Read Ewondo Bap 28 Bible Online

Bap 28 - Ewondo bible

Bap 28

¹Eyòṅ bikodeban ya nala, ndò biazu yëm na elon te enë dzoe na Malta.

²Bëlòbò-lòbò bënòṅò fò bia eyëgan mbëṅ, amu bëngakoman ndoan, bësoan fë ai bia bësë mbol mvëṅ engatye a yob, ai asu ahëb.

³Ndò Paulus angakë awolo bitun bi ndzaag a si, angafudi a ndoan; ndò akpë laham ete etòm ndugudu, atimbi nyè a wò.

⁴Mbol e bëlòbò-lòbò ba bëngayen na akpë landëṅ nyè a wò, bëngakòbò a bò bò ha na: E mod nyò ayean bò ṅwoe-bod. Akodeban ya a maṅ a li, zamba sosoo të dzoge na anyiṅ.

⁵Ndò të nyè angasamëza akpë a ndoan, të dzugi dzom ziṅ,

⁶bò bëngayanga na ayi mana vus hala, adiban a si etye etye, hë mbim. Mbol bëyanga nala kòm, bò tègè yen anë dzom yafòlan nyè a nyòl, bëngatsog mbol mfë, bò na anë zamba.

⁷Babi ya hala, ntomba osu ya elon, dzoe na Puplius, angabë abëlë mod dzal. Ndò angasoan ai bia mëlu mëlè, abëlan ai bia anë bëmvoe boe.

⁸Ndò hm labò ha na, fiba ai ntui bimbëlë esya Puplius ha, amboo a si, ndò Paulus akë abë nyè, ndò akogëlan, abede nyè mò, ndò abò nyè mvoè.

⁹E dzam di angayi bò nala, e bod bëvòg ya elon a bëkònò bëngazu, bësyeban,

¹⁰bëngabëlan ai bia ai abui olugu; a bityege ha, bëvëë bia e byem biyaṅan ai biè.

¹¹A mvus ngòn elè, ndò biabed a mal ya Alesandria; mal mëte mëngabë mëyanga a elon hala na oyon olod, obëgë otil na Dioskuri.

¹²Ndò bingakui a Sirakuza, bibombo hala mëlu mëlè,

¹³bitye hala, bikui a Redzio; A mvus alu da, ndò evundu-nkyè yavundu hala, amos bèè, bikëlë a Pozuoli;

¹⁴ndò biayen babëdzaṅ hala, bëbanda bia na bitòbò ai bò mëlu zamgbal. Na, ndò bingakui a Roma.

¹⁵Babëdzaṅ ya we bëngayi wog adzo daan, ndò bazu toban ai bia a angara Appius ai a mënda bëyëṅ mëlè. Paulus angayi bò yen, ndò akaṅ Zamba, amana tome nyòl.

¹⁶Eyòṅ binganyian a Roma, ndò bëngavë Paulus ngul na atòbò nyè etam ai e man bëzimbi anòniṅi nyè.

¹⁷A mvus mëlu zamgbal, ndò angatogan bëtëbë bë osu bë Yuden. Eyòṅ bëngamana sò, nyè ai bò na: A babëdzan, mandzëki bò dzom ziṅ a yabèan mvende ngë mëtum bëtara, tò anë bëngakalan ma mëtoa mfaṅ a n ngadag a mò bë Roma a Yerusalem.

¹⁸Bò bëkë basili ma minsili, bëngayi ma suu mbol nguma etòm wayean ai awu ongabë ki ma a nyòl.

¹⁹Mbol hm Yuden bëngafèd adzo te, mëntoa a enyòdi na makë ai adzo abë Kaizer; nala watyan ki na mëbëlë e dzam masòman ayòṅ dama ete.

²⁰Asu etòm te ndò masili na mayen mina, mëlèè fë mina adzo te, amu etòm afidi Israel endzò mëbëgë e mësuṅ ma.

²¹Bò ai nyè na: Mfag waan, tò kalara ziṅ a bëbëgë wa, biandzëki bi, asòò a Yudea; Tò mbòg ziṅ ya a babëdzaṅan dzëki bia sòṅ lèè ngë akad abe dzom ziṅ atyan ai wa.

²²Ndò hm biayi na biwog mfag woe mbol watsog, amu biayëm na bod bafëdan ai mkpamaṅ ekoan hi hom osë.

²³Ndò bëngayili nguma amos, bësòò abui a nda dzie, angatimi bò, abòòlò edzoe Zamba, ayini bò mam më Yesus, atarigi a mvende Moses ai bëprofèt, akèè lë kidi, akëlë kui ngongogële.

²⁴Bëvòg bëyëbë fò e mam adzoo ma, e ba bëvòg të yëbë.

²⁵Bëngatsaman hm nala kiṅ kiṅ, ndò Paulus akòbò ebug dzia, na, Mfufub Nsisim akòbò fò mbëṅ ai bëtara a anyu profèt Isaias na:

²⁶Këlëg abë e bod ba, okòbò na: Miayi fò wog ai mëlò, dzam da të toan wog, Miyënë ai mis, dzam da të yen.

²⁷Amu nnëm ayòṅ di omana ya bò alèd, ndò fë batoan ki fë wog ai mëlò, bëmana fë budi mis. Asu yë na të bayen ai mis, të bawog ai mëlò, bò të soṅ ai nnëm na bëvëṅan, mësye bò[91].

²⁸Yëman hm na akode Zamba di alomëban ya bëhaiden. Bò bayi wog.

²⁹Akòbò angakòbò nala, ndò Yuden bëngatye ai dulu na badugan, bëlaṅëdan bò a bò.

³⁰Angatòbò nala minguma mimbu mibè, asye mòni woe, asoan ai e bod bësë bëkëlë nyè yen,

³¹ayedan edzoe Zamba, ayëgëlë mam më Nti Yesus Kristus ai fim esë, tègè ai e mod akaman ai nyè na abë dò bò.