Read Ewondo Bap 5 Bible Online

Bap 5 - Ewondo bible

Bap 5

¹Mod ziṅ ha, dzoe na Ananias, ban ngal Safira, bëngakuan ai si,

²ndò angasòli etun mòni, ngal ayëmë nala, ndò angasò ai etun, adzoge apostel a mëkol a si.

³Petrus nyè na: «A Ananias, dze fò Satan adzie wa a nnëm ha, ongazu dug Mfufub Nsisim, osòli etun mòni ya nkuan si?

⁴Nga si dzoe? Ndò hm ki, eyòṅ abò na okuan ya ai dzò, nga mòni ahë woge ai wa? Dze ehë bò na ohëg e kan dzam nyi? Wandzë ki dug bod, Zamba ṅnyè ohë dug.»

⁵Ananias angayi wog e bibug bi, ndò alaban a si, awuu; wòṅ okuu e bod bësë bëvogolo ha a nyòl.

⁶Ndò binanga bingakodo a si, bëwogo nyè a biyie, bëkë nyè dzëb.

⁷Mëwola mëngayi lod hala anë mëlè, ndò mininga woe azu nyian, nyè tègè yëm e dzam lëbò ha.

⁸Petrus nyè ai nyè na: Kada ma, yë abim mòni di ndò mikuan ai dò si ete? Nyè na: Owe, abim te dili.

⁹Petrus nyè ai nyè na: Dze yabò na mikui kiṅa bobolo nsisim Nti? Yënë, mëkol më e bod basò dzëb nyò nnom ma mëtëlë a mbè; bò fë bazu kë ai wa.

¹⁰Ndò fë nyè angaku nyè a mëkol a si etye etye, awuu. Ndò bëndoman bë bod bëngasò, bëkòbò nyè atoa mbim, ndò bëngabëgë nyè, bëdzëbë nyè babi ai nnom,

¹¹ndò mod wòṅan gaku nda-Zamba esë a nyòl ai e bod bësë bëwogo e mam ma.

¹²Abui mëndëm ai biyëṅ bi mam bingabòban a mò bë apostel a zaṅ bod. Ndò bò bësë bëkarëga toban, nnëm mbòg mbòg a minkum mi Salomon[31],

¹³tò mod mbòg ya e ba bëvòg të zombo lad ai bò, dzam da hë nnam otaman bò.

¹⁴Bëyëbë bëngabuli bagëban abë Nti, minkunda mi fam ai bininga,

¹⁵e kan yë na bëngazu ai minkokòn, bëboege bò a bëmatela ai binòṅ a ndzòṅ a yob, asu yë na, eyòṅ Petrus ayi sò, tò të hë nsisim woe onamba mbòg ya ete.

¹⁶Minkunda mingakë miasò a ngòdòg bëtisòn ya Yerusalem, bëbëgë minkokòn ai e bod bëbe minsisim bëndëgëlë, bò bësë bëmana syeban.

¹⁷Ndò fada nen angatëbë, ai nyè ai e bod bëngabë ai nyè ha, ekoan bësadukea, bëmana ya dzie ai aban ha,

¹⁸ndò babi apostel, bëfudi bò a mimbog mi nnam.

¹⁹Ai alu ha, ndò englès Nti angayaè mimbè ya mbog, akuli bò a nsëṅ, nyè na:

²⁰«Kaṅan tëbë a tempel, mikad nnam e bibug bi enyiṅ bisë bi.»

²¹Ndò bëngawog, ndò banyian a tempel ai ndib kidi, bëngayëgëlë. Ndò hm fada nen nyè angasuan mfag woe ai bod boe, bëtogan ekoan-nnam ai basugu ati bë bòn bë Israel, ndò balom bò nòṅ a nda-mimbog.

²²Ndò bëbò-bisye bëngasuan a nda-mimbog, tègè bò kòb we. Bëdugan ai mvus, ndò baboe foe na:

²³«Bikë kòb nda-mimbog efëdë mbëṅ mbëṅ, bënòni bëtëtëlan a mimbè, ndò biyaè, dzam da të kòb tò mod mbòg a nnëm ete».

²⁴Awogo ndzoe bëzimbi ya tempel ai bëfada bënen bëngawog e foe nyi, fëg edzaṅa bò, të yëm mbol nala wayi kë osu.

²⁵Ndò mod ziṅ aham hala, angalèè bò na: «Yënan, e bod mingafudi a mimbog, bëtëlë a tempel, bëyëgëlë nnam».

²⁶Ndò ndzoe bëzimbi bë tempel angakë ai bod bisye boe, abii bò otëtëg otëtëg, amu bëmbarëga na nnam oza lum bò ngòg.

²⁷Ndò bëngasò ai bò, bëtele bò a ekoan-nnam a zaṅ. Ndò fada nen asili bò na:

²⁸«Biandzë mina kad na të miayëgëlë e dzoe di a? Etoa dzi, Yerusalem amana ya dzie ai ayëgëlë dan, ndò miayi na miazu ai bia mëki më mod te a nyòl nga?»

²⁹Petrus ai apostel bò na: «Biayean bò Zamba mëwog alodo anë bod.

³⁰Zamba bëtara akuli Yesus a sòṅ, e Yesus mingawoe ai nkëlan mingakele nyè a ele.

³¹Zamba abede nyè a wò mbo-nnomo woe na abò etòṅ-ntomba ai nkode, ai na avë Israel ntsendan enyiṅ ai evaè minsëm.

³²Ndò hm bia binë bëbòòlò bë mam mëte, bia ai nsisim ya Zamba angavë e bod babò nyè mëwog».

³³Bëngayi wog nala, bëmana hm fam, bëngayi na bawoe bò.

³⁴Ndò man Farisea ziṅ ya ekoan-nnam, dzoe na Gamaliel[32], atoa mbëmbë ṅyëgëlë mvende, bod bëdiṅi fë nyè, ndò angabende na bëtam kui ai e bod ba a nsëṅ man etun,

³⁵nyè ai bò na: «A bòn bë Israel, mikalëga e dzam miayi bò e bod ba.

³⁶Amu, e mëlu mëndëm lod ma, Teudas angatëbë, nyè na anë mod, ndò bod, dzam bò mëwom mënyii, bëngalad ai nyè; Awoe bëngawoe nyè, ndò e bod bësë bëngabë bëtoṅo nyè bëngatsaman, bëdzaṅa a sòòd, tègè ai ndòṅ.

³⁷A mvus hala, ndò Yudas man Galilea angatëbë a si e mëlu ya bëbòò elaṅ, bod bëngatoṅ nyè a zud. Ndò fë nyè angadzaṅ a ekoa, e bod bësë bëngabë bëbiege nyè bëmana tsaman.

³⁸Ndò hm makad mina etoa dzi na: Të miakalan ai e bod bala dzam, dzogan bò. Ngë e mam balam, ai e ma babò, masò a bod, mayi mana ai mëben;

³⁹Dzam da, ngë masò abë Zamba, miasëki mò dzam mana, miza tëmë, mingaluman ai Zamba». Ndò bëngakui kiṅa i nyè,

⁴⁰bëloe apostel, bëyidi bò, ndò babende bò na të bakòbò a dzoe Yesus, bësoe bò.

⁴¹Ndò të apostel bakodo a ekoan-nnam ha, bakë batag, mbol bëngayen na bakyëbë ai ebyandi etòm dzoe,

⁴²bëntoa hm na, amos osë, hë a tempel ai a mënda mënda, të ku sòm a ayëgëlë, bëyedëgan Yesus Kristus.