Read Ewondo Bap 17 Bible Online

Bap 17 - Ewondo bible

Bap 17

¹Ndò balod a Amfipolis ai a Apolonia, bëkëlë a Tesalonika mfag nda-bikoan Yuden engabë.

²Ndò Paulus angakë nyian abë bò, mbol fulu dzie engabë, bësabbat bëlè, alaṅëdan ai bò bibug ya mfufub ntilan,

³afëlëgan, alëdëgë na Kristus angabë ayean dzugi mintye, akui a bëkon, ai na: 'Kristus te ṅnyè mabende mina.'

⁴Bëvòg ya abë bò bëyëbë fò, bëbaman fë ai Paulus ban Silas, mod nkunda bë Grek, bod bë ngogëlan, ai abui mimfaṅ mi bininga.

⁵Yuden bëngabò mbë nnëm ha, ndò bamana koan bëbe bëzëzë bë bod ya nsëṅ angara, bëngabò engëngam a tisòn, ndò bazu a nda Yason, bëngadzëṅ bò, na bëzu ai bò a bod ete.

⁶Mbol bandzëki bò yen ete, ndò bakë ai Yason, ai babënyaṅ bëfë hala abë bëdzoe bë tisòn, bëngabam, bò na: E bod bakë badzugulu si esë bësò ya kui abë bia,

⁷mbò Yason asoan ai bò. Bò bësë badaṅ mëmvende më Kaizer mbol batele nkukuma mfë bò na ṅnyè anë Yesus.

⁸Nnam ai bëdzoe bë tisòn bëngayi wog e mam ma, fëg engadzaṅ bò.

⁹Ndò Yason ai e bod bëvòg bëngayaan eban, ndò basoe bò.

¹⁰Etye etye te, ai alu ha, ndò babënyaṅ bëngalom Paulus ban Silas a Beroa. Akui bëngakui we, ndò bakë a nda-bikoan Yuden.

¹¹E Yuden ba bëngabë evovoe abui, alodo e ba ya Tesalonika, ndò bëngayëbë ebug ai evag, anë amos, bëbindigi ntilan, na bëyen kamëna eyë mam mëte mënë nala.

¹²Abui ya abë bò bëngayëbë, ai abui mimfaṅ mi bininga bë Grek, ai fam.

¹³Yuden ya Tesalonika bëngayi yëm na Paulus ayedan ebug Zamba a Beroa, ndò bakë we, bëngafòṅòlò bod, bëdzèègè bò fëg.

¹⁴Etye te, ndò babënyaṅ bëngalom Paulus na akë, akëlë kui a maṅ, ndò Silas ban Timoteus bëngaligi hala.

¹⁵Ndò hm bënganòṅ Paulus, bëkëlë ai nyè a Atena, ndò badugan ai mbanda hi asu Silas ban Timoteus na bëtye avol avol, bëkë nyè kòb we.

¹⁶Ntye Paulus ayanga bò ha, ndò nnëm wamana nyè dig ai olun a abum, mbol tisòn engabë atuud ai bëzëzë bëzamba.

¹⁷Angakad hm laṅëdan a nda-bikoan ai Yuden, ai bod bë ngogëlan, ai e bod ya atoban ai bò amos osë a angara.

¹⁸Mimfëfëg miziṅ ya ngam Epikurea ai a ngam Stoa[83] bëngafëdan ai nyè, bëvòg bëngadzo na: Ayiyi na adzo dze ai nlòban alòb hi? Bëvòg bò na: Ayene anë anë mbëgë foe bëzamba bëfë; mbol angabë ayedëgan Yesus ai akui-lë sòṅ.

¹⁹Ndò banòṅ nyè, bëkëlë ai nyè a Areopagus[84], bò na: Yë binë fò dzam yëm akyaè mkpamaṅ ayëgëlë wayëgële hi onë?

²⁰Amu wazu ai bia biyëṅ bi mam a mëlò. Biayi na biayëm mbol mam mëte matyan.

²¹Bod bësë ya Atena ai bëyëṅ ya ete bëngabë hë minlaṅ, bëyii na bayëm ngë mkpamaṅ ziṅ onë a nnam.

²²Ndò Paulus angatëbë a zaṅ Areopagus, nyè na: 'A bod ya Atena, mayen na mialugu Zamba a dzam asë.

²³Amu, a mëhë kë mawulu, makë mayen byem bi olugu bian, ndò mëyen alatar ai ntilan vi na: Asu «e zamba ya biayëm ki». E dzi ya miazu ya mialugu, të dzò yem, ndzò hm mabende mina.

²⁴E Zamba angakom si esë ai e byem bisë binë ete, ṅnyè anë Nti yob ai si; atoa ki a bëtempel bëngaloṅ ai mò,

²⁵basye ki nyè ai mò më bod, -antoa hë anë ayaṅan të ai dzom ziṅ,- ṅnyè avë bisë enyiṅ, ai ṅhëbë, ai byem bisë.

²⁶Atyege abë mod mbòg mbòg, ndò angakom ayòṅ bod asë ya atoa a si-ndon, ṅnyè atele mëbog më mbu, atele fë bitòbògò biaban,

²⁷na bëdzëṅ Zamba, kama të na bënë nyè dzam wodan, bëyënë fë nyè, ndò fë asëki ai mod osë ya abë bia oyab.

²⁸Amu bianyiṅ a bë nyè, bifoṅan, bitoa abë nyè, akyaè ya bëyia bë mvèt baan bëngadzo na: Kë amu binë mvòṅ bod dzie!

²⁹Mbol hm binë mvòṅ bod Zamba, biayean ki tsog na Zamba afulan ai mvòd, ngë silba, ngë ngòg, ngë dzom ya akëṅ ngë fëg mod engabonde.

³⁰Mbol ya Zamba angabudi mis a mëbog më ndimi mëte, abende hm bod etoa dzi na bëvëṅan hom osë,

³¹amu angatele amos ya ayi tsig si-ndon ntol a sosoo, abë e mod angatele, avëë nyè ndi a bod bësë, mbol angakuli nyè a bëkon.

³²Bëngayi wog etudi akui-lë sòṅ ya bëwu, bëvòg bëngawoe, bëvòg bò na: Bimvogolo fë wa e dili amos mfë.

³³Na, ndò Paulus angakodo abë bò hala.

³⁴Bod bëziṅ bëngalad të nyè a nyòl ha, bëngayëbë, bëvòg ya ete moe na: Dionisius ya Areopagus, ai mininga dzoe na Damaris, ai bod bëfë fë esamba ai bò hala.