Read Ewondo Ekm 3 Bible Online

Ekm 3 - Ewondo bible

Ekm 3

¹Tili englès ya nda-Zamba ya Sardis na: E mam ma mmò e nyò abëlë minsisim mi Zamba zamgbal ai atitie zamgbal adzo: Mayëm mimboan mie, badzo na ovëë, ndë onë mbim.

²Otòbògò evie, owonëṅe e man abim aligi ya, a atëlë a etye awu, amu mayen ki na mimboan mie minë ntud a mis më Zamba wama.

³Tsogo hm akyaè bëngavë wa ai akyaè ongawog; nyiege dò, otsende fë enyiṅ. Ngë obò tègè bò evie, mayi sò anë ṅwuwub, ndò fë wayi ki yëm awola mayi wa ku a nyòl.

⁴Dzam da, obëlë te ban bod a Sardis a bavë ki biyie biaban mvit; bayi wulu ai ma bëbëgë mimfum biwòman, amu bakyëbë ai nala.

⁵Zingi yayi bòd mimfum biwòman nala, ndò fë mayi ki dim dzoe die a kalara enyiṅ; mayi mëm dzoe die a mis më Tara ai a mis benglès boe.

⁶E mod abëlë mëlò, awogo e dzam Nsisim wadzo ai mënda më Zamba.

⁷Tili englès ya e nda-Zamba ya Filadelfia na: Mfufubu, bëbëla mod, e nyò abëlë edibiga David, ngë ayaè tègè ai e mod afèd, afëdë tègè ai e mod ayaè, akòbò e mam ma na:

⁸Mayëm mimboan mie, yënë, mëngavë wa mbè ya oyoo, a mod asëki dzam fèd, amu onë ngul abòd ndò ongabaala ebug dzama, waandzëki sie dzoe dama.

⁹Yënë sik, bod bëziṅ ya ekoan Satan a badzo na bënë Yuden, ndë basëki, bënë hë bod minnal, mayi bò na bëzu wa laban a mëkol a si, bëyëm na mëngadiṅ ya wa[15].

¹⁰Amu ongabaala ebug fin dzama ndò fë ma mayi wa kala a awola mëbobëla layi sò a si esë, na babobolo e bod bëtoa a si[16].

¹¹Mazu avol. Baala e dzi obëlë, asu yë na të mod ziṅan òṅ ekadi-olugu dzoe.

¹²Mayi bò na zingi ebò andie a nda Zamba wama, aangakui ki a nsëṅ ete; Mayi nyè til dzoe Zamba wama a nyòl, dzoe tisòn Zamba wama, mkpamaṅ Yerusalem ya wasus a yob abë Zamba wama, ai mkpamaṅ dzoe wama.

¹³E mod abëlë mëlò awogo e dzam Nsisim wadzo ai mënda më Zamba.

¹⁴Tili englès ya e nda-Zamba enë a Laodisea na: Bibug bi Amen, mbòòlò ya anë mod-afidi ai mod-bëbëla, mëtari më bikokoma bi Zamba.

¹⁵Mayëm mimboan mie, na wasëki tò avëb, tò ayoṅ. Ngë otoa dzam bò avëb ngë ayoṅ!

¹⁶Mbol hm onë ntotòm, tègè ai nyè ayoṅ ngë avëb, mazu wa yo a anyu dama.

¹⁷Mbol wadzo na: Mëbëlë akuma, ndò fë mazuzu ya mabò nkukuma, mayaṅan ki ai dzom ziṅ, dzam da wayëm ki na wa onë dzëdzaa, mbubua, ndindim ai nsò.

¹⁸Malëb wa na okus mvòt ya bëmana ya bum a ndoan abë ma, asu yë na obi akuma, okus mimfum biwòman, obòd, osòn ya nsò woe tègè fë kui a ngëëṅ; okus mbòn basii a mis, osii asu yë na otoan yen.

¹⁹Makòṅan ai e ba madiṅ, mëndëgëlë fë bò. Bò hm mvam, otsende hm fë enyiṅ.

²⁰Yënë, mëtëlë a mbè, mëkudu; ngë mod ziṅ awog kiṅ dzama, ayaè ma mbè, mayi nyian abë nyè, mëngadi ai nyè, nyè fë ai ma.

²¹Mayi bò na zingi etòbò ai ma a etoa-ati dzama, akyaè ya mamen mëngakui zingi, mëtòbò fë ai Tara a etoa-ati dzie.

²²E mod abëlë mëlò awogo e dzam Nsisim wakad mënda më Zamba.