Read Ewondo Bap 24 Bible Online

Bap 24 - Ewondo bible

Bap 24

¹A mvus mëlu mëtan, ndò Ananias, fada nen, angasigi we ai bënyia-bod-mvia bëziṅ, ai loya Tertulus; mbò bëzaa sòman Paulus abë ngòmëna.

²Bëngayi nyè loe, ndò fò Tertulus atari na asòman Paulus, nyè na: Bianyiṅ a mfaṅ mvoè hë asu e mam ongatsende a nnam hi ai asu fëg dzoe,

³a Nti Felis; bayëbë wa kan esë ai hom osë ai abui ngaṅ.

⁴Asu yë na të mabad wa ndëngëlë madzaè wa na ovogolo bia tsëtsat ai abëṅ nnëm doe.

⁵Amu biyen na e mod nyò anë nsu, akë atsag bitòm a zaṅ Yuden a si esë, anë asu-zoa ya ayëgëlë mvol ya bod bë man Nazaret.

⁶Angadzëṅ na azu ai eboe a tempel, ndò biabi nyè, [

⁷Bingayi na biatsig ntol woe ai mvende dzaan, ndò Lisias, ndzoe bëzimbi, afadi nyè a mò maan, nyè na bësòman boe bëzu abë wa.]

⁸asu yë na wamen otoan nyè sili, oyëm e mam mësë ma ya biasòman nyè.

⁹Ndò fò Yuden bëngabaman kiṅ, bò na e mam mësë ma mënë ete.

¹⁰Ndò Paulus angabodo nkòbò, mbol ngòmëna angavë nyè ndëm nala, nyè na: Abui mimbu ana, hë otoa ntsigi ntol ya ayòṅ di, ndò mazu kaman ai mamen ai nnëm a saaṅ.

¹¹Obëlë ngul ya ayëm na, hë mëlu awom ai mëbè ana, ngò mëngabed a Yerusalem na makë kogëlan.

¹²Ndò bandzëki ma yen mëfëdan ai mod ziṅ a tempel, ngë ki na mëtogan bod, tò a mënda-bikoan tò a tisòn;

¹³Basëki ben dzam bòòlò e mam basòman ai ma mò mala.

¹⁴Mamëm a mis moe na etòm e zen baloe na evovolan ayëgëlë, e kan masye Zamba bëtara, mëyëbëgë e mam mënë ntilan a bëprofèt ai e dzi yasò a mvende,

¹⁵mëbëlë afidi abë Zamba, afidi ya e bod bëben ba bëbëlë fë, na akui-lë sòṅ bësosoo ai bëbe layi bòban.

¹⁶Asu te madzëṅ ai ngul esë na mëbi nnëm sosoo kòm esë a mis më Zamba ai a mis më bod.

¹⁷A mvus abui mimbu, ndò masò na mazu vë ayòṅ dama almosen,

¹⁸a hala ngò bëngazu ma kòb a tempel, mëfububan, tègè ai bod, tègè ai engongom,

¹⁹Yuden bëziṅ ya Azia, mbò bëhë yean wa tëbë osu ha, bësòman ma ngë bëbëlë sòman ai ma.

²⁰Bò bëben bëkada etòm bëngayen a mëmbë tëlë a mis bëtsigi mintol,

²¹eyòṅ ziṅ na e dzam mëngakòbò a yob ete a mëngabë mëtëlë ai bò na: Etòm akui-lë sòṅ bëwu endzò mëtëlë mina ai dzò osu a nda-mëdzo ana.

²²Mbol Felis angabë ayëmë adzo zen di mbëṅ, ndò asoe bò, nyè na: Eyòṅ Lisias, ndzoe bakuda bëzimbi ayi sigi mu, mayi kòbò adzo daan.

²³Ndò abende ndzoe ntèd bëzimbi na bënòni nyè, hë da atoa fili, të kaman ai bod boe na bësye nyè.

²⁴A mvus mëlu ha, Felis atoa ai ngal woe Drusila, ngòn Yuden, ndò alom loe Paulus, bëngavogolo mam më ṅyëbë Kristus Yesus.

²⁵Ndò afëlan nyè mam më fulu sosoo, ai ebana-nnëm, ai nkat wazu; Felis angambara, nyè na: Abim te layean. Tama kë; eyòṅ mayi yen afola, mëloe wa.

²⁶Atoa fë na, afidigi na Paulus ayi nyè vë mòni. Asu te angabë alomo nyè loe mban, angalèè ai nyè.

²⁷Mbol mimbu mi esye mibè mie mingaman, ndò Porsius Festus angazu fòl Felis; mbol Felis ayi na abò Yuden mbëṅ, ndò angalig Paulus afëdë.