Read Ewondo Ekm 4 Bible Online

Ekm 4 - Ewondo bible

Ekm 4

¹A mvus e mam ma, mëngayen mam a nlo: mbè oyoo a yob, e kiṅ osu mëngawog ekòbògò anë tòṅ engadzo ai ma na: Zaag abë ma a yob mu, mayi wa lëdë e mam mayean yenan a mvus e ma.

²Etye etye te, mëntoa anë a biyëyëm, ndò bëngatele etoa-ati a yob, mod antoa etoa-ati dzi a yob,

³e mod angabë atoa nyò angafulan ai ngòg yasper ai sarda, ndutum ongabë etoa-ati ndiṅan a nyòl, ofulan ai ngòg smaragda.

⁴Bitoa mintèd minyii bingabë etoa-ati edinga a nyòl; a bitoa mintèd minyii bi, minnom mi bod mitoa, mibëgë mimfum biwòman, bikada bi olugu bi mvòt a minlo a yob.

⁵Felfes ai zeyaṅ ai kiṅ bingasò a etoa-ati dzi, mëlamba më ndoan zamgbal mëyoṅo a etoa-ati osu, mmò mënë minsisim mi Zamba zamgbal[17],

⁶a etoa-ati osu, hë anë maṅ më eyèt[18], mëfyè abui. A zaṅ etoa-ati ai edinga a nyòl, tsit enyii, mis ai nyòl esë, tò osu, tò a mvus.

⁷E tsit osu efulan ai emgbëm, e tsit bèè efulan ai nnom-nyag, e tsit lala ebëlë asu anë edi mod, e tsit nyiina efulan ai e ndoe yayëlë.

⁸E tsit enyii nyi, anë e nyili ebëlë mëfab mësaman, mis mënë bò hom osë edinga a nyòl ai a nnëm ete ha, ndò bakòbò tègè waè, ai alu, ai amos na: Mfufub, mfufub, mfufub, Nti Zamba ngul mësë, ṅnyè angabë, ṅnyè anë, ṅnyè azu.

⁹Ndò hm eyòṅ esë ya tsit yavë e mod atoa a etoa-ati, a avëë a bisëb bisëb, eyòṅ bavë nyè duma ai olugu ai ngaṅ,

¹⁰e minnom mi bod mintèd minyii mi, mingaku e mod atoa a etoa-ati a si osu, bëngalugu e nyò avëë a bisëb bisëb, bëwoaga bikada bi duma biaban a etoa-ati osu, bò na:

¹¹A Nti ai Zamba waan, wakyëbë ai duma, ai olugu, ai ngul, amu wa ongakom bisë, ndò fë bingabòban, bikomban a ṅyian woe.