Read Ewondo Bap 6 Bible Online

Bap 6 - Ewondo bible

Bap 6

¹[33] Mëlu mëte, ndò taṅ bëyègè engabed fò abui; E bod ya nnam Grek[34] bëngasòg Ebrea, amu Ebrea bëkarëga voan minkus mi Grek a ekab-bidi ya amos osë.

²Ndò bë awom ai bëbè bëngaloe nkunda bëyègè, bò na: «Asëki mbëṅ na bikë dzoge ebug Zamba a si, na biasye bod a tëbëlë.

³A babëdzaṅ, tòban bod ya bënë ai olugu a zaṅ dzaan zamgbal, bëtoa ndzalan ai nsisim, ai fëg; mbò biayi tele a esye dzi;

⁴mfag waan, biayi mvaman ai ngogëlan, ai esye ebug.»

⁵Ndò adzo di anganyëb bod bësë a nnëm, ndò batòb Stefanus, mod ya angabë ndzalan ai ṅyëbë, ai Mfufub Nsisim; bëtòbò fë Filip, Prokoro, Nikanor, Timon, Parmenas, Nikola, mod ya anganòṅ ṅyëbë a Antiokia,

⁶ndò batele bò apostel osu, ndò bakogëlan, bëbede bò mò.

⁷Ebug Zamba enganaṅ, taṅ bëyègè engabui a Yerusalem eyëgan, abui dzam ya bëfada bëngayebë fë.

⁸Stefanus antoa ndzalan ai maa, ai ngul, angabò biyëṅ bi mam ai bod mëndëm a zaṅ bod ha.

⁹Ndò bod bëziṅ ya nda-bikoan ya bëloege na 'nda-bikoan fili bod'[35], ai bod ya Sirena, ai Alesandria, ai bod ya Silisia ai Azia, bëngalaṅëdan ai Stefanus,

¹⁰dzam da tègè dzam kui a nkoṅ fëg ai nsisim angabë akòbògò etere.

¹¹Ndò batindi bod na bëkad na: Bingawog nyè akòbògò mam më ebyandi mëtyan ai Moses, ai Zamba.

¹²Ndò bëngamana yoṅolo bod minnëm, ai bëfada, ai bësaṅa bëkalara, ndò bazu nyè dilan, bëbii nyè, bëkëlë ai nyè a nda-mëdzo,

¹³ndò bëtsigi bë mbë mvaa bëngatëbë, bò na: E mod nyò anë hë akòbò abe ai mfufub etòbògò hi ai mvende.

¹⁴Amu biawog nyè adzo na Yesus man Nazaret ṅnyè ayi bug etòbògò dzi, atsende fë e mëtum Moses angalig bia ai mò.

¹⁵Ndò e bod bësë bëngabë bëtoa a nda-mëdzo ha bëngabëbë nyè, bëntala asu die hë anë asu englès.