Read Ewondo Bap 21 Bible Online

Bap 21 - Ewondo bible

Bap 21

¹Eyòṅ hm bingatye ai dulu, na bimana ya yaan ai bò, ndò biawulu tëtëlë, bikui a Kos, amos samëna bikui a Rodos, bikodo hala bikui a Patara,

²ndò biayen titimi edaṅa a Fenisia, bibëdë ete, ndò biakë.

³Bingayi yen Sipra nali, ndò bialig nyè a mbo-ngala, bikëlë a Siria, bisusu a si a Tir. Amu etere ngò bësuugu mimbëgë ya titimi.

⁴Ndò biatoban ai bëyègè hala, bibombo hala mëlu zamgbal; ndò bakad Paulus ai ngul nsisim na të abed a Yerusalem.

⁵Eyòṅ mëlu maan mëngatoban, ndò bingatye, bikëlë. Bësë bëngazu yaan ai bia, ai bininga ai bòngò, azaag kui a ṅnyie tisòn, ndò biakud mëbòṅ a si a ntsag-maṅ, bingakogëlan,

⁶ndò biamana yaan ha, bibëdë a mal, bò bëdugan a mal maban.

⁷E dulu bisòò a Tir angayi mana, ndò biakui a Ptolemais, bisugu babëdzaṅ, bitòbò ai bò amos mbòg.

⁸Amos otsaag, ndò biatye, bikëlë a Sezarea, ndò bianyian a nda Filip, nkada foe, mbòg ya bod zamgbal, ndò biatòbò abë nyè.

⁹Angabë abëlë mintud mi ngòn milè, bëkòbògò anë bëprofèt.

¹⁰Ndò biatòbò hala ban mëlu, ndò profèt ziṅ dzoe na Agabus angasò a Yudea,

¹¹ndò azu abë bia, anòṅò kanda Paulus, atindi emen a mëkol ai a mò, nyè na: Mfufub Nsisim adzo na: E mod anë ai e kanda nyò, na ngò Yuden bayi nyè faṅ ngadag a Yerusalem, bëkalan nyè a mò bëhaiden.

¹²Ṅnyie anë bingawog nala, ai bia, ai bod bë dzal, bingakogëlan ai nyè na të abed a Yerusalem.

¹³Paulus nyè na: Dze ndzò miabò a miayon na, midzugulu ma nnëm ha? Amu, hë ma ma, mënë a ngomëzan së ki hë na bëfaṅ ma ngadag, mënë fë a ngomëzan na mëwu a Yerusalem asu dzoe Nti Yesus.

¹⁴Mbol bingabë ki nyè dzam tëgë, ndò biatòbò bivol, bia na: ṅyian Nti obòban.

¹⁵A mvus mëlu mëte, ndò biamana komëzan, bibëdë a Yerusalem.

¹⁶Bëyègè bëziṅ ya Sezarea bëngasò ai bia hala, ndò bakë ai bia abë Mnazon man Sipra, nnomo ṅyëgëlë, bitòbò abë nyè.

¹⁷Bingayi kui a Yerusalem, babëdzaṅ bësoan fò ai bia ha ai mintag.

¹⁸Amos otsaag hala, ndò Paulus akë ai bia abë Yakob, bënyia-bod-mvia bësë bëtoa ha.

¹⁹Ndò asug bò, angalèè bò mbombòg mbombòg e mam ya Zamba angabë abòòg a bëhaiden ai wò esye woe.

²⁰Ndò bawog, bëngalugu Zamba, bò ai nyè na: A madzaṅ, wayen na bakuda bakuda ya Yuden bëyëbë ya, hë da bò bësë bëngënë bëlada a mvende.

²¹Ndò bawog adzo doe na wayëgëlë e Yuden banyiṅ a zaṅ bëhaiden na bëvoan Moses, wa ai bò na të bakele bòn baban, tò ki na bëbaala mëtum maan.

