Read Ewondo Tit 2 Bible Online

Tit 2 - Ewondo bible

Tit 2

¹Mfag woe, kòbògò e mam mayean ai mfaṅ dòkten.

²Okad minnom mi bod na të banyu mëyòg, bëbòò e bod bakam, evovoe, bëbëlë mfaṅ ṅyëbë, mfaṅ ediṅ, mfaṅ fin.

³Minnom mi bininga fë dzam dëda, bëbòò ai dzin a fulu dzaban, të babò bësatan, ngë abò olò adzo mëyòg, bëyëgëlë hë e mam mënë mbëṅ,

⁴asu yë na bëyëgëlë ban bininga na bëdiṅ bëyom, bëdiṅ bòn baban,

⁵bëbòò evovoe, mfuban, bëbaala nda mbëṅ, abëṅ nnëm, bëbòò bëyom mëwog, asu yë na të bod bamgbali ebug Zamba.

⁶Dzam dëda, lëbë fë binanga na bëyëm ban nnëm

⁷a mam mësë, lëdëgë na wamen onë mvulna a mimbëmbë mi mam mësë, olëdëgë na onë a saaṅ a dòkten woe, ai dzin,

⁸nkòbò woe obò tègè ai alaṅa-lë ebug, asu yë na e mod adoan ai wa asama, tègè ai mbë dzam anë bia dzam laṅ.

⁹Kada bëlò na bëbò bëti baban mëwog a mam mësë, na bënyëb bò a nnëm, tègè doan ai bò,

¹⁰tègè ai fulu wub, hë da bëlëdë mbëmbë ṅyëbë waban osë, asu yë na bëvë dòkten Zamba nkode waan olugu a mam mësë.

¹¹Amu maa Zamba nkode akulan a bod bësë,

¹²ayëgëlë bia, asu yë na bitam dzoge tëb Zamba etòm miṅyian mi si, bizu hm nyiṅ evovoe, ai sosoo, ai fulu ngogëlan e si nyi,

¹³biyanga mvomvòm afidi ai asò-lë duma Zamba nen ai nkode waan Yesus Kristus

¹⁴ya angakaban asu daan, asu yë na akode bia a nkòt osë, ai na afubu nyè emen akyaè ayòṅ etam, a lamvaman ai mimbëmbë mi mam.

¹⁵Kòbògò e mam ma, olëb, okòṅan fë ai bò ai ngul dzoe ese. Të mod abyandi wa hala!