Read Ewondo Bap 8 Bible Online

Bap 8 - Ewondo bible

Bap 8

¹Saulus angabë ai bò kiṅ na bëwoe nyè. Mëlu mëte, ndò mod efëma angakui nda-Zamba ya Yerusalem a nyòl; Bod bësë bëmana tsaman a nnam Yudea, ai Samaria, sësala hë apostel.

²Bod bë ngogëlan bëziṅ bëngadzëb Stefanus, ndò fë bëngayëb nyè abui.

³Saulus angavu ha, akë atsam nda-Zamba a mënda mënda ya anyian ete, adudugu fam ai bininga, afudigi bò a mbog.

⁴E bod bësë bëngamana tsaman bëngakë hm bayëdan mbëmbë foe.

⁵Filip angasigi a tisòn Samaria, angayëdan bò Kristus.

⁶Minkunda mitoan fò vogolo e mam Filip akada bò, bëtoa nnëm mbòg mbòg eyòṅ bëwogo, bëyënë fë e mëndëm angabë abòòg.

⁷Amu mvid minsisim mingakui abui bod a nyòl, miakë miabam a yob ete, abui mintèd ai mimbombog mingasyeban.

⁸Ndò mintag mingadzie a tisòn te a tuud.

⁹Mod ziṅ hala, dzoe na Simun, hala atari ya bò mëngaṅ a tisòn te ha, bod ya Samaria bëngakam, mod te nyè na anë mfaṅ mod,

¹⁰bod bësë bëtoan nyè vogolo, atarigi a bòngò, akui a bënyia-bodo, bò na: E mod nyò anë e ngul Zamba ya baloe na 'Mod-ngulu'.

¹¹Bëngatoan nyè vogolo ha ban mëlu, hë etòm e mëngaṅ mëbòò na bëkam.

¹²Eyòṅ hm bëngayëbë na Filip ayëdan mbëmbë foe edzoe Zamba ai dzoe Yesus Kristus, ndò fam ai bininga bëngaduuban.

¹³Ndò fë tò Simun nyè angayëbë, ndò angaduuban, angalad hm fò Filip a nyòl ha, akama eyòṅ ayënë mëndëm ai mam më ngul mënen mëbòòban.

¹⁴Eyòṅ apostel ya Yerusalem bëngawog na Samaria ayëbë ebug Zamba, ndò balom Petrus ban Yohannes we,

¹⁵ndò bëngasigi, bëngakogëlan asu daban, na bëbi Mfufub Nsisim.

¹⁶Amu hala te abë ki ku tò mod mbòg a nyòl; bëngaduuban hë ṅduan a dzoe Nti Yesus.

¹⁷Ndò hm bakë babede bò mò, bëbii Mfufub Nsisim.

¹⁸Simun angayi yen na nsisim wavëëban ai mbëdan mò apostel, ndò azu ai bò mòni,

¹⁹nyè na: Mina fë vaan ma e ngul nyi, na e mod osë mayi bede mò, abi Mfufub Nsisim.

²⁰Petrus nyè ai nyè na: Ai wamen ai mòni woe, mimana ki ana, mbol wadzo na wakus efaè Zamba ai mòni!

²¹Wabëlë ki dzom ziṅ ngë ngab e dzam di, amu nnëm woe wasëki tëtëlë a mis më Zamba.

²²Dzoge hm abe doe te a si, okogëlan ai Nti, eyòṅ te ayi wa dzu olam ya nnëm woe te,

²³amu mayen na onë a etòg nsëm, otii a mësuṅ më mbë nnëm.

²⁴Simun nyè ai nyè na: Mina, kogëlan ai Nti asu dama, asu yë na të mbë dzam ya mihë dzo ayënan ai ma.

²⁵Ndò hm bëngamëm fò, bëkada ebug Nti, ndò bëngadugan a Yerusalem, bëkëlë bayëdan mbëmbë foe a abui mal bësamaritan.

²⁶Ndò englès Nti adzo ai Filip na: 'Kodogo a si, okë a nnam a nkyè, e zen yatye a Yerusalem, esiigi a Gaza, zen te enë a nkod-nnam.'

²⁷Ndò angakodo a si, ayëmë zen. Ondzi na, mod ya Etiopia[51], e mod nyò atoa miag, atoa nkala-byem bi Kandaki, nkukuma ya Etiopia, angasò na azu kogëlan a Yerusalem;

²⁸Hala angadugan ya ha, antoa hm a ekalig dzie a yob, angalaṅ profèt Isaias.

²⁹Ndò nsisim wadzo ai Filip na: 'Këlë wabie ebigidi dzi.'

³⁰Ndò Filip akë mbil osu, awogo e mod nyò alaṅa profèt Isaias, nyè ai nyè na: 'Yë wawog fò e dzam walaṅ dili?'

³¹Mod te nyè na: 'Eyë mënë dzam wog ya, ngë mod ziṅ atimi ki ma?' Ndò angakogëlan ai Filip. Filip abëdë a ebigidi, atòbò ai nyè.

³²Aboda ntilan angabë alaṅa angabë na: Bëngakë ai nyè hë anë ntomba ya bakë tsig; anë evol anë e man ntomba atëlë e mod atsig nyè mimvòd osu; nala, nyè të yaè anyu die. Amu enyiṅ dzie evaaban ya a si[52].

³³Asu edzòdi-nyòl dzie, ndò bandzëki tsig ntol woe, Za angalèè nlaṅ ya ngongo dzie? Amu enyiṅ dzie evaaban ya a si.

³⁴Ndò e miag mod hi wadzo ai Filip na: 'Masili wa na, za profèt akòbò ai nyè e dzam di? Yë nyè emen, yë mod mfë?'

³⁵Ndò Filip abodo nkòbò, atari a aboda ntilan te, angakad nyè mbëmbë foe Yesus.

³⁶Bëkëlë a zen ha, ndò bakui a osoe, e miag mod hi wò na: 'Mëndim ma, dze yakaman na mëbë duuban?' [

³⁸Ndò abende na bëtele ebigidi, bò bësë bëbè bësusu a mëndim, ai Filip ai e miag mod hi, ndò angadu nyè.

³⁹Eyòṅ bëngadugan bed a kindig, ndò nsisim Nti waanòṅ Filip, e miag mod hi tègè fë nyè bada yen, nyè angakë të fë dzam die ai mintag.

⁴⁰Bëngadugan wodan Filip a Azot. Angakë akë a mal mal, akë abende mbëmbë foe a bëtisòn bësë, akëlë kui anë azu kui a Sezarea[54].