Read Ewondo Ekm 6 Bible Online

Ekm 6 - Ewondo bible

Ekm 6

¹[21][22] Ndò mëngayen anë ntomba wayaè zitam dzia ya zitam zamgbal, mëwogo anë tsit dzia ya tsit enyii yakòbò hë anë kiṅ nkulu na: Zaag.

²Ndò mayen mfum ekabëli[23], e mod angabë atoa dzò a yob abëlë mfan, ndò bëngavë nyè ekadi-olugu, ndò angakui a nsëṅ, zingi, asu yë na akë dò.

³Eyòṅ angayaè e zitam bèè, ndò mawog e tsit bèè edzoo na: Zaag!

⁴Ndò ekabëli efë yakui, eviege, ndò bëngavë e mod angabë abëdë ete ngul na amana mvoè a si, asu yë na bëtsigan kiṅ bò a bò, bëvëë nyè mod nyamëla okëṅ.

⁵Eyòṅ angayaè e zitam lala, ndò mawog e tsit lala edzoo na: Zaag! Ndò mayen ekabëli evini, e mod angabë atoa dzò a yob abëlë nlot[24] a wò woe.

⁶Ndò mëngawog hë anë kiṅa zaṅ e tsit enyii nyi edzoo na: Man angamba oles asu nsaṅ mòni, mëngamba më oles mëlè a taṅ nsaṅ mòni, hë da, të waandaman mbòn ai wayn.

⁷Eyòṅ angayaè e zitam nyiina, ndò mawog kiṅ e tsit nyiina edzoo na: Zaag!

⁸Ndò mayen ekabëli etoa nyòl zoṅ, dzoe e mod angabë atoa dzò a yob atoa na: Awu; Nnam bëkon ozaa watoṅ nyè, ndò bëngavë nyè ngul a efas nyiina ya si na awoe ai nyamëla, ai zie, ai awu, ai tsit mëfan ya si.

⁹Eyòṅ angayaè e zitam tana, ndò mayen minsisim mi e bod bëngawoe etòm ebug Zamba ai asu mbòòlan bëngabë bëbëlë, mitoa a alatar a si.

¹⁰Ndò bëngabam a yob ete, bò na: A mfufub ṅyëgëlë, a onë mod-afidi, wayi bò tègè tsig nkat, ovudan mëki maan abë e bod bëtoa a si akui oden?

¹¹Ndò bëngavë anë mod ya ete mfum ndzòmbò eyie, ndò bakad bò na bëtam waè tsëtsat, akui anë taṅ e bod basye ai bò fufulu ai taṅ babënyaṅ yatoban, tò e ba bëngayi ya wu, tò bò bëben.

¹²Ndò angayaè e zitam samëna, mëyënë anë si yatigëdan eyëgan, nlo-dzobo angavin anë efus eyie ya bëtiṅ ai esil, ngòn esë entoa hë anë mëki.

¹³Ndò atitie ya yob angaku a si, hë anë ele bibuma yasulan bikenges bibuma bie ai nkulu,

¹⁴ndò yob ongasalban a zaṅ, hë anë wayëm a wavul afëb kalara, nkol osë ai elon esë bingafami a bitye biaban.

¹⁵Minkukuma ya si, ai mimfaṅ mi bod ai bëdzoe bakuda bëzimbi, ai bod bë akuma, ai mingungul, man olò osë ai fili mod esë, bëngasòbò a mimbog mëkòg ai a minkom a minkol,

¹⁶bëngadzo ai minkom ai minkol na: Kuan bia a yob, mimana bia sòli a mis më e mod atoa a etoa-ati ai a olun man ntomba,

¹⁷amu mod amos olun waban asò ya, ndò za anë dzam bò nkanga a mis më amos te?