Read Ewondo Tit 1 Bible Online

Tit 1 - Ewondo bible

Tit 1

¹Ma Paulus, mbò-esye Zamba, man apostel Yesus Kristus asu ṅyëbë e bod Zamba angatòb, ai asu ṅyëman bëbëla ya olugu Zamba,

²ai afidi enyiṅ kòm ya e Zamba ayëm ki minnal angakag osusua bisëb bisëb.

³E mëlu ma, akuli ebug dzie a nkadan mbëmbë foe ya bëngavë ma a abende nkode waan;

⁴Matil Titus, mfaṅ mòn wama a ṅyëbë ya onë bia fufulu; maa ai mvoè bibòò ai wa, bisòò abë Zamba esya ai Kristus Yesus nkode waan.

⁵Asu te mëngalig wa a Kreta, asu yë na omana kom e mam mësë mëvòg, otele fë bënyia-bodo a tisòn osë, akyaè mëngabende wa,

⁶ngë mod ziṅ anë tègè ai ebug balaṅ nyè, abëlë hë mininga mbòg, abëlë e bòn bayëbë, tègè ai na bënë nyè dzam laṅ enyënyam ziṅ, tègè ai nyè mëlò.

⁷Amu bisòb ayean bò tègè ai ebug balaṅ nyè, mbol anë etye nkala nda-Zamba, tègè ai nyè mëbun, tègè vol wog olun, tègè diṅ mëyòg, tègè diṅ bitòm, tègè dzëṅ akuma a nkòt,

⁸ayean bò afaṅ ai bëyëṅ, adiṅi e dzi enë mbëṅ, mod evovoe, sosoo, mod ngogëlan, ayëmë ban nnëm,

⁹ayëmë a kpiim a bëbëla ebug anë dòkten ayi, asu yë na atoan yëm vòli ai ayëgëlë, ai mfuban, atoan hm fë yëm dò e bod badoan ai nyè.

¹⁰Amu abui bod anë mëlò, batalan a anyu, bod mëdugan, adaṅ adaṅ a eba batye a Yuden,

¹¹bayean bò na bëtòbò bivol; bënë e kan yadzugulu minguma mënda më bod, bëyëgëlë e mam mod ayean ki yëgëlë asu maan bingat ya ete.

¹²Mod mbòg ya abë bò, profèt waban, angadzo na: 'Bod ya Kreta bënë kòm esë hë bod minnal, tsit mëtom, atëg, mindondòg.'

¹³Mbòòlan te onë bëbëla. Asu te kòṅan ai bò ngul ben, asu yë na bëbi mfaṅ ṅyëbë,

¹⁴bëzaa kè mëlò a minlaṅ mi mvèt mi Yuden ai a mëbende më bod, bëngalum bëbëla mvus.

¹⁵Dzom esë enë mfuban asu e bod bënë mfuban. Hë da, asu e bod bëbëlë mvit a nyòl ai asu bëhaiden, tò dzom ziṅ esëki mfuban; tò nnëm, tò sosoo waban, bisë binë ndaman.

¹⁶Bamëm na bayëm Zamba hë da bësiege nyè a mimboan; bakyëbë ai ziṅ, bënë mëlò, tègè dzam bò e dzi enë mbëṅ.