Read Ewondo Yud 1 Bible Online

Yud 1 - Ewondo bible

Yud 1

¹Ma Yudas, mbò-esye Yesus Kristus, manyaṅ Yakobus, matil e ba bëngaloeban, mindindiṅ abë Zamba esya; a bënë na bëngaloe bò asu Yesus Kristus.

²Ngòl, mvoè ai ediṅ bibòò ai mina etitib.

³A mindindiṅ miama, mbol fò mayag na matil mina adzo akode anë bia fufulu, ndò mëyen na mayean mina til, mëkad mina na midzëṅ ṅyëbë bëngavë mimfufub evëvëë.

⁴Amu bod bëziṅ bënganyian omomoa; bëngabë nkomëzan asu nkat te okoba; balugu ki Zamba; batsende maa Zamba waan entoa ebamba, bësiege ṅyëgëlë waan etam ai Nti waan Yesus Kristus.

⁵Mayi na madugan mina tsog, tò anë mbol miayëm mësë na, Nti angakode nnam eyòṅ dzidzia a si Egipten, eyòṅ bèè ndò angadzèè e ba bandzëki yëbë;

⁶E benglès ya bandzëki baala e hom edzoe waban, bëkodo a etòbògò dzaban, anganyie bò a ebe ndoan a si, asu nkat ya amos nen, bëtii a mësuṅ më kole.

⁷Hë anë Sodoma ai Gomorra ai e bëtisòn bë ngòdò hala a bëngabë fë hë ebamba dzam dëda, bëvomdan mbol wayean ki, balëdë mvulna endëgëlë ndoan kòm.

⁸Dzam dëda fë e bod ba a biyëyëm biaban, bazu ai nyòl mvit, bëbyandigi ati, bëmgbaligi mimbëmbë benglès.

⁹Eyòṅ ertsenglès Mikael angabë alaṅëdan ai Satan etòm mbim Moses[1], andzëki zombo nyè tsig ntol ai atè, dzam da angadzo na: Zamba akòṅan ai wa!

¹⁰Dzam da e ba bamgbali e dzi esë bayëm ki, e byem ya bayëm nala tègè ai fëg anë tsit yabëlë ki nlo yayëm, etere ngò badzaṅ.

¹¹Amala ai bò, amu bëngawulu a zen Kain, asu ndòg akuma ndò batoṅ evus Balaam, bëngawu a mëlò më Korah.

¹²E bala bënë mëlam a mëbog më ezëzam maan, bavoe ai enyiṅ tègè sigan, babisi hë bëben, bënë e minkut minë tègè ai mëndim, a evundu yatindi. Bënë bile binë tègè ai bibuma abog mëkoe, ṅwuan biyòṅ bibè, mfuman a si.

¹³Bod minsum mëndim ya maṅ, bëkuligi avul ya osòn waban, atitie ya lawulu, a bëngakomëzan ebe ndoan ya dibi a kòm ya kòm.

¹⁴Enok angakòbò adzo daban anë profèt, ngongo ebulu atarigi abë Adam, nyè na: Yënë, Nti angasò ai mimfufub minkunda mie,

¹⁵na abò bësë nkat, akpèè e bod bësë babëlë ki Zamba a nkat asu bëbe mimboan baban bëngabò tègè bisi Zamba, ai asu bëbe bë mam bësë bësëm bayëbë ki Zamba bëngalaṅ nyè.

¹⁶Bod bëte mbò balòdan, bësaṅan; batoṅ hë miṅyian miaban, ndò fë anyu daban lakòbò minkòbò mi enguṅ, babòlan bod ai ezëzëk nkòbò.

¹⁷Mfag waan, a mindindiṅ miama, miayean tsog e mam apostel bë Nti waan Yesus Kristus bëngatari kad.

¹⁸Bëngakad mina na: A mëlu më mvua, bod bë fyanga bayi bò hala, bëtoṅo hë miṅyian miaban a miabisi ki Zamba.

¹⁹Bod bëte mbò batsam bod, bod bë si-ndon, tègè ai Nsisim a nyòl dzaban.

²⁰A mindindiṅ miama, mfag waan, loṅan enyiṅ dzaan mina bëben a mod mfufub ṅyëbë waan, mikogëlan abë Mfufub Nsisim.

²¹Baalan mina bëben a ediṅ Zamba ete. Yangan ngòl Nti waan Yesus Kristus asu enyiṅ kòm.

²²Yënan e ba babod ngòl,

²³mikode e ba bëvòg, mivaaga bò mfag bënë a ndoan; Yënan e ba bëvòg ngòl ai wòṅ osë, mifëmë tò eyie ya nyòl enë mvit.

²⁴E nyò anë ngul ya akala mina na të miaku, ai alëdë mina a mis më duma die tègè ai atòn, ai mintag,

²⁵abë Zamba ya anë etam, nkode waan, abë Yesus Kristus Nti waan, duma, ati, ngul, edzoe, osusua bisëb ai etoa dzi ai a bisëb bisë. Amen.