Read Ewondo Ekm 13 Bible Online

Ekm 13 - Ewondo bible

Ekm 13

¹Ndò mëngayen tsit afan[42] esòò a maṅ ete, ebëlë tòṅ awom ai minlo zamgbal[43], mintom mi nkukuma awom mibëdë nyè a minlo: mënë moe më ekpëlë.

²Ndò e tsit mëngayen engabë anë zë, mëkol moe anë tsit fë, anyu die anë anyu emgbëm. Ndò ngaṅ-mëdzaa angavë nyè ngul dzie ai etoa-ati dzie, ai mod fim.

³Nlo woe mbòg ongabë anë bëngabaè wò avëṅ na awu, ndò avëṅ awu di angalèd. Si esë engatoṅ e tsit afan nyi a minkamaṅ ete.

⁴Bëngalugu ngaṅ-mëdzaa, amu angavë tsit afan ngul, bëngalugu tsit afan bò na: Za afulan ai tsit afan, za ki anë dzam luman ai dzò?

⁵Ndò bëngavë nyè anyu labò enguṅ, akpëgëlë fë, bëvë nyè ngul ya abò dò ngòn mëwom mënyii ai ebè.

⁶Ndò angayaè anyu die na amgbali Zamba, na amgbali dzoe die ai nda dzie, e bod bëtoa a yob.

⁷Ndò bëngavë nyè ngul ya aluman ai mimfufub, ai atëgë bò, ndò fë bëngavë nyè ngul ya adzoe nda-bod esë, ai ayom, ai nkòbò ai ayòṅ asë.

⁸Ndò e bod bësë bëtoa a si bayi nyè lugu, e ba ya dzoe daban asëki ntilan osusua akomo-lë yob ai si a kalara enyiṅ man ntomba ya angatsigëban.

⁹Ngë mod ziṅ abëlë mëlò, awogo!

¹⁰Ngë mod ziṅ anë asu mëkaban, akëlë a mëkaban. Ngë mod ziṅ ayean wu nyamëla okëṅ, bayi nyè woe ai nyamëla okëṅ. Aha ngò hm bayen azombo ai ṅyëbë mimfufub.

¹¹Ndò mëngayen tsit afan fë ehama a si, ebëlë tòṅ ebè anë ntomba, dzam da ekòbògò anë ngaṅ-mëdzaa.

¹²Tsit te yabò mam më ngul më tsit afan osu a mis moe, engabò na tsit ai e bod bëtoa ete bëlugu e tsit afan osu ya avëṅ awu die angamana lèd.

¹³Yabò mëndëm mënen, yabò na ndoan ezu a yob, esus a si a mis më bod,

¹⁴ndò adug e bod bëtoa a si ai mëndëm ya bëngavë nyè ngul na abò a mis më tsit afan, akada e bod bëtoa a si na bëkom bivëgëlë asu e tsit afan bëngabali ai nyamëla okëṅ, enyiṅ ifë.

¹⁵Ndò bëngavë nyè ngul na avë evëgëlë tsit afan ṅhëbë, evëgëlë tsit afan entoa dzam kòbò, abò fë na e bod bësë balugu ki evëgëlë tsit afan bëwu.

¹⁶Ndò fë abò na bësë, tò bòngò tò bënyia-bodo, tò minkukuma tò mimbubua, tò bod bë fili, tò bëlò, na bëfudi bò ndëm a wò mbo-nnomo ngë ki na a mvòm asu.

¹⁷Mod angabë dzam kuan ngë ki na akus hë abëlë ndëm; ndëm te enë dzoe tsit afan ngë ki na e nòmbò ya dzoe die.

¹⁸Fëg enë hm ha. E mod abëlë fëg, alaṅa nòmbò tsit afan[44], amu enë nombò mod, nòmbò woe anë mintèd misaman ai mëwom mësaman ai misaman.