Read Ewondo Bap 22 Bible Online

Bap 22 - Ewondo bible

Bap 22

¹A bëtara ai babëdzaṅ, vogolan anë makaman ai mamen abë mina.

²Bëngayi wog anë akòbò ebrea, bëngafëdan ku bivol. Nyè na:

³Mënë man Yuden, mëngabyali a Tarsis, a Silisia, mënganaṅ e tisòn nyi, mëyègè sikulu a mëkol më Gamaliel, akyaè mvende bëtara enë aye[88], mëmvamëṅan ai Zamba anë mina bësë miabò dò ana hi.

⁴Mëngaluman ai e zen nyi bita bi awu, mëfaṅa fam ai bininga ngadag, mëfudigi bò a mbog,

⁵akyaè ya fada nen ai bënyia-bod-mvia bësë bënë ma dzam bòòlò, amu mbò bëngavë ma e bëkalara makë lëdë babëdzaṅa Damaskus, na mëzu ai e bod bënë we a mësuṅ a Yerusalem, asu yë na bëndëgëlë bò.

⁶Ndò hm layenan ai ma a mëkëlë a zen ha, mëngasubu ya babi a Damaskus, ai zaṅa mos, etye etye, ndò mod mfyè angakubi ma a nyòl,

⁷mëkuu a si, mëngawog kiṅ edzoo ai ma na: A Saulus, a Saulus, a dze waluman ai ma?

⁸Ndò mayalan na: Wa za a Nti? Nyè ai ma na: Ma mënë e Yesus man Nazaret ya waluman ai nyè.

⁹E bod bëngabë ai ma esamba bëyënë mfyè, dzam da të wog e kiṅ ekòbògò ai ma.

¹⁰Ndò mazu dzo na: Mëbò ya, a Nti? Nti ai ma na: Kodogo a si, okë a Damaskus, awe ngò bayi wa kad e mam mësë wayean bò.

¹¹Mbol duma mfyè hi ongadim ma mis, e bod bëngabë ai ma esamba bëngalëdë ma zen, bëbëlë ma a wò, ndò bakui a Damaskus.

¹²Ananias ziṅ, mod ya abaala mvende mbëṅ, e Yuden bësë ya bëmbë toa we bëkama fë nyè,

¹³asòò abë ma, ndò azu ma tëbë babi, nyè ai ma na: A madzaṅ Saulus, mis mëyënë wa! Awola te aben, mëngayen nyè.

¹⁴Nyè na: Zamba bëtara atòb wa na oyëm ṅyian woe, oyen sosoo, owog fë kiṅ ya anyu die,

¹⁵amu wayi nyè bò mbòòlò a zaṅ bod bësë asu e mam ongayen, owogo fë.

¹⁶Ndò hm, etoa dzi, asu dze wayanga? Kodogo a si, oduuban, minsëm mie mivaaban eyòṅ waloe dzoe die.

¹⁷Ndò layenan ai ma na, eyòṅ mëdugan ya a Yerusalem, mëkogëlan a tempel, mëntoa anë a biyëyëm,

¹⁸ndò mayen nyè adzoo ai ma na: Vologo tye a Yerusalem mbil, amu bayi ki ṅyëbë mbòòlan wabòòlò ma.

¹⁹Ma na: A Nti, bayëm na ma mëngabë lomo bò a mbog, mëyidi e bod bayëbë wa a mënda-bikoan mësë,

²⁰ndò fë eyòṅ mëki më mbòòlò woe Stefanus mëngasoe a si, ma mëngabë fë mëtëlë hala, mëtoa ai bò kiṅ, mëkalëga biyie bi e bod bëwoe nyè.

²¹Nyè ai ma na: Këlëg, amu malom wa a mëyòṅ oyab.

²²Bëngavogolo nyè akui a ebug dzili, ndò babede kiṅ bò na: Vagan e mod nyòlò a si bëkon, amu akyëbë ki na anyiṅ.

²³Bëngabam fò, bësamza biwòman, bëwoaga mbulug a yob,

²⁴ndò ndzoe bakuda bëzimbi abende na bëkë ai nyè a yat bëzimbi, bëyit nyè ai nkas, asu yë na bëyëm etòm bëhë fam nyè a nyòl ai dzò.

²⁵Amana bëngamana nyè faṅ ngadag, Paulus nyè ai ndzoe ntèd bëzimbi angabë atëlë hala na: Yë mibëlë ngul ya ayit mòn nnam Roma ya bandzëki tsig adzo die nga?

²⁶Awog angawog nala, ndò ndzoe ntèd bëzimbi akë kad ndzoe bakuda bëzimbi na: Dze ohë yi bò dzi? Kë e mod nyò anë mòn nnam Roma a!

²⁷Ndò ndzoe bakuda bëzimbi azu, nyè ai nyè na: Tam ma kad na: Onë mòn nnam Roma nga? Nyè na: Owe.

²⁸Ndzoe bakuda bëzimbi nyè na: Mëngakus etye te ai abui mòni. Paulus nyè na: Mfa wama, mëngabyali ai nkoṅ te[89].

²⁹Etye etye te, e bod bëngabë yi nyè yit bëmana subu a mvus, ndzoe bakuda bëzimbi angambara, ayëm angayëm na Paulus anë mòn nnam Roma ai na angabò na bëfaṅ nyè ngadag.

³⁰E kidi lende ya hala, mbol ayi na atoan yëm asu dze Yuden bëngasòman nyè, ndò asuu nyè, abende na bëfada bënen ai nda-mëdzo esë bikoan, ndò bazu ai Paulus, atele nyè bò osu.