Read Ewondo Bap 18 Bible Online

Bap 18 - Ewondo bible

Bap 18

¹A mvus hala, ndò angakaèn ai bod ya Atena, akëlë a Korinti.

²Ndò atoban ai man Yuden dzoe na Akila, byalibyali ya Pontus, hala andëm sòṅ a Italien, ai ngal Priskila, mbol Klaudius angavë abende na Yuden bësë bëkodo a Roma; ndò akë abë bò;

³mbol hm bò bësë bëngabë bëyëmë asu esye da, ndò angatòbò abë bò, angasye. Bëngabë bëloṅo bëtende.

⁴Akarëga kë laṅëdan a nda-bikoan a sabbat osë, adzëṅë na atoe Yuden ai Grek biboṅ.

⁵Asòò Silas ban Timoteus bëngasò a Masedonia, Paulus antoa evag eyëgan a akad ebug, ayini Yuden na Yesus anë Kristus.

⁶Mbol bëfëdan ai adzo te abui, bëmgbaligi fë nyè, ndò asamëza biyie bie, nyè ai bò na: Mëki maan mësoeban mina a nlo. Atarigi etoa dzi, zen enë ma fili na mazu kë a bëhaiden.

⁷Akodo hala, akëlë a nda mod ziṅ dzoe na Titus Yustus, mod te alugu Zamba; nda dzie engabë babi ai nda-bikoan.

⁸Krispus, ndzoe nda-bikoan, ayëbë Nti, ai nyè ai nda-bod dzie esë, ndò fë abui bod ya Korinti bëngawog, bëyëbë, bëngaduuban.

⁹Ndò Nti adzo ai Paulus a nlo ai alu na: Obë mbara. Kòbògò hë nkòban, të waku evol,

¹⁰amu mënë ai wa, ndò fë mod ayi ki wa tsag etòm na abò wa abe, amu yë na abui bod bënë ma e tisòn nyi.

¹¹Ndò angabombo hala nguma mbu ai ngòn esaman, ayëgëlë bò ebug Zamba.

¹²Galius atoa eyian edzoe a Akaia, ndò Yuden bësë bëngawoe oyili, bëbii Paulus, bëkë ai nyè a nsëṅ mëdzo,

¹³bò na: E mod nyò asòṅ bod na bëlugu Zamba të baala mvende.

¹⁴Paulus adzo na ayaè anyu, Galius nyè ai Yuden na: Ngë atoa asu etòm ziṅ, a Yuden, ngë matoan vogolo sòman dzaan,

¹⁵ngë etòm enë asu ayëgëlë ai moe, ai mvende dzaan, mina bëben yenan. Mayi ki bò ntsigi ntol e mam mala.

¹⁶Ndò angakuli bò a nda-mëdzo a nsëṅ.

¹⁷Ndò bò bësë bëngabi Sosten, ndzoe nda-bikoan, bëngayit nyè hala, a nsëṅ nda-mëdzo. Galius të bisi tò dzam ete.

¹⁸Paulus angadugan tòbò hala ban mëlu ai babënyaṅ, ndò ayaan ai bò, ayëmë zen a Siria, Priskila ai Akila bënë ai nyè eyòṅ ha; angasode nlo[85] a Kenkrea, amu angalig mëtiṅ nala.

¹⁹Ndò bakui a Efesi, aligi bò hala, nyè akëlë a nda-bikoan, angalaṅëdan ai Yuden.

²⁰Ndò bakogëlan ai nyè na atòbò hala man eban, nyè të yëbë,

²¹dzam da, ndò ayaan ai bò, nyè na: Mayi dugan sòṅ a bë mina, ngë Zamba adiṅ. Ndò atye a Efesi,

²²asusu a Sezarea, abëdë, akë sug nda-Zamba, ndò atye, akëlë a Antiokia.

²³Ndò angabombo hala eban, angakë akë a minnam ya Galatika ai Frizia, akë awone bëyègè bësë.

²⁴Man Yuden ziṅ, dzoe na Apolos, byalibyali ya Alesandria, ayëmë nkòbò ha, angasuan a Efesi, ayëmë mfufub ntilan mbëṅ.

²⁵Bëngayëgëlë nyè zen Nti, angavu ha, akë alèè, ayëgëlë mam më Yesus mbëṅ mbëṅ, afyaṅan bò na ayëmë hë ṅduan Yohannes.

²⁶Ndò hm akaè na akòbò ai fim a nda-bikoan. Priskila ban Akila bëwogo nyè ha, ndò baloe nyè a fëfël, bëngatoan nyè timi zen Zamba.

²⁷Mbol ayi na adaṅ a Akaia, babënyaṅ bëwogo fò nala mbëṅ, ndò batil bëyègè na bëbëlan ai nyè; Angayi kui we, angavòli bëyëbë abui ai maa.

²⁸Amu atoege Yuden biboṅ mbëṅ, a bod ete, alëdëgë bò ai mfufub ntilan na Yesus anë Kristus.