Read Ewondo Bap 23 Bible Online

Bap 23 - Ewondo bible

Bap 23

¹Paulus angafòmbò bëtsigi mintol, nyè na: A babëdzaṅ, mazuzu ya manyiṅ Zamba a mis anë mbëmbë mòn nnam, azaag kui amos ya ana.

²Ananias, fada nen, avëë fò e bod bëmbë tëlë hala ngul na bëbimi nyè a anyu.

³Paulus nyè ai nyè na: A mfim wafum, kë Zamba ayi wa bimi a! Ndò otoa ha otsigi ntol wama anë mvende yayi, odaṅa daṅ a fë mvende, a wabende na bëbimi ma nga?

⁴E bod bëmbë tëlë hala bò na: Fada nen ṅnyè watè nga?

⁵Paulus nyè na: A babëdzaṅ, mandzëki yëm na anë fada nen. Amu anë ntilan na: Wayean ki kòbò abe ai ndzoe nnam woe.

⁶Paulus angayi yëm na ngam dzia enë bësadukea, e ngam fòg etoa bëfarisea, ndò avë kiṅa nda-mëdzo ete ha na: A babëdzaṅ, mënë man farisea, mòn bëfarisea, ndò badzòs ma di hë etòm afidi ai etòm akui-lë sòṅ bëwu.

⁷Ṅnyie anë angakòbò nala, moman mëtari a zaṅ bësadukea ai bëfarisea, bëkaban ngam ngam.

⁸Amu bësadukea badzo na akui-lë sòṅ a sëki, tò benglès, tò nsisim; bëfarisea bò bayëbë bisë.

⁹Mod etotog antoa, ndò bësaṅa bëkalara ya ngam bëfarisea bëngatëbë a si, bëngalaṅëdan ai e ba bëvòg ba, bò na: Biayen ki mbë dzam abë e mod nyò. Dze hm ki, ngë nsisim, ngë ki na englès alèè ai nyè?

¹⁰Mbol moman mëngabë hë abed, ndzoe bakuda bëzimbi angambara na bëza saṅa Paulus, ndò abende bëzimbi na bësigi, bëkë nyè vaè a zaṅ dzaban, bëkë ai nyè a yat bëzimbi.

¹¹Alu angabë atsaag, ndò Nti azu nyè tëbë babi, nyè na: Bò fam. Amu akyaè ya ohë bòòlò ma a Yerusalem, nala ngò fë wayean ma bòòlò a Roma.

¹²Kidi engayi lende, ndò Yuden bëngatogan ekoan, ndò bakani sòṅ na bayi ki di tò anyu ntye babë ki woe Paulus.

¹³E bod bëngawoe oyili te bëngabë bëlodo taṅ mëwom mënyii,

¹⁴ndò bakë a bëfada bënen ai bënyia-bod-mvia, bò na: Bikani sòṅ mfaṅ na biayi ki dëmëlë dzom ziṅ së na bitari woe Paulus.

¹⁵Ndò hm, etoa dzi, mina kadan ndzoe bakuda bëzimbi ai ekoan bëtsigi mintol na azu ai bia nyè ha, bibò hë anë biayi na biatoan yëm etòm dzie. Mfa waan, bitëlë a ngomëzan na biawoe nyè eyòṅ ayi subu babi.

¹⁶Mòn kal Paulus angayi wog olam te, ndò asò, anyian a yat bëzimbi, amana dò lèè Paulus.

¹⁷Ndò Paulus aloe ndzoe ntèd bëzimbi mbòg, nyè na: Këlëg ai e mòngò nyò abë ndzoe bakuda bëzimbi, amu abëlë e dzam akad nyè.

¹⁸Ndò anganòṅ nyè, akëlë ai nyè abë ndzoe bakuda bëzimbi, nyè na: Paulus, man mimbog, aloe ma, ndò asili ma na mëzu ai e mòngò nyò abë wa, abëlë e dzam akad wa.

¹⁹Ndò ndzoe bakuda bëzimbi abi nyè a wò, akëlë ai nyè a fëfëlë, hë bò bëbè, ndò asili na: Dze wayi na wakad ma?

²⁰Mòngò nyè na: Yuden bëyili na bayi wa sili na osigi ai Paulus okidi a nda-mëdzo na bëtoan yëm etòm dzie.

²¹Ndò hm, të wayëbë bò. Amu bod ya ete, alodo bod mëwom mënyii, balam nyè, bëkani sòṅ na bayi ki di tò anyu së na bëwoe nyè; etoa dzi, bëtëlë, bëyanga mbol wayi dzo.

²²Ndò ndzoe bakuda bëzimbi asoe mòngò, abende nyè na: Të wakulan tò mod ziṅ na osò ma kad mam mëte.

²³Ndò aloe bëdzoe bë ntèd bëzimbi bëbè, nyè na: Komëzan bëzimbi mintèd mibè na bëkë a Sezarea, ai bëbëdë bikabëli mëwom zamgbal, ai bënòni mintèd mibè, atarigi a awola lala ya alu,

²⁴eyëm ya babed etòbògò babi, asu yë na mibede Paulus ete, mikë ai nyè abë ngòmëna Felis;

²⁵Ndò angatil e kalara nyò na:

²⁶Ma, Klaudius Lisias, abë mbòs ediṅ ngòmëna wam, Felis, wavuma!

²⁷Yuden bëngabi e mod nyò; bëtëlë na bawoe nyè, ndò mazu bò dilan ai bëzimbi, mëvaè nyè, mëwogo na anë mòn nnam Roma.

²⁸Mbol mëhë yi na mayëm etòm basòman nyè ete, ndò makë ai nyè a nda-mëdzo dzaban,

²⁹mëyënë na bakòbò të hë mam ya mvende dzaban, tègè ai etòm ziṅ yayean ai awu, ngë sòman yayean ai mimbog.

³⁰Mbol hm bësò ma lèè na balam mod te, ndò mëlom wa nyè etye etye, ndò fë mëkad bësòman na bëzu toṅ e sòman basòman nyè abë wa.

³¹Ndò bëzimbi bënganòṅ Paulus ha ai alu asë, akyaè bëngabende bò, bëkëlëg ai nyè abë Antipater

³²e kidi lende ya hala, bëbò na bëbëdë bikabëli bëkë ai nyè, bò bëdugan a yat bëzimbi.

³³Ndò banyian a Sezarea, bëkalan ngòmëna kalara, bëlëdë fë nyè Paulus.

³⁴Ndò angalaṅ, asili nyè nnam awoge ai wò; angayi wog na asò a Silisia,

³⁵nyè na: 'Mayi wog ndòṅ etòm dzoe hë eyòṅ bësòman bayi sò.' Ndò abende na bënòni nyè a dzal Herodes.