnabas, bò bëngalèè ai bò, bëyini bò na bëbò mban a maa Zamba.

⁴⁴Eyòṅ sabbat angakui, tisòn esë ekoan na yawog ebug Nti.

⁴⁵Ayen Yuden bëngayen minkunda mi bod, bëmana dzie ai ziṅ, bëngatòli e mam Paulus angabë adzoo.

⁴⁶Paulus ai Barnabas bëngakòbò ha ai azombo asë, bò na: Mina bihë yean tari kad ebug Zamba. Ndò hm mbol miatëb dzò, miyënë fë na miakyëbë ki ai enyiṅ kòm, ndò hm biakë a bëhaiden bënë.

⁴⁷Amu nala ngò Nti angabende bia, nyè na: Matele wa na onë mfyè asu bëhaiden, asu yë na obò akode akëlë kui a mëbug më si[75].

⁴⁸Bëhaiden bëngayi wog nala, bëngatag, bëluugu Nti, bëyëbëgë, e ba bësë ya bëngatele asu enyiṅ kòm.

⁴⁹Ndò ebug Nti engatsaman a mal mësë.

⁵⁰Yuden bëngasogolo e mimfaṅ mi bininga midiṅi ngogëlan, ai bëdzoe bë tisòn, ndò bëngatsag efëma ha a nyòl Paulus ai Barnabas, ndò batsidan bò a si dzaban.

⁵¹Ndò të bëngakud mbulug ya mëkol maban, bëkëlë a Ikonium,

⁵²bëyègè bëngadzie ai mintag, ai Mfufub Nsisim.