Read Ewondo Bap 4 Bible Online

Bap 4 - Ewondo bible

Bap 4

¹Mbol hm bëlèègè ai bod, ndò bëfada ai ndzoe[24] bëzimbi ya tempel ai bësadukea bëngazu bò tëbë a mgbag,

²bëwogo adzo di abe na bayëgëlë bod, bëyedëgan akui-lë sòṅ bëwu[25] abë Yesus.

³Ndò babi bò, bëfudi bò a mimbog akui kindi lende ya hala, amu hala ngoge entoa ya.

⁴Abui bod ya bëvogolo ebug bëngayëbë, ndò bod bëngakui dzam bò tò bakuda bëtan.

⁵Ndò hm lazu bò na, e kidi lende ya hala, ndò bëdzoe baban, ai bënyia-bodo-mvia, ai bësaṅa bëkalara baban bëngakoan a Yerusalem,

⁶fufulu ai Annas, fada nen, ai Kaifas[26], ai Yohannes, ai Alesander ai e ba bësë bëngabë a mvòṅ bëfada bënen,

⁷ndò batele bò a ezëzaṅ, bëngasili bò minsili, bò na: «Ai ngul fe, ngë ki na a dzoe za mihë bò e dzam di?»

⁸Petrus atoa ndzalan ai Mfufub Nsisim ha, ndò abodo nkòbò, nyè ai bò na: «A bëdzoe bë nnam ai bënyia-bodo-mvia,

⁹ngë badzëṅ bia a si amos ya ana, etòm ya na bibò nkokòn mod mbëmbë dzam, ai na a dzoe za akodeban,

¹⁰mina bësë hm, ai ayòṅ Israel asë, yëman na a dzoe Yesus Kristus man Nazaret ya mina mingabomë a klos, ndò Zamba angavëlë nyè a bëkon, a dzoe die ngò e mod nyò atëlë mina mvoè osu.

¹¹Ṅnyè anë akòg ya bia bëloṅ bë nda binga woa a fyè, ndò avëṅan ya nnomo akògò[27].

¹²Ndò fë akode asëki abë mod mfë, amu dzoe afë asëki a si a zaṅ bod, a biayean kodeban ete».

¹³Mbol bëngayen azombo Petrus ban Yohannes, bëyëmë fë na bayëm ki kalara, bò ha tègè ai ayègè, bëngakam, mbol bëyëmë na bod bëte bëngabë ai Yesus,

¹⁴ndò babëbë e mod angabò mvoè nyò, atëlë ai bò, tègè ai ebug bafèd.

¹⁵Ndò bakad bò na bëyanga a nsëṅ nda-mëdzo, asu yë na bëbui fëg bò a bò,

¹⁶bò na: «Bibò ya ai e bod ba? Amu adzo ndëm te ayëmban ya a ngëëṅ a zaṅ e bod bësë bëtoa a Yerusalem, ndò biasë ki dò dzam sie.

¹⁷Dzam da, asu yë na të dzam te layaman abui abui, ntëlan bò mvende të dugan kòbò ai mod ziṅ a edzoe di».

¹⁸Ndò bëngaloe bò, bëtele bò mvende na tègè tègè bada fala ebug, ngë ki na ayëgëlë a dzoe Yesus.

¹⁹Ndò Petrus ban Yohannes bafèd, bò ai bò na: «Mina bëben yënan adzo di: Yë anë sosoo a mis më Zamba na bidaṅ mina vogolo alodo Zamba?

²⁰Amu bia biasëki dzam bò të kòbò e mam bingayen, biwogo fë».

²¹Ndò badugan bò beme, bësoe bò, tègè yen e dzam bavë bò endëgëlë ete, hë etòm bod bë nnam, amu bësë bëngabë bëvaa Zamba duma asu e dzam angabò.

²²E mod hm asimba mboan mvoè di angabòban a nyòl, angabë bisëb mëwom mënyii ai fus.

²³Eyòṅ bëngasoe bò, ndò bëngakë a bod baban, ndò balèè bò e mam mësë bëfada bënen ai bënyia-bodo-mvia bëngakad.

²⁴Amana bëngamana wog, ndò bò bësë bëngavë kiṅ fufulu abë Zamba, bò na: A Nti, wa ongakom yob ai si, ai maṅ, ai e byem bisë ya ete,

²⁵wa ongakòbò ai Mfufub Nsisim a anyu tara waan, mbò-esye woe David na: Asu dze mëyòṅ mënë ebyandi, minnam mibindigi zëzë mam?

²⁶Minkukuma ya si-ndon mitëlë, bëdzoe bëkoan fufulu, na baluman ai Nti, ai Kristus woe[28].

²⁷Amu Herodes[29] ai Ponsius Pilatus ai bëhaiden, ai bòn bë Israel bëngakoan a tisòn te mfaṅ na baluman ai mfufub mbò-esye woe Yesus ya ongawòbò mbòn,

²⁸na babò e mam mësë ya wò woe ai ṅyian woe bingatele na biayi bòban.

²⁹Ndò hm etoa dzi, a Nti, yënë mëlam maban, ovë hm bituga bie na bëkòbò ebug dzoe ai azombo asë,

³⁰osam wò woe na obò bod mvoè, ai na mëndëm ai biyëṅ bi mam bibòban a dzoe mfufub mbò-esye woe Yesus.

³¹Bëkogëlan ha, ndò e hom bëngabë nkoan ongatigëdan, bò bësë bëdzie ai Mfufub Nsisim, bëngakòbò ebug Zamba ai azombo.

³²Nkunda e bod bënganyian a ṅyëbë ongabë hë nnëm mbòg mbòg, ai nsisim mbòg mbòg, tò mod të dzo na dzom dzie yawoge ai nyè, byem biaban bingabë bò hë fufulu.[30]

³³Ndò apostel bëngabë bòòlò akui-lë sòṅ Nti Yesus ai abui fim, abui maa atoa ai bò bësë.

³⁴Mod ziṅan gabë ki a mëyaṅan a zaṅ dzaban; amu e ba bësë bëngabë bëbëlë mënda ai mal bëkuan ai mò, bëzaag ai mòni nkuan,

³⁵bëdzoge apostel a mëkol a si, bëngavë mod osë e taṅ a yaṅan ai dzò.

³⁶E Yosef ya baloe na Barnabas, mbòg ya ngab apostel, (dzoe die latyan na mòn evòli), angabë man Leviten, bëbyali ya Siprus,

³⁷angabë abëlë afub, ndò angakuan ai dò, asòò ai mòni, adzoge nyè apostel a mëkol a si.