Read Ewondo Bap 2 Bible Online

Bap 2 - Ewondo bible

Bap 2

¹Ndò hm, eyòṅ lëngabò na amos Pentekoste[9] ongazu ya mana, bò bësë bëntoa hom mbòg.

²Etye etye na, ndò eduṅ engasò a yob, hë anë mod nkulu, ndò engadzie nguma nda osë bëngabë bëtoa ete,

³bëngayen ayëm lakë lakaban anë ndoan, angatòbò anë mod osë ya abë bò a nlo a yob,

⁴ndò bò bësë bëngadzie ai Mfufub Nsisim, bëtari hm na bakòbò a minkòbò mifë[10], e kan nsisim ongabë obò na bëfala nkòbò.

⁵Yuden bëngabë bëtoa a Yerusalem, bëtoa bod bë ṅyëbë, bësòò a mëyòṅ mësë ya si.

⁶E mod eduṅ nyò angayi bò, mod nkunda bod abugi fò ha, bëmana koan, bëngakam, amu anë mod awogo bò anë bakòbò nkòbò woe.

⁷Fëg engadzaṅ fò bò, bëngakam, bò na: «Nga e bod bësë bakòbò ba bënë bod ya Galilea?

⁸Ndò eyë anë ya na biawog bò, anë mod a nkòbò waan ya bingabyali ai wa?

⁹Bia ha bod ya Partia ai Medina, bod ya Elam, ai e ba bëtoa a Mezopotamia, a Yudea ai a Kapadokia, a Pontus ai a Azia,

¹⁰Frizia ai Pamfilia, Egipten, bod ya basò a mfag Libia ya Sirena, ai e bëyëṅ basò a Roma,

¹¹Yuden ai e ba bëngavëṅan a ṅyëbë Yuden, Kreta ai Arabia, biawog bò bëkòbògò minkòbò mian, bëlèègè biyëṅ bi mam bi Zamba».

¹²Fëg edzaṅa fò bò, bënzëmë, bëngadzo, anë mod ai e nyò mbòg na: «Na ngò watyan ya ana?»

¹³Bëvòg bëngamgbali fò bò, bò na: «Bënë mbilan wayn».

¹⁴Ndò Petrus angatëbë a si ai bë awom ai mbògò, ndò avë kiṅ, nyè ai bò na: «Mina e Yuden ai e bod bësë mitoa a Yerusalem, yëman e dzam di, mivogolo fë bibug biama.

¹⁵Amu së ki anë mbol miatsog na e bod ba basòg mëyòg, (amu bingënë bibëlë hë awola lala ya amos[11]),

¹⁶hë da, dzam te ndò profèt Yoel angakòbò na:

¹⁷Layi bò na, a mëmos më mvua, Zamba ṅnyè akòbò nala, mayi soe Mfufub Nsisim wama abë mod osë, abog te bëndoman baan ai bëngòn baan bayi kèè na bakòbò anë bëprofet, binanga bian biayi yen mam a nlo, minnom mingayen biyëyëm a nlo;

¹⁸abog te ma mayi soe nsisim wama a nyòl bësye bama, fam ai bininga, mëmos mëte, bëngakòbò anë bëprofet.

¹⁹Mayi bò biyëṅ bi mam a yob ete, ai mëndëm a si, mëki ai ndoan ai nkut otsida.

²⁰Nlo-dzobo ayi vëṅan dibi, ngòn evëṅan mëki, osusua yë na amos duma ai amos nen Nti wazu.

²¹Ndò layi bò na, e mod osë ayi loe Nti ayi kodeban[12].

²²A bod ya Israel, vogolan e bibug bi; E Yesus man Nazaret ya Zamba angatele mina a zaṅ ai mimboan mi ngul, ai biyëṅ bi mam, ai e mëndëm Zamba angabò a mò moe a zaṅ dzaan, akyaè ya mina bëben miayëm,

²³Yesus te ṅnyè mingawoe, mibomë nyè a klos a mò më e bod bayëm ki mvende, abog ya angatilban, Zamba ayëmë fë nala, ndò angavë mina nyè,

²⁴ṅnyè hm Zamba angakuli a sòṅ, atii angatii mësuṅ më awu, mbol awu angabë ki nyè dzam bi nkom.

