Read Ewondo Bap 7 Bible Online

Bap 7 - Ewondo bible

Bap 7

¹Ndò fada nen asili na: «Yë anë badzo na?»

²Nyè na: «A bëtara ai babëdzaṅ, vogëlan na: Zamba duma angayene tara waan Abraham, hala atoa a Mezopotamia, osusua yë na atòbò a Haran.

³Ndò angadzo ai nyè na: Kodogo a si dzoe, ai a bod boe, okë a e si mayi wa lëdë[36].

⁴Ndò angakodo a si Kaldea, atòbò a Haran. A mvus yë na esya awu ya, ndò angakodo hala, asò loṅ mvog a e si nyi, e hom mitoa etoa dzi,

⁵andzëki nyè vë ngab-elig ete, tò ki etëlë-mëkol, dzam da, ndò angakag nyè na ayi nyè vë na ewoge ai nyè, ewoge fë ai mvòṅ dzie a mvus dzie[37]; nyè ha tëgë ai mòn.

⁶Zamba angadzo fò hm na: mvòṅ dzoe yayi tòbò bëdzin a ezaa nnam, bayi bò na bësye anë bëlò, bëtibili fë bò mimbu mintèd minyii.

⁷Mayi dzòs ayòṅ layi bò na bësye anë bëlò, Zamba ṅnyè adzo nala, a mvus e mam mala, bayi kodo hom te, bëzu ma lugu e hom hi[38].

⁸Ndò angavë nyè elada akele. Nala ngò angabye Isaak, akele nyè a amos mwomo, Isaak akele Yakòb, Yakòb akele bëtara awom ai bëbè.

⁹Ndò bëtara bëngasiṅ Yosef, bëkuan ai nyè a Egipten. Zamba angabë ai nyè,

¹⁰ndò angakode nyè a mindzug mie misë, avë nyè maa ai fëg a mis më Farao, nkukuma ya Egipten, ndò angatele nyè na adzoe Egipten ai nda dzie esë.

¹¹Ndò zie engabò a Egipten esë, ai a Kanaan, mod ndzug abui, bëtara baan tègè yen bidi.

¹²Mbol Yakob angawog na bidi binë a Egipten, ndò angatari lom bëtara baan.

¹³Eyòṅ bèè, ndò Yosef angabò na babënyaṅ bëyëm nyè, ndò Farao azu yëm nda-bod Yosef.

¹⁴Ndò Yosef angalom na bëzu ai nyè esya woe Yakob, ai ayom bod die asë, minkug mëwom zamgbal ai mitan.

¹⁵Ndò Yakob angasigi a Egipten, awuu, bëtara baan bëwuu fë,

¹⁶ndò bëngavaè bò hala, bësòò ai bò a Sikem, bëdzëbë bò a e sòṅ Abraham angakus a taṅ mòni a mò më bòn bë Emmor a Sikem.

¹⁷Eyòṅ hm abog e ngaga ya Zamba angakag Abraham angakui, ndò bod bëngafui, bëntoa abui a Egipten,

¹⁸azaa kui anë nkukuma ziṅ mfë anganòṅ edzoe a Egipten, nyè tègè yëm Yosef[39].

¹⁹Nkukuma nyò angabad ayòṅ daan, atibili bò, abò na bëlëdë bòn baban a ngëëṅ, asu yë na të banyiṅ[40].

²⁰Mëlu mëte, ndò Moses angabyali, anyëbë Zamba a mis. Angatòbò ngòn elè a nda esya;

²¹mbol hm bëngalëdë nyè a ngëëṅ, ndò ngòn Farao enganòṅ nyè, angatòṅ nyè anë mòn woe emen.

²²Bëngayëgëlë Moses fëg esë ya Egipten, amu angabë ngul a nkòbò ai a mimboan.

²³«Hala te angakui ya bisëb mëwom mënyii, ndò angabindi a nnëm woe na akë yen babënyaṅ, bòn bë Israel.

²⁴Ndò ayen anë batibili mod, ndò akaman ai nyè, ndò fò akun e mod bëtibili nyò, awoe man Egipten.

²⁵Angabë adzo na babënyaṅ bayi wog etere na Zamba avë bò nkode a mò moe; Bò ha të wog.

²⁶Amos otsaag hala, ndò azu bò kòb bëyidëgan, ndò angadzëṅ na ahaṅ bò, nyè na: 'A bod, kë minë anyaṅa ! Dze miawoean?'

²⁷E nyò angabë atibili manyaṅ asogolo fò nyè, nyè na: Za atele wa na onë ndzoe ngë ki na ntsigi-ntol waan?

²⁸Dze yë wa ongayi ya ma woe akyaè ya ongawoe man Egipten angoge[41]?

²⁹Awogo Moses angawog ebug dzi, ndò atub, akë tòbò a nnam Madian, ndò angabye bòn bëbè we.

³⁰«A mvus mimbu mëwom menyii, ndò englès angayene nyè a ntud-ndoan, a Sinai, a nkod-nnam, ai a minkol[42].

³¹Ndò Moses angayen, angakam e dzam ayënë di, ndò asubu a osu na atoan yen e dzam angabë abòòg, ndò kiṅ Nti engasò we na:

³²Ma mënë Zamba bë esoa, Zamba Abraham ai Isaak ai Yakob. Moses akèè na anyaman, tègè fë zombo na abëbë we.

