Read Ewondo 3Yoh 1 Bible Online

3Yoh 1 - Ewondo bible

3Yoh 1

¹Ma nyia-modo-mvia, matil ndindiṅ wama Gaius[1] ya madiṅ a bëbëla.

²A ndidiṅ wama, mafidi na onë mvoè ai na wabugëban kan esë, e kan nsisim woe onë mvoè.

³Amu mëngafon eyëgan eyòṅ babëdzaṅ bëngasò ndò bëngalèè ma minlaṅ mie a bëbëla, e kan wawulu a bëbëla.

⁴Dzom efë yavë ki ma mintag alodo anë mawog na bòngò bama bawulu a bëbëla.

⁵A ndindiṅ wama, wabò esye ṅyëbë, e dzi esë wabò babëdzaṅ, tò fë e dzi wabò bëdzin[2].

⁶Bëngalèè ediṅ dzoe a mis bikoan bëyëbë. Bòò të na bëkë ai enyiṅ dzaban osu ai dzin a mis më Zamba.

⁷Asu doe ndò bëngakèè ai dulu, të ṅyëbë e dzom bëhaiden bavë bò.

⁸Mfag waan, biayean kè kan bod te, asu yë na bibò esye dzia ai bëbëla.

⁹Mëngatil ekoan bëyëbë dzom ziṅ. Dzam da, Diotrefas ya asuṅ hë etoa osu, alaṅ ki bia a taṅ.

¹⁰Asu te, ngë mayi sò, mayi laṅ e mam abò ai mgbalan amgbali bia. Ndò hm nala wayean ki ai nyè! Ayi ki na asoan ai babëdzaṅ, ndò fë akaman ai e ba bayi na basoan ai bò, akuligi bò a nda-bikoan a nsëṅ.

¹¹A ndindiṅ wama, obë yègè e dzi enë abe. Yègè e dzi enë mbëṅ. E nyò abò mbëṅ a sò abë Zamba; e nyò abò abe andzëki yen Zamba.

¹²Bod bësë babòòlò Demetrius na abò mbëṅ, ndò fë bëbëla emen abòòlò nyè. Ndò fë bia bëben biabòòlò, ndò wayëm na mbòòlan waan onë bëbëla.

¹³Mëhë bëlë abui mam ya atil wa, dzam da mayi ki na matil ai akòṅ ai tinte.

¹⁴Mafidi na mayi wa vol dugan yen, bingalèè hm bia bëbè.

¹⁵Mvoè ebòò ai wa. Bëmoe basug wa. Sugu bëmoe, anë mod a dzoe die.