Read Ewondo Bap 9 Bible Online

Bap 9 - Ewondo bible

Bap 9

¹Saulus antoa hë na andëgëlë bëyègè bë Nti, awoe fë bò. Ndò akë abë fada nen,

²adzaè nyè bëkalara asu mënda bikoan ya Damaskus[55] na, ngë ahë kòb bod bëziṅ bëbòò adzo zen, tò fam tò bininga, atindi bò ngadag, asò ai bò a Yerusalem.

³Abog akëlë ha, hala akui ya babi a Damaskus, etye etye na, ndò mfyè ongasò a yob, okuban nyè a nyòl hë anë zeyaṅ,

⁴ndò angaku a si, angawog kiṅ edzoo ai nyè na: A Saulus, a Saulus, a dze waluman ai ma?

⁵Nyè na: Wa za, a Nti? E nyò mbòg nyè na: Ma mënë e Yesus waluman ai nyè[56].

⁶Ndò hm, kodogo a si, onyian a tisòn; bayi wa kad e dzam wayean bò.

⁷E bod bëngabë ai nyè a zen ha bëngalaṅan mënyu mëyoo, bëwogo hë kiṅ, të yen tò mod.

⁸Ndò Saulus angatëbë a si; eyòṅ mis mëngayaaban nyè, të fë yen dzom. Bëngakë ai nyè, bëbëlë nyè a wò, ndò banyian ai nyè a Damaskus.

⁹Ndò angatòbò nala, mëlu mëlè, të yen, të di, të nyu.

¹⁰Ṅyègè ziṅan gabë a Damaskus, dzoe na Ananias; ndò Nti angadzo ai nyè a nlo na: A Ananias! Nyè na: Ma nyò, a Nti.

¹¹Nti ai nyè na: Tëbëgë, okë a ndzòṅ baloe na tëtëlë ndzòṅ, odzëṅ mod dzoe na Saulus ya Tarsis[57], a nda Yudas. Amu akogëlan,

¹²ndò ayen mod a nlo dzoe na Ananias, mod te anganyian, abedëge nyè mò asu yë na adugan yen.[58]

¹³Ananias nyè na: A Nti, mëwog ya abui bod bëkòbògò adzo e mod nyòlò, e bëbe bë mam bësë abò mimfufub[59] mie a Yerusalem.

¹⁴Ndò fë bëfada bënen bavë nyè ngul ya abi e bod bësë baloe dzoe doe mu.

¹⁵Nti ai nyè na: Këlëg, amu mod te anë ntòban na abëgë dzoe dama a bëhaiden, ai minkukuma, ai bòn bë Israel.

¹⁶Amu mayi nyè lëdë e mam mësë ayi dzugi asu dzoe dama.

¹⁷Ndò Ananias angatye, anyian a nda, ndò abede nyè mò, nyè na: A Saulus, a madzaṅ, Nti alom ma, e Yesus ayene wa a e zen ozaag, asu yë na odugan yen, odzie fë ai Mfufub Nsisim.

¹⁸Etye etye na, byem bingasòdan nyè a mis anë bibas, angadugan yen. Ndò angakodo a si, aduuban.

¹⁹Ndò angadi bidi, anòṅò ngul. Angatòbò ai bëyègè ya Damaskus hala ban mëlu;

²⁰Etye etye na, angayedan Yesus a mënda-bikoan na ṅnyè anë mòn Zamba.

²¹E bod bësë bëwogo nala bëngakam, bò na: Së e mod nyò ṅnyè angabë amanëṅa e bod baloe e dzoe di ai si a Yerusalem a? Së asu te ndò asò ha na azu bò faṅ ngadag, akë ai bò a bëfada bënen a?

²²Ngul engafëdan naṅ Saulus a nyòl, angatoe Yuden ya Damaskus biboṅ, alëdëgë bò na Yesus ṅnyè anë Kristus mfaṅ.

²³A mvus ban mëlu hala, ndò Yuden bëngawoe oyili na bawoe nyè[60].

²⁴Ndò Saulus angayëm oyili waban. Bëfòmbògò mimbè mi dzal ai alu, ai amos, asu yë na bëwoe nyè.

²⁵Ndò bëyègè boe bënganòṅ nyè ai alu asë, ndò basuu nyè ai mfim osë a nkoe etere.

²⁶Eyòṅ angakui a Yerusalem, ndò angadzëṅ na anyian bëyègè a nyòl; hë da bò bësë bëmbarëga nyè, bò të ṅyëbë na anë ṅyègè.

²⁷Ndò Barnabas anganòṅ nyè, akëlë ai nyè abë apostel, ndò angamana bò lèè akyaè angayen Nti a zen a yob ai mbol angakad nyè, ai mbol angakòbò ai fim esë a dzoe Yesus.

²⁸Ndò angakaè na akë ai bò fufulu, asë ali, anë ali, a Yerusalem ha, akòbògò ai fim esë a ngul dzoe Nti,

²⁹angalèè, alaṅëdan ai Yuden bë Grek, bëngadzëṅ na bawoe nyè.

³⁰Ayëm babënyaṅ bëngayëm nala, ndò basigi ai nyè a Sezarea, bëlomo nyè a Tarsis.

³¹Ekoan nda-Zamba engabë a saaṅ a Yudea asë, ai a Galilea ai a Samaria, eloṅëban, ewulugu, ekama Nti, ebuguban ai nkëan Mfufub Nsisim.

³²Ndò hm labò ha na, Petrus akëlë awulu ha, ndò angasigi mfag e mimfufub ya mingabë a Lidas.

³³Ndò angakòb mod ziṅ we, dzoe na Aineas, e mod nyò amana ya bò ntèd ha, abombo ya a enòṅ ha bisëb mwom.

³⁴Ndò Petrus adzo ai nyè na: A Aineas, Yesus Kristus abò wa mvoè. Kodogo a si, wamen okom enòṅ dzoe. Etye etye te, ndò angatëbë.

³⁵Ndò bod bësë ya Lidas bëngayen nyè, tò e ba ya Saron, ndò bëngavëṅan, bëngayëbë Nti.

³⁶Mininga ziṅan gabë a Yopa[61], dzoe na Tabita, nala watyan na: Ngòn nkògò. Angabë abòò abui mimbëmbë mi mam, atoa fë akab abui.

³⁷Mëlu mëte, ndò angakòn abui, awuu. Ndò hm bëngamana nyè wòbò, bëboe nyè a nda-yob.

³⁸Mbol ya Lidas anë babi ai Yopa, awogo bëyègè bëngawog na Petrus anë we, ndò balom nyè bod bëbè, bëngakogëlan ai nyè na: Zaag të a binë, të tigibi.

³⁹Ndò Petrus angakodo a si, akëlë ai bò. Eyòṅ angakui a ete, ndò bakë ai nyè a nda-yob; minkus misë mitëtëlan nyè babi, miyono, bëngalëdë nyè biwòman ai biyie bisë ya Dorkas angatiṅ eyòṅ angabë ai bò;

⁴⁰Ndò Petrus angakuli bësë a nsëṅ, ndò akud mëbòṅ, angakogëlan, ndò akilan mfag mbim ongabë, nyè na: A Tabita, tëbëgë. Ndò Tabita ayaè mis, ayënë Petrus, akomo etoa.

⁴¹Ndò asam nyè wò, atëlë nyè a si. Ndò azu loe mimfufub ai minkus, atëlë nyè bò a zaṅ, atala.

⁴²Ndò adzo di angayëmëban a Yopa asë, abui bod bëyëbë Nti.

⁴³Ndò angabombo ban mëlu a Yopa abë Simun, nkomo bikop.