³³Nti nyè ai nyè na: tiigi e ngob enë wa a mëkol, amu e hom otëlë hili onë mfufub hom.

³⁴Mëtoan ya fò yen ndzug ayòṅ dama a Egipten, ndò fë mëwog bò ntad, ndò hm mayi sigi, mëkë bò kode. Ndò hm, etoa dzi, malom wa a Egipten[43].

³⁵E Moses nyò ya bëngasie, bò na: Za atele wa na onë ndzoe ngë ki na ntsigi-ntol[44]? ṅnyè Zamba angalom na abò ndzoe ai nkode ai wò englès ya angayene nyè a ntud ele.

³⁶Angakuli bò, abò biyëṅ bi mam ai mëndëm a nnam Egipten, ai a e maṅ mavie, ai a nkod-nnam a taṅ bisëb mëwom mënyii.

³⁷Moses te ṅnyè angakòbò ai bòn bë Israel na: Zamba ayi mina tele profet hë anë ma, a zaṅ babënyòṅ[45].

³⁸Ṅnyè angabë atëlë a etogan bod a zaṅa nkod-nnam, ai englès akòbògò ai nyè a nkol Sinai, ai bëtara baan; ṅnyè angabi bibug bi enyiṅ, avë bia,

³⁹ṅnyè bandzëki yi na babò mëwog, ndò batimi nyè, minnëm miaban mimana të kilan hë a Egipten,

⁴⁰bò ai Aaron na: Komo bia bëzamba, bëwulu bia a osu. Amu, e Moses ya akuli bia a nnam Egipten nyò, biayëm ki e dzam ayenan ya ai nyè[46].

⁴¹Mëlu mëte, ndò bëngakom mòn nyag, bëngazu nyè vë mëtunëṅa, bëngafon ai bisye ya mò maban.

⁴²Ndò Zamba angalum bò mvus, adzoge bò na bëlugu atitie, akyaè anë ntilan a kalara bëprofèt na: A ayòṅ Israel, a bisëb bisëb mëwom mënyii a nkod-nnam, yë mingatam ma sòṅ vë mëtunëṅa, ngë biyëm?

⁴³Mingabëgë tende Molok, ai otitie zamba waan Raifan, bihëgëlë ya mingakom na mialugu biè, ndò mayi mina vë a mëkaban omana lod[47] Babilon.

⁴⁴Tende eboe ngam engabë bëtara a nkod-nnam, e kan e mod angakòbò ai Moses angabende nyè a akom;

⁴⁵Bëtara bëngakë ai nyè, anë mod a abog die, ai Yosua, eyòṅ bëngaboe mëyòṅ ya Zamba angatsidan bëtara a osu, akui a abog David,

⁴⁶ṅnyè angayen maa a mis më Zamba, ndò angadzaè na ayen etòbògò asu nda Yakob.

⁴⁷Salomon ṅnyè hm angaloṅ nyè nda.

⁴⁸Dzam da, Mëdaṅa-yobo atoa ki a e nda baloṅ ai mò, anë profèt adzo na:

⁴⁹Yob onë etoa ntomba dzama, si etoa ma etele-mëkol. Za akyaè nda miayi ma loṅ, Nti ṅnyè akòbò nala, ngë ki na za homo ayi bò awaè dama?

⁵⁰Së wò wama ngò ongakom e mam mësë ma a[48]?

⁵¹«A e bod minë nlo alèd ba, ai minnëm ai mëlò tègè ai nkëlan, mina fë miayi kanga Mfufub Nsisim kòm esë anë bë esoa.

⁵²Profèt mfe bë esoa bandzëki fëm? Bëngawoe e bod bëkada bò asòò-lë sosoo modo, sosoo mod te ṅnyè mingakuan ai nyè, miwoe fë nyè;

⁵³Mina minganòṅ mvende e kan benglès bëngabende mina, ndò miandzëki dzò baala.»

⁵⁴Awog bëngawog nala, ndò bëngafam, bëngaladan mëkëg asu die.

⁵⁵Atoa hm ndzalan ai Mfufub Nsisim ha, ndò abëbë a yob, ayënë duma Zamba, Yesus atëlë a mbo-nnomo Zamba,

⁵⁶nyè na: Mayen anë yob oyoo, mòn mod atëlë a mbo-nnomo Zamba.

⁵⁷Ndò babam a yob ete, bëmana budi mëlò maban[49], ndò bò bësë bakuban nyè a nyòl,

⁵⁸bësogolo nyè a ṅnyie tisòn a nsëṅ, bëngalum nyè ngòg[50]. Bëwusnèt bëngadzoge biyie biaban a mëkol më man ndoman a si, dzoe na Saulus;

⁵⁹A bëwoe Stefanus ai ngòg ha, nyè avëë kiṅ, nyè na: A Nti Yesus, nòṅò nsisim wama.

⁶⁰Ndò aku ai mëbòṅ a si, angakòbò a yob ete na: A Nti, të walaṅ bò nsëm hi. Akòbògò nala, ndò akë a oyò.