Read Ewondo Bap 14 Bible Online

Bap 14 - Ewondo bible

Bap 14

¹Ndò fë labò a Ikonium anë angabë bò fulu, bënyian a nda-bikoan Yuden, bëngakòbò e kan yë na mod nkunda Yuden ai bë Grek angayëbë.

²E Yuden bandzëki ṅyëbë ba bëngafòṅòlò, bëfugu ezëṅ a minnëm bëhaiden asu babënyaṅ.

³Bëngatòbò hala ban mëlu, bëkada ebug ai fim ai azombo, bëfidigi Nti ya abòòlò bò a ebug ntotomamaa woe, abò na mëndëm ai biyëṅ bi mam biyenan a mò maban.

⁴Nkunda bod ya tisòn hi okaban hm fò ngam ngam, bëvòg bëtoa ai Yuden, bëvòg ai apostel.

⁵Mbol hm bëhaiden ai Yuden, ai bëdzoe baban bëngazu vëgëlë bò tsag, bëlumu fë bò ngòg,

⁶bò bëyëmë nala, ndò batub a bëtisòn ya Lukania a bënë na: Listra, ai Derba, ai nnam ngòdò hala,

⁷awe ngò bëngabë bëkada mbëmbë foe.

⁸Mod ziṅan gabë a Listra, atoa ebog, atòbògò a mëkol a yob, angabyali nyia a abum ebog, hala abë ya ki wulu tò eyòṅ.

⁹Ndò e mod nyò awog Paulus akòbògò. Paulus abëbë nyè, ayënë na abëlë ṅyëbë ya akodeban,

¹⁰ndò adzo a yob etere na: 'Tëbëgë tëtëlë ai mëkol moe.' Ndò e mod nyò angabumi a si, angawulu.

¹¹Minkunda mingayi yen e dzam Paulus angabò di, bëvëë kiṅa nkòbò Lukania, bò na: Bëzamba bësò a binë mu ai nyòl mod;

¹²Bëngaloe Barnabas na Yupiter, Paulus ṅnyè bëloege na Hermès[76], mbol ṅnyè akalëgi nkòbò.

¹³Tempel Zes[77] angabë a tisòn ha; fada woe angakë ai nyag, ai bikada mëbui a mbè dzal, anë hm ai abui bod ha, na bavë mëtunëṅa.

¹⁴Awogo apostel Barnabas ban Paulus bëngawog e dzam di, ndò bamana nyab biyie biaban, bënyaban a bod ete ha, bëngayedan a yob,

¹⁵bò na: A bod, dze miabò na? Bia fë binë bod anë mina, biakad mina mbëmbë foe na midzoge e bivovol bi mam bi, mivëṅan abë Zamba ya avëë, ṅnyè angakom yob ai si, ai maṅ, ai e byem bisë binë ete.

¹⁶Okoba, angadzoge mëyòṅ mësë na mëwulu a mëzen maban.

¹⁷Tò nala, andzëki dzoge emen nala tègè ai wusnèt, amu angabë abòò mbëṅ, alomo mina mvëṅ a yob ai e mëbog mawum bidi, ndò angadzala mina minnëm ai bidi, ai mintag.

¹⁸Tò nala, nkòbò hi të bò na bod bëwudan, na të bavë bò mëtunëṅa.

¹⁹Ndò Yuden bëngatye a Antiokia ai a Ikonium, bëmana bòlan bod, ndò balum Paulus ngòg, bëkë badudu nyè a si, bëkuli nyè a tisòn a nsëṅ, bëtsogo na bëwoe ya nyè.

²⁰Ndò bëyègè bëngaloṅ nyè edinga a nyòl, atëbë, anyian a tisòn. Amos otsaag hala, ndò ban Barnabas bëngakë a Derba.

²¹Ndò bamana yedan mbëmbë foe a tisòn te, abui bod bëvëṅan fë bëyègè, ndò badugan a Listra, ai Ikonium, ai a Antiokia,

²²bëwonëṅe minnëm bëyègè, bëlëbë fë bò na bëbò mban a ṅyëbë ai na biayean bi abui mindzug, abog te bizu kë nyian a edzoe Zamba.

²³Ndò bëngatòb bënyia-bod-mvia, anë e nda-Zamba nyili, bëngakogëlan, bëkii bidi, ndò bayome bò abë Nti ya bëngayëbë.

²⁴Ndò bakë bakë a Pisidia hala, bëkui a Pamfilia,

²⁵ndò bakad ebug a Perga, bësigi a Atalia,

²⁶bëkodo hala, bëyëmë zen a Antiokia, ahala ngò hm, a ntotomamaa Zamba a yob, bëngavëëban esye ya bëngabë bëdzalëga dzi.

²⁷Akui bëngakui, ndò bamana koan nda-Zamba, bëngalèè e mam mësë ya Zamba angabò ai bò, ai na angayaè bëhaiden mbè ya ṅyëbë.

²⁸Ndò hm bëngatòbò ai babënyaṅ ban mëlu.