²²Bibò hm ya? Bëyean ya wog na onë nsoan mu.

²³Ndò hm, obò e dzam biayi wa kad di. Bibëlë bod bënyii ha a bëngalig mëtiṅ a nyòl dzaban.

²⁴Nòṅò hm bod bëte, okë fububan ai bò fufulu, oyaan fë asu daban, asu yë na bësode bò ntui, abog te bod bësë bayi yëm na e mam balèè a nyòl dzoe masëki ete, dzam da na wawulu tëtëlë, obaala fë mvende.

²⁵Asu e bëhaiden bëngavëṅan, bia bëben bingatil bò, biyënë na bayean saala e tsid bëngatuni bëzëzë bëzamba, bësaala mëki, ai mintui biyëm, ai bisog.

²⁶Ndò Paulus anòṅ e bod ba amos otsaag hala, afububan ai bò, anyian a tempel na akad bò amos ya mëmos më efubu-nyòl mayi toban, ndò angatòbò we akui amos ya mod osë azaag vë mëtunëṅa.

²⁷Hala te e mëlu zamgbal ma mëngayi ya toban, ndò Yuden ya Azia bëngayen nyè a tempel, ndò bamana fòṅòlò nnam, bëfudi nyè mò a nyòl,

²⁸bò na: A bod bë Israel, këan bia. E mod nyò ṅnyè aluman ai nnam, ai mvende, ai e hom hi, ayëgëlë bod nala hom osë, ndò ben anyili bë Grek a tempel[87], amana sòṅ ai eboe a mfufub hom te.

²⁹Anë hm ha na, bëngatari yen Trofim man Efesi esamba ai nyè a tisòn, bëngatsog hm na Paulus anganyian ai nyè a tempel.

³⁰Tisòn esë eyoge, abui bod akoan, ndò banòṅ Paulus, bëdudu nyè a tempel a nsëṅ, ndò mimbè mingafèdëban etye etye.

³¹Mbol bëdzëṅë na bawoe nyè, ndò e foe nyi yakë kui abë ndzoe bakuda bëzimbi na Yerusalem osë anë engëngam.

³²Ndò anòṅ bëzimbi etye etye, ai bëdzoe mintèd bëzimbi, ndò asigi mbil mfag bëngabë. Ayen bëngayen ndzoe bëzimbi ai bëzimbi bëben, bò tègè bada yit Paulus.

³³Ndò ndzoe bakuda bëzimbi asubu babi, anòṅò nyè, ndò abende na bëfaṅ nyè ai mësuṅ mëbè, angasili na anë za ben ai e esye ya abò a enyiṅ dzie.

³⁴Nkunda bod ontoa kiṅ mëndzaṅ. Mbol angabë ki dzama toan yëm etòm ben mbol engëngam engabë, ndò abende na bëkë ai nyè a yat bëzimbi.

³⁵Eyòṅ angakui a zitèb, lëntoa na bëzimbi bëmbëgë nyè a yob etòm efida bod,

³⁶amu nkunda bod ongabë obiege nyè, bò na: Këlëg ai nyè!

³⁷Bëtëlë ha na banyian ai Paulus a yat bezimbi, ndò adzo ai ndzoe bakuda bëzimbi na: Yë mënë wa dzam kad man ebug? E mod nyò nyè na: Dze yë wayëm nkòbò Grek?

³⁸Së wa onë e man Egipten andëmë sie etòm ha, ndò angakë ai bod bakuda bënyii a baluman bita a nkod-nnam a?

³⁹Paulus nyè na: Ma, mënë man Yuden, byalibyali ya Tarsis a Silisia, byalibyali ya e tisòn mod ayëgan ki. Ndò makogëlan ai wa na odzoge ma mëkòbò ai nnam.

⁴⁰Ndò avë nyè ngul te. Paulus atëbë hm a zitèb, ndò asili nnam na oku evol. Bëkuu hm a miëëṅ. Angakòbò ai bò a nkòbò ebrea na: