Read Ewondo Bap 20 Bible Online

Bap 20 - Ewondo bible

Bap 20

¹Eyòṅ engongom engaman, ndò Paulus alom loe bëyègè, angawone bò, asugu bò, ndò angatye, akëlë a Masedonia.

²Ndò akë adaṅ minnam mite, akë awone bò ai abui bibug, asò kui a nnam Grek,

³abombo hala ngòn elè. Atëlë na akë a Siria, Yuden bëngalam nyè, ndò ayili na adugan, akë lod a nnam Masedonia.

⁴Sopatros, mòn Pirrus ya Beroa, Aristarkus ai Sekundus ya Tesalonika, Gaius ya Derba ai Timoteus, Tikikos ai Trofim ya Azia bënë ai nyè eyòṅ ha.

⁵Ndò bakë osu, bëkë bia yanga a Troas;

⁶mfa waan, a mvus mëmos bivovoe bi mbaṅëla, ndò bingayëm dulu, bitye a Filipi, bisò bò kòb a Troas a mvus mëlu mëtan, ndò bingabombo hala mëlu zamgbal.

⁷A amos osu ya sòndò[86], bimana ya koan ha na biabëg mbaṅëla, Paulus angalèè ai bia ha, mbol ayean kë a dulu e kidi lende ya hala, ndò angandama nkòbò akui a zaṅ-alu.

⁸Abui mëlamba mëngabë a nda-yob, mfa bingabë nkoan.

⁹Ndò ndoman mod ziṅ, dzoe na Etukos, angatòbò a wundi, oyò ongandëṅ nyè a mis ha abui, amu Paulus angabë hë akëlë ai nkòbò osu, ndò oyò ongalod nyè nkoṅ, ndò asòdan a nda lala a yob, akuu a si, bëngabodo nyè hë mbim.

¹⁰Ndò Paulus asus, adiban nyè a nyòl, awuban ai nyè, nyè na: Të miabò enyënyam, amu enyiṅ enë nyè a nyòl.

¹¹Ndò abed, abëgë mbaṅëla, angadi, ndò adugan bodo nkòbò kòm, akui a kidi yalende, na, ndò azu tye.

¹²Ndò banòṅ e mòngò nyò atala, bëmbëlë ngul a nyòl ha abui.

¹³Bia bingakë osu, a mal, bisuan a Asos, etere ngò biyean nòṅ Paulus, amu emen angamana kom nala, ayi na awulu a nkot si.

¹⁴Eyòṅ angatoban ai bia a Asos, ndò bianòṅ nyè, bikëlë a Mitilene,

¹⁵ndò bingadugan tye hala amos otsaag, bisò kui a Kios ayat, amos mbòg, bikui a Samos, amos otsaag bisò kui a Miletus.

¹⁶Paulus angayen na biayean saala Efesi, asu yë na të adugan bombo a Azia. Amu ayi du na, ngë anë ebugbu, atòbò a Yerusalem a amos Pentekoste.

¹⁷Atoa a Miletus, ndò angalom loe bënyia-bod-mvia ya nda-Zamba a Efesi.

¹⁸Asuan bëngasuan abë nyè, nyè ai bò na: Mina bëben miayëm akyaè mënganyiṅ ai mina, atarigi amos osu ya mëngatele akol a Azia,

¹⁹mësye Nti ai edzòdi nyòl esë, ai bibëga a mis, ai e mëbobëla ya Yuden bëngalam ma,

²⁰miayëm na mandzëki mina sòli man dzam ziṅ atoa ai mfi, mëbò të mina nyè kad, mëyëgëlë mina a mënda mënda ai a bod etere,

²¹mëbende Yuden ai Grek avëṅan abë Zamba ai ṅyëbë bayëbë Nti waan Yesus a kpaam.

²²Ndò hm etoa dzi, Nsisim wabi ma, mëbëlë na mëkëlë a Yerusalem, ma tègè yëm e dzam layanga ma we,

²³hë na, Mfufub Nsisim wabòòlò ma a tisòn esë na mësuṅ ai mindzug biayanga ma.

²⁴Dzam da, madaṅ ki yen na enyiṅ enë ai ma mfi, hë na mëmana mbara mbil wama, mëmana fë esye ya Nti Yesus angavë ma, na mëbòòlò mbëmbë foe ntotomamaa Zamba.

²⁵Etoa dzi hm, mayëm na e mina bësë ba a mëkëlë mayedan edzoe a zaṅ dzaan, miayi ki fë ma dugan yen asu.

²⁶Asu te makad mina amos di na mënë a saaṅ asu mëki maan mina bësë.

²⁷Amu mandzëki mina dimi akad ṅyian Zamba osë.

²⁸Kalëgan mina bëben, ai nkunda osë ya Mfufub Nsisim ongatele mina bë asu zoa na mikala nda-Zamba ya angakus a mëki moe.

²⁹Mamen mayëm fë na, ṅnyie anë mayi tye, ayòg zë layi sò abë mina, tègè ai nyindi,

³⁰ndò ben fë bod bëziṅ ya zaṅ dzaan bayi tëbë, bëngakòbò të dòkten mvol asu yë na bëdudu bëyègè a batoṅ bò.

³¹Asu te hm, mikalëga, mitsogo na, mimbu mimbu milè, mandzëki mina vòd lëb, ai bibëga a mis, mbombòg mbombòg.

³²Etoa dzi hm, malig mina a mò më Zamba, ai a ebug ntotomamaa woe, ṅnyè anë dzam loṅ, avaa fë ngab elig a zaṅ e ba bësë bënë mimfufub.

³³Mandzëki yi silba mod ziṅ, tò ki mvòd ngë ewòman.

³⁴Mina bëben miayëm na e mò mama ma mëngasye asu mëyaṅan mama ai e ma më e bod bëngabë ai ma fufulu.

³⁵Mëngalëdë mina mvulna a dzom esë na eyòṅ mod wasye nala, wavòli mintèd, bitsogo hm fë bibug ya Nti Yesus angakòbò na: Anë maa abui, eyòṅ wavë alodo anë eyòṅ waanòṅ.

³⁶Akòbògò nala, ndò akud mëbòṅ ai bò bësë, angakogëlan.

³⁷Bëngayon fò abui, bëngawuban ai Paulus a kiṅ,

³⁸bëbëlë abui mëlunga ha ai ebug angadzo na bayi ki dugan yen asu die. Ndò bakë nyè lëdë a mal.