Read Ewondo Ekm 14 Bible Online

Ekm 14 - Ewondo bible

Ekm 14

¹Ndò mëngayen ntomba otëlë a nkol Sion, bod bënë ai nyè ha ntèd tòzin ai tòzin mëwom mënyii ai enyii, bëbëlë dzoe die ai dzoe esya atoa bò ntilan a mvòm asu[45].

²Ndò mëngawog kiṅ esòò a yob anë kiṅa bui mëndim ai anë kiṅ mod nkulu; e kiṅ mëngawog etoa anë kiṅ bëbomo bë mvèt babom mvèt dzaban.

³Bëngayia hë anë mkpamaṅ dzia a etoa-ati osu, ai a mis më tsit enyii ai a mis minnom mi bod, ndò mod ziṅan gabë ki dzam yègè dzia, sësala hë ntèd tòzin ai tòzin mëwom mënyii ai enyii a bëngakus a si.

⁴Mbò bandzëki kalan mvit ai mininga, amu bënë mintud, mbò batoṅ ntomba e hom osë wakë. Mbò bëngakus a bod na bëbò mintol asu Zamba ai asu tsit afan,

⁵ndò bandzëki yen mëdugan a anyu daban, bënë tègè ai atòn.

⁶Ndò mëngayen englès mfë ayëlëgë a yob, abëlë mbëmbë foe kole na akad e bod bëtoa a si-ndon, ai ayòṅ asë, ai nda-bod esë ai nkòbò, ai ayòṅ,

⁷akòbògò a yob ete na: Mbarëgan Zamba, mivë nyè duma, amu awola nkat die asò ya, luugan e nyò angakom yob ai si, ai maṅ, ai bitam mëndim.

⁸Englès mfë, e nyò bèè, azaa a mvus hala, nyè na: Aku ya, Babilon[46] nen aku ya a si, ṅnyè anganyuu mëyòṅ mësë wayn miṅyian bisog mie.

⁹Englès mfë, enyò lala, atoṅo bò, akòbògò a yob ete na: Ngë mod ziṅ a lugu tsit afan ai evëgëlë dzie, anòṅò fë ndëm dzie a mvòm-asu ngë ki na a wò woe,

¹⁰e nyòlò te ayi nyu wayn olun Zamba a bayi bag eligidi eligidi a kòb olun dzie, ayi bi etibili a ndoan ai sulfur a mis mimfufub benglès, ai a mis më ntomba.

¹¹Otsida etibili dzaban wabed a bisëb bisëb; e bod balugu e tsit afan nyi ai evëgëlë dzie, ai e mod abëlë ndëm dzoe die, babëlë ki awaè ziṅ, tò ai alu tò ai amos.

¹²Fin mimfufub hm nyi yaloe ha, e ba babaala mëbende më Zamba ai ṅyëbë Yesus.

¹³Ndò mëngawog kiṅ esòò a yob na: Tilig. Atarigi etoa dzi, mvòm ai bëwu bëngawu abë Nti.

¹⁴Ndò mëngayen nkut ofumu, mod atoa a nkut a yob afulan ai mòn mod, abëgë ekadi mvòt a nlo, abëlë ebag bafumi bidi ete, evolo.

¹⁵Ndò englès mfë angakui a tempel, angadzo a yob ete ai e mod angabë atoa a nkut na: Bëmë ebag dzoe, ofumi, amu awola bafumi bidi asò ya, amu mëkoe bidi ya si mëmana ya wum.

¹⁶Ndò e mod angabë atoa a nkut a yob nyò angabëm ebag dzie a si, angafumi si.

¹⁷Ndò englès mfë angakui a tempel ya anë a yob, nyè fë abëlë ebag ofumi evolo.

¹⁸Ndò englès mfë angakui a alatar, abëlë ngul ya adzoe ndoan, ndò angaloe e nyò abëlë ebag ofumi evolo a yob ete na: Bëmë ebag dzoe yavol, okoe mësaṅ bibuma bi wayn ya si, amu mësaṅ bibuma moe mëngavie ya.

¹⁹Ndò englès angabëm ebag dzie a si, angakoe wayn ya si, angafudi a mod kumba Zamba batòs nyè ete.

²⁰Ndò bëngatòs wayn a tisòn a nsëṅ, mëki mëngakui a ntòsan hi, dzam bò akui a ntye mësuṅ më ekabëli, dzam bò kilomera mintèd milè.