Read Ewondo Bap 27 Bible Online

Bap 27 - Ewondo bible

Bap 27

¹Mbol bëngatsig na biayean kë a Italien a mal, ndò bavë Paulus ai mimbog mifë hala a mò më ndzoe ntèd bëzimbi, dzoe na Yulius, mod ya nkan bëzimbi Agustus.

²Ndò bingabed a mal ya Adramita, etëlë na yakë a nkòṅ nnam Azia. Bingatye ha, Aristarkus, man Masedonia ya Tesalonika atoa ai bia esamba.

³Amos otsaag hala, ndò biakui a Sidon. Mbol Yulius abëlan ai Paulus mbëṅ, ndò avë nyè ngul na akë a bëmvoe boe, bëbëlan ai nyè mbëṅ.

⁴Ndò biakodo hala, bikëlë a Siprus, mbol evundu engabë ezaag bia osu;

⁵Adaṅa bingadaṅ e maṅ mënë a zaṅ Silisia ai Pamfilia, ndò biazu kui a Mira ya Lisias.

⁶Mbol ndzoe ntèd bëzimbi angayen mal më Alesandria ete mëkëlë a Italien, ndò abede bia ete.

⁷Mëlu mëlu, biwulugu otëtëg, ndò biakui a Kinidus ai abui mindzug ete; ndò mbol evundu esòò bia osu, të bia dzoge na bikë ai dulu osu, ndò biayëm zen a Kreta, mfag ya Salmon,

⁸bisò lod babi ete ai abui mindzug, ndò biakë hom ziṅ abaloe na Abëṅ aboṅ, babi ai dzal Lazaias.

⁹Mbol abog angamana lod abui, hala dulu maṅan toa ya fë mësis abui, hala fë abog amos mëlunga alod ya, ndò Paulus alëb

¹⁰bò na: A bod, mayen na e dulu maṅ di layi sò ai bia ndzug, layi fë bia dzèè, së ki hë asu mimbëgë ai mal, dzam da tò ben asu enyiṅ dzaan.

¹¹Ndò ndzoe ntèd bëzimbi angadaṅ vogolo e dzam ndzoe mal ai e mod angabë ai mal bëkada nyè, alodo anë e mam Paulus adzoo.

¹²Mbol aboṅ te angabë ki mbëṅ a abog oyon, ndò abui bod angadzo na bëtye ai mal hom te, bëdzëṅ na bëkui a Fenis, aboṅ ya Kreta, lëtyege a nnam nkyè akui a nnam akoe, bëbombo ete a abog oyon.

¹³Abò man evundu angabò, bëngadzo na bëyen ya mvòm, ndò batsag titima, bëngakë babi a Kreta,

¹⁴eban të kog, mod evundu ya baloe na «Mod ya akoe» asò hm tye.

¹⁵Ndò mal mëngavom ai evundu; mbol hm bingabë ki dzam kë ai dulu akyaè ya biyii, ndò fò biadzoge na bivom.

¹⁶Ndò biazu lod babi a man elon ya bëloege na Kauda, biyënë ndzug na biatele mal.

¹⁷Ndò të bëngatele mal nala, bëngadzëṅ na batindi mò. Mbol hm bëmbarëga na bëzaa vom a Sirta, ndò basuu tan a si, bëngavom.

¹⁸E kidi lende ya hala, mbol evundu edudugu bia eyëgan, bëngawoa mimbëgë a maṅ.

¹⁹Amos lala, bëngawoa byem bi mal a maṅ ai mò maban mëben.

²⁰Mëlu mëlu, tò vian, tò atitie tègè fyè, hë mod nkulu ṅnyè avuṅu, e man afidi ya na biayi kodeban angadzaṅ.

²¹Mod zie ambëlë bia, ndò Paulus atëbë bò a zaṅ, nyè na: A bod, mihë yean ma vogolo na të miatye a Kreta, ngë bisaala të ndzug hi ai ndzèan hi.

²²Ndò hm, etoa dzi, malëb mina na mibò azombo, amu tò mod ziṅ ayi ki dzèè enyiṅ dzie, hë mal mmò mayi ndaman.

²³Amu englès Zamba ya masye ayene ma alu ya ana di

²⁴nyè na: Të wambara, a Paulus, wayean tëbë Kaizer osu. Yënë sik, Zamba avë wa e bod bësë bënë a dulu ai wa.

²⁵Asu te hm, boan azombo, a bod. Amu mayëbë Zamba na layi bòban e kan bëhë kad ma.

²⁶Biayean kë kui a elon ziṅ.

²⁷Mbol alu awom ai nyiina angakui, bivomo a Adria, ai zaṅa lu, bëdudu bë mal bëngawodan na bikui ya a nkot si.

²⁸Ndò bavëg, bëyënë ṅnyie edòg dzam bò mera ebè.

²⁹Mbol hm bëmbarëga na bëzaa wundi akòg, ndò basuu wun enyii a mëndim, bëngakogëlan na kidi elëndë.

³⁰Mbol bëdudu bë mal bëdzëṅë na batub, ndò bamana woa ban mal a mëndim a si, bò na aya batoan woa wun a maṅ,

³¹ndò Paulus adzo ai ndzoe ntèd bëzimbi na: Ngë e bod ba bandzëki tòbò a mal, miasëki dzam kodeban.

³²Ndò bëzimbi bëngatsig minkòl ya mal, bëbò na mal mësigi.

³³A kidi ekëlë lëndë ha, ndò Paulus angabò na bod bësë bëdi, nyè na: Amos awom ai nyiina hi mitoa, miyanga, të di tò dzom.

³⁴Ndò makogëlan ai mina na midi bidi. Amu nala onë asu enyiṅ dzan. Amu esil mod mbòg ziṅ ya abë mina yayi ki nyè dzaṅ a nlo.

³⁵Ndò akòbò nala, anòṅò mbaṅëla, avëë Zamba ngaṅ a mis më bod bësë, abëgë, akaè na adi.

³⁶Bò bësë bëmbëlë ngul, bò fë bëngadi bidi.

³⁷Bingabë a mal ha, bod bësë mintèd mibè ai mëwom zamgbal ai bësaman.

³⁸Eyòṅ bëngadzie bidi, ndò babò na mal mëbò oveves, bëngawoa oles a man.

³⁹A kidi engalëndë, të yëm nnam bëngabë, ndò të bayen kindig ebëlë nsëlëg e hom bod bawòbò, bëngabui fëg na bakë sëlë mal ete.

⁴⁰Ndò bëngasuli wun a kindig maṅ, bëtii minkòl, ndò otan waandami; ndò evundu engatindi bò a nselëg.

⁴¹Mbol mal mëzaa diban a kindig ai maṅ mimfag mibè, ndò nlo mal wafòòbò a si, mfag ya mvus omana sëgëlan ai minkumdu mi maṅ.

⁴²Bëzimbi bëmana yili na bawoe mimbog, asu yë na mod aza tubu ai mëdzòg.

⁴³Mbol ndzoe ntèd bëzimbi ayii na akë kui ai Paulus mvoè, ndò akaman ai bò adzo te, ndò abende e ba bëyëmë dzòg na mbò bëtari suman a mëndim, bëkë kui a kindig,

⁴⁴e ba bëvòg ki, e ba a bitun mëbam, e ba ki a byem biziṅ ya mal. Nala ngò bësë bëngakë të ai nsël a nyòl a kindig.