²⁵Amu David adzo asu die na: Mayen Nti atëlë ma osu abog asë, amu atëlë ma a mbo-nnomo na mëzaa nyaman.

²⁶Asu te nnëm wama wafon, oyëm wama otaga, alodo anë nyòl dzama yanyiṅ ai afidi,

²⁷amu wayi ki ma voan nsisim a bëkon, tò ki na odzoge na mfufubu woe aboe a si.

²⁸Ongalëdë ma mëzen më enyiṅ, wayi ma dzala ai mintag a mis moe[13].

²⁹A babëdzaṅ, dzogan ma mëtoan mina kad adzo tara David bëbëla na, Angawu, adzëban, ndò fë sòṅ dzie enë abë bia azaag kui amos hi.

³⁰Mbol angabë profèt, ndò angayëm na Zamba angakani nyè sòṅ na mod ya abum die ayi tòbò a etoa-edzoe dzie[14].

³¹Mbol angayen dò osusua, ndò akòbò adzo akui-lë sòṅ Kristus na: Ayi ki laṅan a tolendoṅ, ndò fë nyòl dzie yayi ki boe a si[15].

³²Yesus te ṅnyè Zamba avëlë a bëkon, ṅnyè bia bësë binë bëbòòlò boe.

³³Mbol mbo-nnomo Zamba angabede nyè, ndò anganòṅ ekaa Mfufub Nsisim abë esya, asoe nyè, akyaè ya miayen, miwogo fë di.

³⁴Amu, tò anë David andzëki bed a yob, adzo na: Nti angadzo ai Nti wama na: Tòbògò ma a mbo-nnomo

³⁵akëlë kui anë mabò minziziṅ mie etele mëkol dzoe[16].

³⁶Ndò hm, nda-bod esë ya Israel eyëmë na e Yesus ya mina mingabomë a klos, ṅnyè Zamba atele Nti ai Kristus».

³⁷Awogo bëngawog nala, nnëm ongakod bò a abum ha, bò ai Petrus ai apostel bëvòg na: «Bibò hm ya, a babëdzaṅ?»

³⁸Petrus nyè ai bò na: «Tsendëgan, mod osë ya abë mina aduuban a dzoe Yesus Kristus[17] asu evaè minsëm dzaan, abog te miayi bëlë efaè Mfufub Nsisim.

³⁹Amu, mina, ai bòn ban, ai e bod bësë bënë oyab, ai e taṅ bod esë Nti Zamba waan angaloe, mina minë ai ngaga».

⁴⁰Angabë hm fë alëbë bò, akòbògò ai bò nala ai abui bibug afë, nyè na: «Mikodeban ya a zaṅ e mvòṅ bod dzongo nyi».

⁴¹E bod ba bëyëbë fò ebug dzie, bëduuban, ndò bod bëngabagëban bò a yob amos te dzam bò bakuda bëlè.

⁴²Bëngabë mban a ayëgëlë apostel, bëtoa ai bò fufulu, tò a mbëgan mbaṅëla[18], tò a ngogëlan.

⁴³Mod osë angabë hë wòṅ, abui biyëṅ bi mam ai mëndëm bibòòban a mò bë apostel.

⁴⁴E bod bësë bëyëbëgë bëngabë hom mbòg, bëbëlë dzom esë fufulu,

⁴⁵bëngabë manëṅa kuan ai akuma, ai byem bi mò biaban, bëngakab biè a zaṅ bò a bò ha, anë mod, abim ayaṅan ai dò.

⁴⁶Amos osë, bò bësë, nnëm mbòg mbòg, bëkëlë a tempel[19], bëbëgë mbaṅëla a mënda maban, bëkaban bidi ai mintag, ai dzin a nnëm,

⁴⁷bëluugu Zamba, bod bësë bëkama bò. Nti abaag bò e bod bëkodeban a yob amos osë.