Read Ewondo Ekm 16 Bible Online

Ekm 16 - Ewondo bible

Ekm 16

¹[48] Ndò mëngawog mod kiṅa sòò a tempel, adzoo ai benglès zamgbal na: Kaṅan soe kòb olun Zamba zamgbal a si.

²Ndò e nyò osu angakë, asoe kòb dzie a si, ndò mbë fol angabò abë e bod bëngabë bëbëlë ndëm tsit afan, bëluugu fë evëgëlë dzie.

³Ndò e nyò bèè angasoe kòb dzie a maṅ, antoa anë mëki më mbim, ndò ekokoma esë yanyiṅ a maṅ engawu.

⁴Ndò e nyò lala angasoe kòb dzie a asoe ai bitam mëndim, bivëṅan mëki.

⁵Ndò mëngawog englès mëndim adzo na: Onë sosoo, wa ya onë, ndò fë ongabë, mfufubu, amu ongatsig e mintol mi,

⁶amu bëngasoe mëki mimfufub ai bëprofet a si, ndò ongavë bò mëki na bënyu. Bakyëbë ai nala.

⁷Ndò mëngawog alatar adzo na: Owe, a Nti Zamba ngul mësë, mintol mie minë bëbëla ai sosoo.

⁸Ndò e nyò nyiina angasoe kòb dzie a nlo-dzobo a yob, ndò bëngavë nyè ngul ya adigi bod ai ndoan.

⁹Ndò bod bëngadig a mod ndoan, bëngamgbali dzoe Zamba ya abëlë ngul ya adzoe e bindëgëlë bi, bò tègè vëṅan na bavë nyè duma.

¹⁰Ndò e nyò tana angasoe kòb dzie a etoa-ati tsit afan[49], edzoe dzie ekuu a dibi; bod bëngalob mësoṅ a oyëm ai abui mintye,

¹¹bëngamgbali Zamba yob asu mintye miaban ai fol dzaban, bò tègè lum mimboan miaban mvus.

¹²Ndò e nyò samëna angasoe kòb dzie a osoe nen, a Efratis, ndò mëndim ya ete mëngamana hele, asu yë na zen minkukuma ya mëkui më dzobo ekomban.

¹³Mëngayen minsisim mi mvit milè mikui a anyu ngaṅ-mëdzaa ai anyu tsit afan ai anyu profèt mëdugan hë anë bëbëba.

¹⁴Amu bëngabë minsisim bësatan bëbòò mësimba, a bakë a minkukuma ya si esë na bakoan bò asu bita ya amos nen Zamba ngul mësë.

¹⁵Ma nyòlò mazu anë ṅwuwub. Mvòm ai e nyò anë evie, abaala fë biyie bie, asu yë na azaa wulu nsò, bëyënë fë osòn woe.

¹⁶Ndò angakoan bò e hom baloe a nkòbò ebrea na Harmagedon[50].

¹⁷Ndò e nyò zamgbala angasoe kòb dzie a evundu, ndò mod kiṅ angasò a tempel a etoa-ati na: Lëbòban ya.

¹⁸Antoa ha ai zeyaṅ, ai kiṅ, ai nkulu, ndò fë si engatigëdan abui, akyaè eyëgan ntigëdan abë ya ki bò anë mod angatòbò a si-ndon.

¹⁹Ndò mod tisòn angakaban ngab elè, bëtisòn bëhaiden bëkuu a si. Ndò Zamba angatsog Babilon nen na anyuu nyè kòb wayn olun woe.

²⁰Ndò elon esë engatub, tègè dugan yen minkol.

²¹Ndò abui mëtaag adid abui mëngasò a yob, mëngaku bod a nyòl, bod bëngamgbali Zamba etòm endëgëlë mëtaag, amu endëgëlë te enë fò eyëgan adid.