Read Ewondo Bap 25 Bible Online

Bap 25 - Ewondo bible

Bap 25

¹Ngë Festus anòṅ edzoe anë mëlu mëlè, ndò atye a Sezarea, abëdë a Yerusalem,

²ndò bëfada bënen ai mvindi bod ya Yuden bazu nyè kad adzo Paulus, bëngakogëlan ai nyè,

³bësiligi nyè na abò bò mvam, alom nyè a Yerusalem; Hala te bëkòl ya olam na bayi nyè woe a zen.

⁴Ndò Festus ayalan na Paulus afëdë a Sezarea, ndò fë emen atëlë na akë we.

⁵Nyè na: E bod ya abë mina, a bëbëlë ngul, bësiigi ai ma, ngë dzom ziṅ esëki tëtëlë abë mod te, bësòman nyè.

⁶Andzëki bombo kòm abë bò, dzam bò hë mëlu mwom ngë awom, ndò asigi a Sezarea; Amos otsaag hala, ndò atòbò a etoa mëdzo, abende na bëzu ai Paulus.

⁷Asò angasò, ndò e Yuden bëngamana sòṅ a Yerusalem baloṅ nyè edinga a nyòl, bëngalaṅ abui bëbe bë mam a bëngabë ki dzam bòòlò,

⁸Paulus angakaman ai emen, nyè na: Mandzëki sëm tò a mvende Yuden, tò a tempel, tò abë Kaizer.

⁹Mbol Festus ayi na abò Yuden mvam, nyè ai Paulus na: Yë wayi na wabed a Yerusalem, bëkòbò adzo di a mis mama we?

¹⁰Paulus nyè na: Mëtëlë nsëṅ mëdzo Kaizer a mis ha, ete ngò bayean kòbò adzo dama. Mandzëki bò Yuden ebyandi ziṅ, wamen wayëm fë mbëṅ mbëṅ nala.

¹¹Ngë mëbò evus ziṅ ngë ki etòm yakyëbë ai awu, madzaè ki na të bawoe ma. Hë da, ngë e mam e bod ba basòman ma mësëki ete, mod ziṅ asëki bò dzam bò mvam te na akuan ai ma. Makë ai adzo abë Kaizer.

¹²Festus amana lèè ai bod boe, nyè na: Odzo na wakë ai adzo abë Kaizer; Wazu hm kë abë Kaizer.

¹³A mvus ban mëlu hala, nkukuma Agripa ban Berenis bësuan a Sezarea, bësòò sug Festus.

¹⁴Mbol bëngatòbò hala eban, ndò Festus amana lèè nkukuma adzo Paulus, nyè na: Mod ziṅ anë ha, a Felis angalig a mbog;

¹⁵Eyòṅ mëngabë a Yerusalem, ndò bëfada bënen ai mvindi Yuden bëngasili na bëtsig na aku a adzo.

¹⁶Ndò mëngayalan bò na fulu esëki a Roma na bakuan ai mod ziṅ së na e mod basòman atëbë e bod basòman nyè a mis, adzòsò fë ai bò.

¹⁷Ndò bëngakoan ha avol avol amos otsaag hala, ndò matòbò a etoa mëdzo, mëbende na bëzu ai mod te.

¹⁸Ndò bësòman bëngaloṅ nyè edinga a nyòl; e bëbe bë mam mëtsogo, bësòman boe tègè nyè laṅ dzom ziṅ ya ete,

¹⁹nguma etòm hë mam më ṅyëbë waban ai etòm Yesus ziṅ ya angawu, Paulus nyè ayini na avëë.

²⁰Mbol fëg engadzaṅ ma ai adzo te, ndò masili nyè na yë ayi na akë a Yerusalem, bëdzòs nyè we asu etòm te.

²¹Ndò Paulus asili na bëfèd nyè, biyanga ntsigan Kaizer; ndò mabende na bëfèd nyè akui anë mayi nyè lom abë Kaizer.

²²Agripa nyè ai Festus na: Ma mayi fë na mavogolo mod te. Nyè ai nyè na: Wayi nyè vogolo okidi.

²³E kidi lende ya hala, ndò Agripa ban Berenis bëngasò hë anë bakë a ngul abog, ndò banyian a nda-bikoan bi nnam, bënë ha ai bëdzoe bakuda bëzimbi, ai mimfaṅ mi bod ya tisòn; ndò Festus abende na bëzu ai Paulus.

²⁴Festus nyè na: A nkukuma Agripa, ai e bod bësë minë ai bia ha, bëbëgan e mod ya nkunda Yuden bëngazu ma yen asu die a Yerusalem, bëngabam fë a yob ete ha na ayean ki fë dugan nyiṅ.

²⁵Mfag wama, mandzëki yen na abò dzom ziṅ a yayean ai awu; mbol emen akë ai adzo abë Kaizer, ndò mëyili na malom nyè we.

²⁶Mabëlë ki nguma dzom ziṅ ya mayi til Kaizer a nyòl dzie, asu te madugan sòṅ ai nyè a mis man, adaṅ adaṅ a a mis moe, a nkukuma Agripa, asu yë na mëyëm e dzom matil eyòṅ bëmmana nyè sili minsili ana.

²⁷Amu mayen na nala osëki sosoo abui na bëlom man mimbog nala, tègè kad nguma etòm basòman nyè ete.