Read Ewondo Bap 16 Bible Online

Bap 16 - Ewondo bible

Bap 16

¹Ndò azu kui a Derba ai a Listra[82]. Ṅyègè ziṅan gabë we, dzoe na Timoteus, mòn ngòn Yuden engabë ebëlë ṅyëbë, esya atoa man Grek,

²babënyaṅ ya Listra ai Ikonium bëkama nyè abui.

³Paulus angabë ayi na akë ai nyè, ndò anganòṅ nyè, akëlë nyè, etòm e Yuden bëngabë mimfag mite. Amu bësë bëngabë bëyëmë na esya anë man Grek.

⁴A bëkëlë bakë a bëtisòn ha, bëbendëge bò na bëkala oyili ya apostel ai bënyia-bod-mvia bëngayili a Yerusalem.

⁵Mënda më Zamba mëngawon a ṅyëbë, taṅ dzaban engabui amos osë.

⁶Ndò balod a Frizia ai nnam Galatika; Mfufub Nsisim angatele bò mvende na të kòbò ebug a Azia.

⁷Ndò bazu a Muzias, bëdzëṅë na bakë a Bitinia, nsisim Yesus të bò vë ngul.

⁸Ndò hm basaala Muzias, bësigi a Troas.

⁹Ai alu, ndò Paulus ayen a nlo ha na, mod ziṅ ya Masedonia atëlë, akogëlan ai nyè na: Daṅa a Masedonia mu, ozu bia vòli.

¹⁰Ayen angayen nala a nlo, bingadzëṅ na bikë a Masedonia, mbol bingayen na Zamba aloe bia na bikad bò mbëmbë foe.

¹¹Ndò bingatye a Troas, bikëlë tëtëlë hala a Samotraka; amos otsaag hala, bikëlë a Neapolis,

¹²bikodo hala, bikëë a Filipi, edzëdzala ya Masedonia, si edzoe Roma. Bingatòbò hala ban mëlu.

¹³A amos sabbat, ndò bingakui a mbè tisòn a nsëṅ, babi ai osoe, bitsogo na nda-ngogëlan enë ete, ndò bingatòbò a si, bingalèè ai e bininga bëngamana sòṅ hala.

¹⁴Ndò mininga ziṅ, dzoe na Lidia, (abòò makit ai eyie abui mòni yavie), asòò a Tiatira, ambarëga Zamba, angavogolo ha; Nti angayaè nyè nnëm na avogolo e mam ya Paulus angabë akòbògò.

¹⁵Eyòṅ angaduuban ha ai nda-bod dzie esë, ndò akogëlan ai bia, nyè na: Ngë mina miyen na mayëbë Nti, zaan a nda dzama, mitòbò ete. Angayag fò bia a kiṅa i dzam te.

¹⁶Angabò hm na, eyòṅ bingakë a ngogëlan ha, ndò man mininga bisye atoban ai bia, abëlë nsisim mvigi; man mininga te angasye bati boe abui mòni ai mvigi te.

¹⁷Ndò angazu abie Paulus ai bia bësë, abama a yob, nyè na: E bod ba bënë bësye bë Zamba ya minkut ete, mbò bayedan mina zen akode.

¹⁸Angabò e dzam di ha mëlu mëlu. Mbol Paulus angatëg ai adzo te, ndò akilan, akòbò ai ngul nsisim na: Madzo ai wa a dzoe Yesus Kristus na okodo nyè a nyòl. Ndò fë akodo awola te aben.

¹⁹Bati boe bëngayi yen na afidi mëbugëban daban adzaṅ ya, ndò babi Paulus ban Silas, bëkë badudu bò a nsëṅ angara a bëtëbë bë osu,

²⁰ndò bakë ai bò a bëtsigi bë ntol bënen, bò na: E bod ba bamana bia dzugulu nnam, bënë Yuden,

²¹ndò bayedan mëtum ya biayëm ki baala ngë abò mò, mbol bia binë ban bë Roma.

²²Nnam osë ongawog bò abe, bëtsigi bë ntol bëmana nyab biwòman biaban, ndò babende na bëyit bò;

²³Ndò bëngayit bò abui, bëwoa bò a mbog, ndò babende nnòni mimbog na atoan bò kala.

²⁴Angayi wog abende di, ndò nnòni mimbog nyò anganòṅ bò, afudi bò a mbog ya a nnëm etere, amana bò faṅ mëkol a mbog.

²⁵Dzam bò ai zaṅa lu ha, Paulus ban Silas bëngakogëlan, bëyiaga Zamba bia, e mimbog mivòg mingavogolo bò.

²⁶Etye etye na, ndò si engatigëdan eyëgan e kan yë na mimfim ya nda-mimbog mingafoṅan. Ndò fë mimbè misë mingayaaban, mësuṅ mësòdan.

²⁷Ndò nnòni mimbog ahëbë, antala anë mimbè mimbog miyoo, ndò adudu nyamëla okëṅ dzie, antëlë na awoe emen, amu atsogo na mimbog mimana tub.

²⁸Ndò Paulus azu dzo a yob ete na: Obë bò wamen abe ziṅ, amu bia bësë binë ha.

²⁹Ndò abò na bëzu ai ngoe, avolo nyian ha, anganyaman, ndò aku Paulus ban Silas osu,

³⁰akui ai bò a nsëṅ, nyè ai bò na: A e bod ba, mayean bò dze na mëkodeban?

³¹Bò na: Yëbëgë Nti Yesus, abog te wayi kodeban, ai wa, ai nda-bod dzoe esë.

³²Ndò bëngakad nyè ebug Nti, ai nyè ai e bod bësë bëngabë a nda dzie.

³³Ndò anòṅ bò ai alu te asë, amana bò sob mëki më ebom, ndò angaduuban, ai nyè ai emboe bësë etye etye te;

³⁴Ndò akë ai bò a nda, abòò bò bidi, angatag ai nda-bod dzie esë mbol angayëbë Zamba.

³⁵Kidi engayi lëndë, ndò bëtsigi bë ntol balom bod baban, bò na: Kaṅan soe e bod bala.

³⁶Ndò nnòni azu lèè Paulus e dzam di nyè na: «bëtsigi bë ntol bëlom mina soe. Ndò hm, etoa dzi, kuan, mikëlë mvoè.»

³⁷Paulus nyè ai bò na: ṅnyie anë mimana ya bia yit a bod ete, tègè ai na bisie etòm ziṅ, bia binë hm bòn bë Roma, mifudi bia a mbog, ndò etoa dzi mingayi ya bia soe a omomoa nga? Tègè ai dzom ziṅ nala! Bò bëben bëzaag bia kuli a nsëṅ!

³⁸Ndò e bod ba bakë kad bëtsigi bë ntol nkòbò hi. Awogo bëngawog na bënë bòn bë Roma, bëngakòn wòṅ,

³⁹ndò bazu kogëlan ai bò, bëkuli bò a nsëṅ, ndò basili bò na bëkodo të bò a dzal.

⁴⁰Akui bëngakui a mimbog, ndò bakë abë Lidia, ndò bayen babënyaṅ, bëmana bò wone, ndò batye, bëkëlëg.