Read Ewondo Bap 3 Bible Online

Bap 3 - Ewondo bible

Bap 3

¹Petrus ban Yohannes bëngabë bëdë a tempel asu ngogëlan mëwola ebul.

²Bod bëngazu bëbëgë mod ya angabyali mbombog; bëkarëga nyè toe amos osë a mbè tempel ya baloe na «Abëṅ mbè», asu yë na adzaè e bod banyian a tempel man mòni.

³Ayen angayen Petrus ban Yohannes bëyiigi nyian a tempel, ndò angadzaè bò mòni.

⁴Ndò Petrus afòmbò nyè, fufulu ai Yohannes, nyè na: «Bëbëgë bia».

⁵E mod nyò angafòmbò bò, afidigi na ayi bi dzom abë bò.

⁶Petrus nyè na: «Tò mòni, tò mvòt, mabëlë ki, dzam da, e dzi mëbëlë ndzò mavë wa. A dzoe Yesus Kristus man Nazaret, tëbëgë a si, owulu».

⁷Ndò abi nyè a wò mbo-nnomo, atele nyè a si. Etye etye te, mëkol ai mvòṅëlò bimana nyè won,

⁸amëṅë a yob, antëlë, angakë awulu; ndò anyian ai bò a tempel awulugu, ayëlëgë, alugu Zamba.

⁹Bod bësë bëyënë nyè anë awulu, alugu Zamba.

¹⁰Bëdugan nyè yëm na ṅnyè akarëga tòbò a mbè ya tempel asu mòni, ndò bëngadzie ai minkamaṅ ai ndzaṅan fëg asu e dzam angabò mod te.

¹¹Ndò angalad Petrus ai Yohannes a nyòl ha, bod bësë bëngazu mimbil mfag bëngabë a minkum baloe na minkum mi Salomon, bò bësë hë akam.

¹²Petrus angayi yen nala, nyè ai bod na: «A bod ya Israel, dze miakam e dzam di, ndò ki dze miabëbë bia hë anë bia bibò na e mod nyò awulu a ngul dzaan a yob, ngë ki na mbol biadaṅ kam Zamba?

¹³Zamba Abraham ai Zamba Isaak ai Zamba Yakob, Zamba bëtara[20], avë mòn woe Yesus duma, e nyò ya mina mingakuan ai nyè, misie fë nyè a mis më Pilatus, eyòṅ nyè angatsig na asoe nyè.

¹⁴Mina mingasie mfufubu ai sosoo, misili na bësoe mina ṅwoe bod,

¹⁵mingawoe mbonde enyiṅ; ṅnyè Zamba akuli a bëkon, ndò bia bënë bëbòòlò boe.

¹⁶Ndò hm, a ṅyëbë ya dzoe die, e mod mitala nyò, a miayëm fë nyè, dzoe die awono nyè, ndò ṅyëbë ya dzoe die ovë nyè e mvoè mina bësë miayen nyi.

¹⁷Ndò etoa dzi, a babëdzaṅ, mayëm na mingabò nala mbol tègè yëm angabë bëlë mina, akyaè fë bëdzoe ban bëngabò.

¹⁸Ndò hm Zamba, e mam angatari kad a anyu bëprofèt bësë na Kristus woe ayi bëlë mintye, adzala ya dò totoe.

¹⁹Vëṅan hm, midugan mfag minsëm miavaaban mina,

²⁰asu yë na abog evovoe azu abë Nti, alom mina e nyò angatele, Kristus Yesus,

²¹ṅnyè yob layean soan ai nyè, akui abog e mam mësë Zamba angakòbò a kòm ya kòm a anyu mimfufub bëprofet boe matoban.

²²Moses nyè angadzo na: Nti Zamba ayi mina tele profet hë anë ma a zaṅ babënyòṅ. Mivogolo e mam mësë ayi mina kad[21].

²³Layi bò na, e mod osë ayi ki vogolo profet te, ayi mana ai si a ekoa bod[22].

²⁴Anë fò na, bëprofèt bësë, atarigi abë Samuel akëlë osu, bësë bëngakòbò, ndò bëngabende e mëmos ma.

²⁵Mina minë bòn bëprofèt ai bòn bë elad-amvoe ya Zamba angalad ai bëtara, nyè ai Abraham na: Mënda më bod mësë ya si mayi luguban a mvòṅ dzoe[23].

²⁶Asu daan ngò Zamba angatele mbò-esye woe, alomo nyè, angafubu mina asu yë na mod osë ya abë mina alum bëbe bë mam boe mvus.