Read Ewondo Bap 19 Bible Online

Bap 19 - Ewondo bible

Bap 19

¹Ndò hm labò ha na, Apolos angabë a Korinti, ndò Paulus akalan a mvus nnam ha, asuan a Efesi, atoban ai bëyègè bëziṅ,

²nyè ai bò na: Yë mingabi Mfufub Nsisim eyòṅ mingasò a ṅyëbë? Bò ai nyè na: Biabëbë ya ki wog na Mfufub Nsisim anë.

³Ndò afèd, nyè na: Mingaduuban a dze? Bò na: Bingaduuban ṅduan Yohannes.

⁴Paulus nyè na: Yohannes angadu ṅduan avëṅan, akada bod na bëyëbë e mod azu nyè a mvus, na bëyëbë Yesus.

⁵Bëngayi wog nala, ndò bëngaduuban a dzoe Nti Yesus,

⁶ndò Paulus abede bò mò, Mfufub Nsisim asòò bò a nyòl, bëngakòbò minkòbò, bëkada mam bëprofèt.

⁷Bod bëte bësë bëngabë dzam bò awom ai bëbè.

⁸Ndò anyian a nda-bikoan, angakad kòbò hala ngòn ngòn elè, alaṅëdan, ayini mam më edzoe Zamba.

⁹Mbol bëvòg bëbòò aled-minnëm, bëbòò fë mëlò, ndò alig bò, anòṅò bëyègè, angayëgëlë bò amos osë a sikulu Tiranus.

¹⁰Nala ongaboban mimbu mimbu mibè, e ndie yë na, e bod bësë bëtoa a Azia bëngawog ebug Nti, tò Yuden, tò Grek.

¹¹Zamba angabò mimfaṅ biyëṅ bi mam a mò më Paulus,

¹²e kan yë na bënòṅò bënapken ai biyie ya bihë namba nyè, bëkëlë biè bede minkokòn, akòn daban angamana lèd, bëbe minsisim bëtubu.

¹³Mingëngaṅ mi Yuden miziṅ ya bëkëlë bawulu nala mingadzëṅ na mialoe dzoe Yesus na basye e bod bëmbë bëlë bëbe minsisim, bò na: 'Mavu wa sòṅ a dzoe e Yesus ya Paulus ayedan.'

¹⁴Bòn bë fada nen Yuden ziṅ dzoe na Skeva, bò zamgbal, mbò bëbòò e dzam di.

¹⁵Ndò mbë nsisim adzo ai bò na: Mayëm Yesus, mëyëmë fë Paulus, mina minë bëza?

¹⁶Ndò e mod mbë nsisim angabë a nyòl nyò ayëlë bò a nyòl, ayëmë ai bò, abada bò. Bëngabë bëtubu a nda te hë minsò ai mëvëṅ a nyòl.

¹⁷E Yuden bësë ai Grek bënyiṅi a Efesi bëngayëm e dzam di, ndò wòṅ ongaku bò bësë a nyòl, bëngalugu dzoe Nti Yesus.

¹⁸Abui bod ya bëngayëbë bëngazu, bëmëmë, bëkulan mëkëṅ maban.

¹⁹Abui bod ya bëbòò mëbiaṅ bëngamana sòṅ ai bëkalara, bëmana digi a mis më bod bësë, ndò balaṅ taṅ, bëyënë na minsaṅ mi silba tòzin mëwom mëtan.

²⁰Na, ai ngul Nti, ebug engabë enaṅa, ewonëban.

²¹A mvus e mam ma, ndò Paulus anòṅ oyili na azu daṅ a Masedonia ai Akaia, akëlë a Yerusalem. Nyè na: A mvus yë hala, mayean kë yen Roma.

²²Ndò alom bëkè boe bëbè, Timoteus ban Erastus a Masedonia. Emen aligi ban mëlu a Azia.

²³Mëlu mëte, mod etòm abole asu zen.

²⁴Amu mod ziṅ dzoe na Demetrius, nlui byem bi mvòd, akarëga kom byem bi olugu Artemis ai silba, bod bisye boe bëdzaa mòni etere abui,

²⁵ndò aloe bò ai e ba bësë bësye kan te, nyè na: A bod, kë miayëm na eyë biayen enyiṅ a esye dzi a!

²⁶Ndò miayen miwogo fë na, së ki hë a Efesi ha, dzam bò a nnam Azia osë, e Paulus nyò akë amana sòṅ bod abui, adzo na e byem ya bakom ai mò biasë ki bëzamba.

²⁷Ndò hm, së ki hë makit maan mmò mazu ku a si etam, tò ben tempel zamba mininga Artemis nënë azu wu ntug, bayi nyè vaè olugu woe, abim anë nnam Azia osë ai si esë bialugu nyè!

²⁸Mbol bod bëngawog nala, bëmana wog olun, bëngabam, bò na: Artemis ya Efesi anë dzom nen!

²⁹Ndò tisòn engadzie ai engongom, bò bësë bëkuban a nsëṅ bivoe, bakë badudu Gaius ai Aristarkus ya Masedonia, biyòṅ bi Paulus.

³⁰Paulus angayi ha na anyian a bod ete, ndò bëyègè bandzëki nyè dzoge.

³¹Bod bëziṅ ya edzoe ya Azia, bëmvoe boe, bëlomo nyè kad na të akë a nsëṅ bivoe.

³²Bëvòg bëbama na, e ba bëvòg bëbama mbol mfë. Amu fëg engadzaṅ ekoan bod dzi, abui bod të toan yëm asu dze ben bëngakoan ete.

³³Ndò Yuden bazu tele Alesander osu. Alesander nyè ai bod na bëku bivol, ayi na atimi bod e dzom yalod.

³⁴Ṅnyie anë bëngayëm na anë man Yuden, ndò bësë babede kiṅa yob, dzam bò mëwola mëwola mëbè, bò na: Artemis ya Efesi anë dzom nen!

³⁵Ndò nsaṅa bëkalara angasuu nnam minnëm a si, nyè na: A bod ya Efesi, mod mfe ayëm ki na tisòn ya Efesi endzò yakala nda Artemis nen ai ehëgëlë yasò a yob?

³⁶Mbol hm asëki dzam bisoo, miayean vòli minnëm, të miabò nduduman.

³⁷Amu misò ai e bod ba, bò ha basëki endaman, ndò fë bandzëki mgbali zamba waan.

³⁸Ngë Demetrius ai bod boe bëbëlë hm etòm ai mod, mëmos mëdzo mënë, eyian edzoe etoa fë, bëkëlë dzòs mëdzo maban.

³⁹Ngë miadzëṅ hm dzam afë, layi komëban a ekoan nnam.

⁴⁰Amu bënë bia dzam sòman na biadzugulu nnam ana, bia tègè ai mbol binë dzam timi abui enyënyam asë di. Ndò angakòbò nala, asoe ekoan nnam.