Read Ewondo Ekm 19 Bible Online

Ekm 19 - Ewondo bible

Ekm 19

¹A mvus te, ndò mëngawog dzom hë anë mod kiṅa bui bod a yob, bëdzoo na: Alleluia[56], akode ai duma ai ngul binë abë Zamba waan,

²amu mintol mie minë bëbëla ai sosoo. Amu angatsig ntol mininga ebamba nen, ṅnyè angabë andamëṅan si ai ebamba dzie, ndò akun mëki bësye boe ya mëhë lad mininga te a mò.

³Ndò badzo eyòṅ bèè na: Alleluia; Otsida woe wabed a yob a bisëb bisëb.

⁴Ndò minnom mi bod mintèd minyii ai tsit enyii bëngalaban a si, bëngalugu Zamba ya atoa a etoa-ati, bò na: Amen, Alleluia!

⁵Ndò kiṅ engasò a etoa-ati na: Lugan Zamba waan, mina bësye boe bësë, ai e mina miambara nyè, tò bòngò tò bënyia-bodo.

⁶Ndò mëngawog hë anë kiṅ mod nkunda, ndò fë hë anë eduṅ abui mëndim ai anë eduṅ mod nkulu na: Alleluia, amu Nti Zamba waan ngul mësë adzoe, anë nkukuma.

⁷Ntaan, bifono, bivë nyè duma, amu alug ntomba asò, ndò ngal woe amana ya komëzan,

⁸ndò bëvë nyè ngul na abòd abëṅ efus eyie efyèè, tègè ai atòn. Amu abëṅ efus eyie enë mimboan mi sosoo mimfufub.

⁹Nyè ai ma na: Tilig! Mvòm ai e ba ya bënë mbandan a ndam bidi bi alug[57] bi man ntomba. Nyè ai ma na: Mimfaṅ bibug bi Zamba mili.

¹⁰Ndò mëngalaban a mëkol moe a si, na malugu nyè. Nyè ai ma na: Obë dò bò! Mabò esye fufulu ai wa, ai e babënyòṅ bëbëlë mbòòlan Yesus. Zamba ṅnyè olugu. Amu mbòòlan Yesus onë nsisim esye profèt.

¹¹Ndò mëngayen yob oyoo, atëm na mfum ekabëli, mod atoa dzò a yob, bëloege nyè na: mod-afidi, mod-bëbëla. Atsig ntol, aluman fë a sosoo.

¹²Mis moe mënë anë nkabag ndoan, abui mintom mi edzoe minë nyè a nlo, abëlë dzoe ya anë ntilan, a mod mfë ayëyëm, hë emen:

¹³abëgë ewòman ya bëngadu a mëki[58], e dzoe baloe nyè latyan na: Ebug Zamba.

¹⁴Minkan bëzimbi ya yob miatoṅ nyè, bëbëdë a mimfum bikabëli, bëbëgë abëṅ efus eyie, efumu, tègè ai atòn.

¹⁵Nyamëla okëṅ avolo, akui nyè a anyu, asu yë na abaè mëyòṅ ete, ndò nyè ayi bò dzoe ai ntum ekye, ndò fë ayi tòs bibuma bi wayn olun Zamba ngul mësë;

¹⁶Dzoe anë nyè ntilan a abè ai a eyie na: Nkukuma minkukuma ai Nti bëti.

¹⁷Ndò mëngayen englès mbòg atëlë a nlo-dzobo, ndò angabam a yob ete, akòbògò ai anòn asë layëlë a yob na: Zaan koan a mod dina Zamba,

¹⁸asu yë na midi tsit minkukuma ai tsit bëdzoe bëzimbi ai tsit mingungul ai tsit bikabëli ai e bod bëtoa biè a yob, ai tsit fili bod bësë ai bëlò ai bòngò, ai bënyia-bodo.

¹⁹Ndò mëngayen tsit afan ai minkukuma ya si ai minkunda bëzimbi miaban nkoan nkoan na babò bita ai e mod atoa a ekabëli ai nkunda bëzimbi boe.

²⁰Ndò bëngabi tsit afan, fufulu ai nyè ha, bëbii fë profèt minnal ya abò mësimba a mis moe, ete ngò bëkëlë a ndimi ai e bod bënganòṅ ndëm tsit afan ai e ba bëngabë bëluugu evëgëlë dzie. Ndò bëngawoa bò bësë bëbè bëtala a etëtag ndoan[59] yadig ai sulfur.

²¹E ba bëvòg bëngawoeban a nyamëla yakui e mod atoa a ekabëli a anyu, ndò anòn asë angadzie ai ndian minson miaban.