Read Ewondo Flm 1 Bible Online

Flm 1 - Ewondo bible

Flm 1

¹Ma Paulus, man mimbog Kristus Yesus, ai madzaṅ Timoteus, biatil ndindiṅ waan Filemon a asye fë ai bia fufulu,

²bitili fë Afia kal dzaan, ai Arkipus ya abò esye bëzimbi ai bia fufulu, ai e nda-Zamba yatoban a nda dzoe;

³Maa ai mvoè bibòò ai mina, bisòò abë Zamba esya waan ai abë Nti Yesus Kristus.

⁴Makaṅ Zamba wama kòm esë, mëtsogo wa a ngogëlan dzama,

⁵mbol mawog nlaṅ ediṅ dzoe ai ṅyëbë woe ya obëlë asu Nti Yesus ai asu mimfufub misë,

⁶asu yë na enyiṅ fufulu dzoe ya ṅyëbë ebò mfaṅ, eyòṅ biabò mbëṅ osë onë abë bia asu Kristus.

⁷A madzaṅ, mëngabi abui mintag ai evòli a foe ediṅ dzoe, na wavòli minnëm mimfufub.

⁸Asu te mëbëlë abui azombo abë Kristus na mabende wa e dzam layean,

⁹mazombo kogëlan ai wa, asu ediṅ, akyaè mënë nnom di, ma Paulus, mëtoa man mimbog Kristus Yesus.

¹⁰Makogëlan ai wa asu Onezimus, mòn wama ya mëngabye a mimbog,

¹¹angabë ki ai wa mfi okoba; etoa dzi, antoa ya mfaṅ mfi asu doe ai asu dama,

¹²ṅnyè madugan wa lom nyò; nyè emen nyò, anë nnëm wama oben.

¹³Mëhë yi hm të na mabaala nyè abë ma mu, asu yë na asye ma a mësuṅ më mbëmbë foe a mëyian moe,

¹⁴mandzëki yi na mabò dò tègè wa tam sili, asu yë na të e dzam wabò ai abëṅ nnëm labò hë anë babi wa a ngul, abò fò hë mbol wamen wayi.

¹⁵Eyòṅ ziṅ na asu te ndò angatub wa man eban, asu yë na odugan nyè nòṅ enonòṅò,

¹⁶së hm ki fë anë man olò, dzam da alodo man olò, onòṅ nyè anë ndindiṅ manyòṅ. Anë hm fò madzaṅ ben, anë fë nala abui asu doe, a etye mod ai abë Nti.

¹⁷Ngë wayen hm na bia wa biakaban ṅyëbë mbog, soan ai nyè anë wasoan ai ma.

¹⁸Ngë angabò wa abe ziṅ ngë ki na abëlë wa ekola ziṅ, laṅa ekola te a nlo wama.

¹⁹Mamen Paulus, a matil ai wò wama, ma mayi wa yaan. Mayi ki laṅ hala na obëlë ma ekola ya enë wamen.

²⁰Owe, a madzaṅ, mëtam hm bi mintag ai wa abë Nti. Vòligi ma nnëm abë Kristus.

²¹Mbol mayëm mëwog moe ndò matil wa, mëyëmë na wayi bò e mam madzo.

²²Okomëzan hm fë ma adzogobo. Amu mafidi na bayi ma dzoge na mëzu abë mina asu e ngogëlan miakogëlan.

²³Epafras ya anë ai ma a mbog asu Kristus Yesus asug wa;

²⁴Tò Markus, Aristarkus, Demas, Lukas, a masye ai bò fufulu.

²⁵Maa Nti Yesus Kristus abò ai nsisim waan.