Read Ewondo Bap 26 Bible Online

Bap 26 - Ewondo bible

Bap 26

¹Ndò Agripa adzo ai Paulus na: Onë dzam kaman ai wamen etoa dzi. Ndò Paulus avë ndëm ai wa, angakaman ai emen,

²nyè na: A nkukuma Agripa, e mam mësë ya Yuden basòman ma ma, mayen na mëbëlë mvòm na a mis moe ngò mazu kaman ai mamen,

³adaṅ adaṅ a mbol wayëm mëtum më Yuden mësë[90], ai mëdzo maban, ndò makogëlan ai wa na oban nnëm, ovogolo ma.

⁴Yuden bësë bayëm enyiṅ dzama, atarigi mëtoa mòngò, mbol mënganyiṅ a tarigi a mëtari a ayòṅ dama a Yerusalem,

⁵bazuzu ya bayëm ma, ngë badiṅ bòòlò na mënganyiṅ anë man Farisea, akyaè ya e ngam yadaṅ alèd a ṅyëbë waan enë.

⁶Ndò etoa dzi, etòm afidi e ngaga Zamba angakag bëtara endzò mëtëlë ai dzò a dzòs dzi,

⁷e ngaga ya mënda më bod awom ai mëbè man masye Zamba ai evag esë, ai alu ai amos, mëfidigi na mayi dzò bi, asu afidi te ndò Yuden basòman ma, a nkukuma.

⁸Asu dze miayen aye na Zamba avëlë mimbim?

⁹Mfag wama mamen, mëngabë mëyënë na mayean luman ai dzoe Yesus man Nazaret,

¹⁰ndò fë mëngabò nala a Yerusalem, mëngafudi abui mimfufub a mbog ai e ngul bëfada bënen bëngavë ma. Mëbaa kiṅ dzama, ngë bëngabë na bawoe bò.

¹¹A mënda-bikoan mësë, mëndëgëlë bò, mëbii bò a ngul na bëmgbali Zamba abui, mëngavini bò nnëm abui, makë matsidan bò akui eza bëtisòn.

¹²A mëbò esye te, ndò makë a Damaskus ai ngul, ai kalara bëfada bënen.

¹³Ai zaṅa mos na, a nkukuma, a zen a yob, mëngayen mfyè nlo-dzobo osòòg a yob, ndò wakuban ma a nyòl, tò fë e bod bëngabë ai ma esamba.

¹⁴Ndò bia bësë bingaku a si, mëngawog kiṅ engakad ma a nkòbò ebrea na: A Saulus, a Saulus, a dze waluman ai ma? Anë wa aye na obimi ntum.

¹⁵Ndò madzo na: Wa za, a Nti? Nti nyè na: Mamen mënë e Yesus waluman ai nyè.

¹⁶Ndò hm, tëbëgë, oyëm mëkol a si. Mayene wa etòm ya na matòb wa, na obò etuga ai mbòòlò e mam wayen ai e ma mayi wa lëdë,

¹⁷mayi wa kode a mò më nnam ai a mò e bëhaiden ya malom wa abë bò,

¹⁸na mëyaè bò mis, na bëkodo a dibi, bëdugan a mfyè, bëkodo a ngul Satan, bëdugan abë Zamba, na bëbi evaa-minsëm ai ngab elig ai e bod bëfububan ai ṅyëbë bayëbë ma.

¹⁹Nala hm, a nkukuma Agripa, mandzëki bò e dzam mëngayen a yob di mëlò,

²⁰dzam da, ndò mëngatari bende e ba ya Damaskus ai e ba ya Yerusalem, nkòṅ nnam osë ya Yuda ai bëhaiden, mëbende bò na bëvëṅan, bëdugan abë Zamba, na bëbò e mam makyëbë ai avëṅan.

²¹Asu te ndò Yuden bëngabi ma mëtoa a tempel, bëngadzëṅ na bawoe ma.

²²Maabi nkèan ya abë Zamba akui amos ya ana, mëngakòbò tò ai bòngò, tò bënyia-bodo, mëtëbë, të kòbò dzom efë së na e dzi bëprofèt ai Moses bëngadzo na yayi bòban,

²³na Kristus ayean bëlë mintye, abò fë e mod osu akui a sòṅ bëkon, ayedan nnam ai bëhaiden mfyè.

²⁴Eyòṅ angamana kaman ai emen a e mam ma, ndò Festus adzo a yob ete na: Ongasòg ya, a Paulus! Abui ṅyëman kalara doe labò na osòg.

²⁵Paulus nyè na: Masòg ki, a ndindiṅ Festus, makad hë bibug bi bëbëla ya binë ete.

²⁶Nkukuma emen malèè e mam ma a fili ete ayëm. Makaṅ ki na dzom ziṅ ya e mam mëkad nyè enë nyè nkënga, amu andzëki bòban a asoe.

²⁷A nkukuma Agripa, yë wayëbë bëprofet? Mayëm na wayëbë.

²⁸Agripa nyè ai Paulus na: Dze yë ongayi ya ki ma bò Kristen hë abim etun abog di?

²⁹Paulus nyè na: Mënë fë dzam kogëlan ai Zamba na, tò a kòm tò a etun abog, së ki hë wa, dzam da e bod bësë bavogolo ma ana bëbò fò fë anë mënë, sësala hë e mësuṅ ma.

³⁰Ndò nkukuma angatëbë ai ngòmëna ai Berenis ai e bod bësë bëngabë bëtoa ai bò,

³¹ndò bakë a esòg, bëngafëdan bò bò na: E mod nyò andzëki bò e dzom yayean ai awu ngë mimbog.

³²Agripa nyè ai Festus na: Ohë bë dzam suu e mod nyò ngë abò të kë ai adzo abë Kaizer.